ކުންފުނީގެ ކޮރަޕްޝަންގެ މައްސަލައެއް ކަމަށްބުނެ ދައުރުވަނީ ހަގީގަތާ ހިލާފު ޚަބަރެއް: ފެނަކަ
26 ނޮވެމްބަރު 2019 | އަންގާރަ 17:14ކުންފުނީގެ އަގު ވައްޓާލުމަށް ލިޔެފައިވާ ޚަބަރެއް
ފެނަކަ ކޯޕްރޭޝަންގެ މެނޭޖިން ޑިރެކްޓަރު އަހްމަދު ސައީދު މުހައްމަދު
ފެނަކައިގެ ކޮރަޕްޝަން މައްސަލައެއް އޭސީސީ ގައި ފައިލްކޮށްފައިވާކަމަށް ރިޕޯޓުކުރި ޚަބަރަކީ ހަގީގަތާއި ހިލާފު ޚަބަރެއްކަމަށް ފެނަކަ ކޯޕްރޭޝަނުން ބުނެފިއެވެ.
މި މައްސަލައާ ގުޅިގެން ފެނަކައިން ނެރުނު ނޫސްބަޔާނުގައި ބުނީ ރާއްޖޭގައި އޮންލައިން ނޫހެއް ކަމަށްވާ ދިޔަރެސްގައި '''ފެނަކައިގެ ކޮރަޕްޝަން މައްސަލައެއް އޭސީސީ ގައި ފައިލްކޮށްފި'' މިމައުޟޫގެ ދަށުން 26 ނޮވެންބަރު 2019 ވަނަ ދުވަހު ލިޔެފައިވާ ޚަބަރަކީ އެއްވެސް އަސާސެއްނެތި، ރައްޔިތުންނަށް ކަމުގެ ހަގީގަތް އޮޅި، ކުންފުނީގެ އަގުވެއްޓޭގޮތަށް ލިޔެފައިވާ ޚަބަރެއް ކަމަށެވެ.
ފެނަކައިން ބުނީ އެޚަބަރަކީ އެއްވެސް ހަގީގަތެއް އެކުލެވިގެން ނުވާ، އަދި ކަން ހިނގާފައިވާ ގޮތް ސާފުކުރުމެއް ނެތި، ހެޔޮ ނިޔަތުން އެއްކިބާވެ ލިޔެފައިވާ ލިޔުމެއް ކަމަށެވެ. އަދި އެލިޔުމަކީ ޒިންމާދާރު ނޫސްވެރިކަމުގެ މިންގަނޑުތަކުން ބޭރުވެ، ކުންފުންޏާ މެދު ރައްޔިތުންގެ މެދުގައި އިތުބާރު ގެއްލުވާލައި، ކުންފުނީގެ ނަން ކިލަނބުކޮށް ކުންފުނީގެ ވެރިންނާއި ޒިންމާދާރު މުވައްޒަފުންގެ އަގު ވައްޓާލައި އަބުރު ކަތިލުމަށް ލިޔެފައިވާ ލިޔުމެއް ކަމަށް ފެނައިން ބުންޏެވެ.
މީގެއިތުރުން ފެނަކައިން ބުނީ ރައްޔިތުންނަށް ފޯރުކޮށްދޭން ޖެހޭ އެންމެހާ ޚިދުމަތްތައް ފޯރުކޮށްދިނުމަށް ކުންފުނިން ކުރާ ކޮންމެ ކަމެއް ވެސް ކުރަމުންދަނީ ހާމަކަން ބޮޑުގޮތެއްގައި ދެފުށް ފެންނާނެހެން ކުންފުންޏަށް އެންމެ ފައިދާ ހުރި ގޮތަށް ކަމަށެވެ.
ފެނަކައިން ބުނީ ކުންފުނިންދޭ ޚިދުމަތްތަކާ ގުޅިގެން އެއްވެސް މައުލޫމާތެއް އޮޅުންފިލުވަން ބޭނުންވާ ފަރާތްތަކަށް އަބަދުވެސް ކުންފުނިން އެމައުލޫމާތެއް ފޯރުކޮށްދޭނެ ކަމަށެވެ.
