ފަނޑިޔާރުގެ އިސްލާހުކުރުމަށް ފަނޑިޔާރުންގެ ހުރިހާ ކަމެއް ގާތުން ބަލަންޖެހޭ: ރައީސް ނަޝީދު
ނިޒާމުތައް ޚަރުދަނާ ކުރުމާއި މީހުން ތަމްރީން ކުރުމާއި ފަނޑިޔާރުންނަށް ދިމާވާ މައްސަލަތަކާ ގުޅޭގޮތުން އަޅާލަންޖެހޭ ކަމަށް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ފަނޑިޔާރުގެ އިސްލާހުކުރުމަށް ކުރަމުންދާ މަސައްކަތްތަކުގެ ތެރޭގައި ފަނޑިޔާރުންގެ ހުރިހާކަމެއް ގާތުން ބަލަންޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ހަމައެކަނި ފަނޑިޔާރުން ބަދަލުވުމަކުން ޝަރުޢީ ނިޒާމު އިސްލާހުވެގެންދާނެ ކަަމަށް ގަބޫލުނުކުރައްވާ ކަމަށެވެ. ރައީސް ނަޝީދު އެއިޝާރާތްކުރައްވަނީ ސުޕްރީމް ކޯޓުގެ ފަނޑިޔާރު އަބްދުލްޣަނީ ވަކިކުރުމަށް ބުދަ ދުވަހުގެ ޖަލްސާއަށް ހުށަހެޅުމަށް އެޖެންޑާ ކޮށްފައިވާއިރު ފަނޑިޔާރު ޣަނީ ވަކިކުރަން މަޖިލީހުން ފާސްކޮށްފިނަމަ ސުޕްރީމް ކޯޓުގައި ކުރީގައި ތިއްބެވި ހުރިހާ ފަނޑިޔާރުން ބަދަލުވެގެންދާނެތީ އެކަމަށެވެ.
ރައީސް ނަޝީދު ވިދާޅުވީ ފަނޑިޔާރުންގެ އިތުރުން ނިޒާމުތައް ޚަރުދަނާ ކުރުމާއި މީހުން ތަމްރީން ކުރުމާއި ފަނޑިޔާރުންނަށް ދިމާވާ މައްސަލަތަކާ ގުޅޭގޮތުން އަޅާލުމާއި ވަރަށް ގާތުން ފަނޑިޔާރުންގެ ހުރިހާ ކަމެއް ބެލުން އެއީ ފަނޑިޔާރުގެ އިސްލާހު ކުރުމަށް ކުރަން ހުރި ކަންތައްތައް ކަމަށެވެ. މީގެއިތުރުން ޖުޑީޝަރީއާއި ގުޅުންހުރި ޤާނޫނުތަކަށް އިސްލާހު ގެންނަންޖެހޭ ކަމަށްވެސް ރައީސް ނަޝީދު ވިދާޅުވި އެވެ.
ޖުޑީޝަރީ އިސްލާހުކުރުމުގެ މަސައްކަތަކީ މިސަރުކާރުގެ ވައުދަކަށްވާއިރު އެމްޑީޕީގެ އެޖެންޑާ 19 ގެ ދަށުން ޖުޑީޝަރީ އިސްލާހުކުރުމުގެ މަސައްކަތް އަންނަނީ ކުރަމުންނެވެ.
