މައިކަލް ބްލޫމްބާގް އެމެރިކާގެ ރިޔާސީ އިންތިޚާބުގައި ވާދަ ކުރަން ނިންމައިފި

އެމެރިކާގެ ބިލިއަނަރ މައިކަލް ބްލޫމްބާގް އަންނަ އަހަރު އެޤައުމުގައި ބާއްވަން ހަމަޖެހިފައިވާ ރިޔާސީ އިންތިޚާބުގައި ވާދަ ކުރައްވާނެ ކަން އިޢުލާން ކުރައްވައިފިއެވެ.

އެމެރިކާގެ އިދިކޮޅު ޑިމޮކްރެޓިކް ޕާޓީގެ ރިޔާސީ ކެންޑިޑޭޓް ކަމަށް ވާދަ ކުރައްވަން ނިންމެވިކަން އިޢުލާން ކުރައްވަމުން ބްލޫމްބާގް ވިދާޅުވީ، ރިޔާސީ ރޭހުގައި އެމަނިކުފާނު ބައިވެރިވެވަޑައިގަންނަވަނީ ރައީސް ޑޮނަލްޑް ޓްރަމްޕް ބަލިކޮށް، އެމެރިކާ އާރާސްތު ކުރުމުގެ ވިސްނުމުގައި ކަމަށެވެ.

މީގެ އިތުރުން ބްލޫމްބާގް ވިދާޅުވީ، ރައީސް ޓްރަމްޕްގެ ފަރާތުން ފެނިގެންދަނީ ޒިންމާދާރުކަން ކުޑަ ޢަމަލުތަކެއް ކަމަށާއި ޓްރަމްޕްގެ ޒިންމާދާރުކަން ކުޑަ ޢަމަލުތަކަށް އިތުރު ހަތަރު އަހަރު ދެވެން ނެތް ކަމަށެވެ. އަދި ޓްރަމްޕަށް އިތުރު ދައުރެއް ލިބިއްޖެނަމަ، އޭގެ ސަބަބުން ޤައުމަށް ލިބޭ ގެއްލުންތަކުން އެމެރިކާއަށް ދުވަހަކުވެސް އަރައިނުގަނެވިދާނެ ކަމަށް ބްލޫމްބާގް ވިދާޅުވިއެވެ.

ބްލޫމްބާގަކީ ދުނިޔޭގެ ނުވަ ވަނައަށް އެންމެ މުއްސަނދި މީހާއެވެ. އޭނާގެ މިލްކިއްޔާތު 54.4 ބިލިއަން ޑޮލަރަށް އަރައެވެ. އޭނާ ވަނީ އޭނާގެ ކެމްޕޭނުގައި ޓީވީ އިޝްތިހާރުތަކަށް ޚަރަދުކުރުމަށް އެކަނިވެސް 30 މިލިއަން ޑޮލަރު ކަނޑައަޅުއްވާފައެވެ. މިއީ އެމެރިކާގެ ރިޔާސީ އިންތިޚާބުގެ ޕްރައިމަރީގެ އިޝްރިހާރުތަކަށް ކެންޑިޑޭޓަކު މިހާ ބޮޑު ޚަރަދެއް ކުރާ ފުރަތަމަ ފަހަރުކަން ފާހަގަކޮށްލެވެއެވެ.

ބްލޫމްބާގް ވަނީ އެމެރިކާގެ ސިޓީ އެއް ކަމަށްވާ ނިއު ޔޯކުގެ މޭޔަރުކަން 2001 އިން 2013 އަށް ކުރައްވާފައެވެ.