ލ. އަތޮޅުން ރައީސް ނަޝީދުއަށް ހޫނު މަރުހަބާއެއް!
މިދަތުރުފުޅަކީ ޖުޑީޝަލް އެކަޑަމީން އިންތިޒާމުކުރާ ސެމިނަރއެއް ރަސްމީކޮށް ފައްޓަވައި ދެއްވުމަށް ކުރައްވާ ދަތުރުފުޅެއް
ރައީސް މުހައްމަދު ނަޝީދު މިއަދު ހެނދުނު ލ. އަތޮޅަށް ވަޑައިގެންނެވުމުން އެމަނިކުފާނަށް މަރުހަބާ ދަންނަވަނީ--
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުއަށް ލ. އަތޮޅުން ހޫނު މަރުހަބާއެއް ދަންނަވައިފި އެވެ.
ލ. އަތޮޅަށް ރައީސް ނަޝީދު ހޯމަ ދުވަހު މިކުރައްވާ ދަތުރުފުޅަކީ، ކުޑަކުދިންގެ ހައްގުތަކާއި ކުޑަކުދިންގެ އަދުލްގެ ނިޒާމާބެހޭ ސެމިނަރއެއް ލ. އަތޮޅުގައި ބާއްވާތީ އެ ސެމިނާގައި ބައިވެރިވެވަޑައިގެންނެވުމަށް ކުރައްވާ ރަސްމީ ދަތުރުފުޅެކެވެ.
އެ ސެމިނަރ އިންތިޒާމު ކުރަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ދަށުން ހިނގަމުން އަންނަ ޖުޑީޝަލް އެކަޑަމީ އިންނެވެ.
އެސެމިނަރގައި ރައީސް ނަޝީދު ވައިވެރިވެވަޑައިގަންނަވަނީ، ރައްޔިތުންގެ މަޖިލީހުގެ ރައީސްގެ އިތުރުން، ޖުޑީޝަލް ސާވިސް ކޮމިޝަން (ޖޭއެސްސީ)ގެ މެމްބަރެއްގެ ގޮތުގަ އެވެ. ޑީޖޭއޭ ހިނގަމުން ދަނީ ޖޭއެސްސީގެ ދަށުން ނެވެ.
ކުޑަކުދިންގެ ހައްގުތަކާއި ކުޑަކުދިންގެ އަދުލްގެ ނިޒާމާބެހޭ އެ ސެމިނަރގެ ރަސްމީ މަސައްކަތް ފެށުމަށް ހަމަޖެހިފައިވަނީ އާދިއްތަ ދުވަހު އެވެ.
ރައީސް ނަޝީދު ލ. އަތޮޅަށް ހޮނިހިރު ދުވަހު ވަޑައިގެންނެވުމުން، އެއަތޮޅުގެ ގިނަ ބަޔަކު ވަނީ އެމަނިކުފާނަށް މަރުހަބާ ދެންނެވުމަށް ލ. ކައްދޫ އެއަރޕޯޓަށް ވެސް ވަޑައިގަންނަވާފަ އެވެ.
ރައީސް ނަޝީދުގެ މިދަތުރުފުޅުގެ ރަސްމީ މަސައްކަތް އާދިއްތަ ދުވަހަށް ތާވަލް ކުރެވިފައިވާއިރު، އެމަނިކުފާނު ހޮނިހިރު ދުވަހު، ލ. އަތޮޅަށް ވަޑައިގެން ވަނީ އެމްޑީޕީގެ ބައެއް ހަރަކާތްތަކުގައި ބައިވެވަޑައިގަންނަވާފަ އެވެ.
އެގޮތުން ލ. ގަމު މުކުރިމަގު އަވަށާއި ތުނޑީ އަވަށުގައި ހަދާފައިވާ އެމްޑީޕީގެ ހަރުގޭގައި ރަސްމީކޮށް، ދިދަ ނެގުމުގެ ހަރަކާތުގައި ބައިވެރިވެވަޑައިގަންނަވާ ގޮތަށް ވަނީ ހަމަޖެހިފަ އެވެ.
ރައީސް ނަޝީދުގެ މިދަތުރުފުޅުގައި ލ. އަތޮޅު ކައުންސިލަރުންނާ ބައްދަލު ކުރެއްވުމަށް ވެސް ވަނީ ހަމަޖެހިފަ އެވެ.
ރައީސް ނަޝީދުއާއެކު ލ. އަތޮޅަށް ނިސްބަތްވާ، ރައްޔިތުންގެ މަޖިލީހުގެ ދެ މެމްބަރުން ކަމަށްވާ ގަމު ދާއިރާގެ މެމްބަރު މުހައްމަދު ވިޝާމް އާއި ފޮނަދޫ ދާއިރާގެ މެމްބަރު މޫސާ ސިރާޖު ހިމެނިވަޑައިގަންނަވާއިރު، އެމްޑީޕީ ޕާލަމެންޓްރީ ގްރޫޕްގެ ލީޑަރު، މެދުހެންވޭރު ދާއިރާގެ މެމްބަރު އަލީ އާޒިމް އާއި ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާރޕާސަން ހަސަން ލަތީފްއާއި އެމްޑީޕީގެ ނައިބު ރައީސް މުހައްމަދު ޝިފާޒުގެ އިތުރުން ރައްޔިތުންގެ މަޖިލީހުގެ ބައެއް މެމްބަރުން ބައިވެރިވެވަޑައިގަންނަވަ އެވެ.
