މި ސަރުކާރު ވުޖޫދަށް ގެނައުމަށްޓަކައި ރައިސުލްޖުމްހޫރިއްޔާ އިބްރާހިމް މުހައްމަދު ޞާލިހު އިންތިޚާބީ ދުވަސްވަރު ވެވަޑައިގެންނެވި ވަޢުދުފުޅުތައް ފުއްދަމުންދާ މަންޒަރު ރައްޔިތުންނަށް ވަރަށް ސާފުކޮށް ފެނިގެންދާކަމަށް ރައީސުލްޖުމްހޫރިއްޔާގެ ނައިބު، ފައިސަލް ނަސީމް ވިދާޅުވެއްޖެއެވެ.

ހއ އަށް ރައިސުލްޖުމްހުރިއްޔާގެ ނައިބު ކުރައްވަމުން ގެންދަވާ ދަތުރުފުޅުގައި މޮޅަދޫ ބަނދަރު ހެދުމުގެ މަޝްރޫޢުގެ މަސައްކަތް އަމަލީ ގޮތުން ފެށުމަށް ބޭއްވި ރަސްމިއްޔާތުގައި ރައްޔިތުންނާއި މުޚާޠަބުކުރައްވާ ވާހަކަދައްކަވަމުން ނައިބު ރައީސް ވިދާޅުވީ، ރިޔާސީ އިންތިޚާބުގެ ދުވަސްވަރު މިއަދުގެ ރައިސުލްޖުމްހޫރިއްޔާ އިބްރާހިމް މުހައްމަދު ޞާލިހު ރާއްޖޭގެ އުތުރާއި ދެކުނުގެ އެންމެހާ ރަށްތަކަށް ވަޑައިގެން ރައްޔިތުންނާއި ބައްދަލުކުރައްވައި ދެއްކެވި ވާހަކަތަކާއި ވެވަޑައިގެންނެވި ވަޢުދުފުޅުތަކާއި އެކަންތައް ސަރުކާރުން ކުރާނެކަމަށް ދެއްވި ޔަޤީންކަން ވޭތުވެގެންދިޔަ އެއް އަހަރު ދުވަހުގެ ތެރޭގައި އެކަނިވެސް ރައްޔިތުންނަށް ވަރަށް ސާފުކޮށް ފެނިގެން ގޮސްފައިވާނެކަމަށެވެ.

ނައިބު ރައިސް ވިދާޅުވީ، މިދިޔަ އަހަރުގެ ސެޕްޓެމްބަރު މަހުގެ 5 ވަނަ ދުވަހު ރައީސް ޞާލިހު އެ ރަށަށް ވަޑައިގެންނެވިއިރު ރައްޔިތުން އެންމެ ބޭނުންވާ ކަންތައްތަކާއި އުފުލަންޖެހުނު ތަކުލީފުތަށް ފެނިގެންދިޔަކަމަށެވެ. މީގެއިތުރުން މޮޅަދޫގެ ރައްޔިތުން ޒަމާނުއްސުރެ އަރައި ފޭބުމަށްޓަކައި ތަޙައްމަލު ކުރުމުންދާ ދަތި އުނދަގޫތަށް ރައިސް ޞާލިހަށް ފެނިވަޑައިގެންނެވިކަމަށާއި، އެ މައްސަލަތަށް ހައްލުކޮށް މޮޅަދޫގައި މިއަހަރު ތެރޭގައި ބަނދަރެއް ޤާއިމުކޮށްދެއްވުމަށް ވަރަށް އިސްކަމެއް ދެއްވައި، މި ފެށިގެންދިޔައީ ރައްޔިތުންް ކުރި އުންމީދުގެ ފެށުންކަން ފާހަގަކުރެއްވިއެވެ. އަދި ރައްޔިތުންނަށް ބޭނުންވާ އަސާސި ހައްޤުތަށް ކަށަވަރުކޮށްދިނުމުގައި މި ސަރުކާރުން ރަށުގެ ކުޑަ ބޮޑު މިނަކަށް ނުބަލާނެކަމަށާއި ރައްޔިތުންގެ މެދުގައި އެއްވެސް ތަފާތުކުރުމެއް ނުގެންގުޅުއްވާނެކަމަށް ވިދާޅުވިއެވެ.

ސަރުކާރެއް އައުމުގެ ބޭނުމަކީ ރައްޔިތުންގެ މެދުގައި ހަމަޖެހުން ގާއިމުކޮށް ރައްޔިތުންނަށް ހުރި ދަތިތަށް ފިލުވައި ރައްޔިތުން ބޭނުންވާ ކަންތައްތަށް ހާސިލުކޮށްދިނުންކަން ފާހަގަކޮށް ނައިބު ރައީސް ވިދާޅުވީ ރައްޔިތުން ބާރުލާފައި މި ސަރުކާރު ވެރިކަމަށް ގެނައި ސަބަބަކީވެސް އެއީކަމަށެވެ. އަދި އަބަދުވެސް މި ސަރުކާރުގެ މަޤުސަދަކީ ރައްޔިތުންނަށް ހަމެޖެހުމާއި ކުރިއެެރުން ހޯދައިދިނުންކަމަށާއި، ހުއްޓުމެއްނެތި އެ މަސައްކަތް ކެނޑިނޭޅި ކުރާނެކަމުގެ ޔަޤީންކަން ރައްޔިތުންނަށް އަރުވާކަމަށް އެމަނިކުފާނު ވިދާޅުވިއެވެ.

ނައިބު ރައީސްގެ މި ދަތުރުފުޅުގައި ރައީސް އޮފީހުގެ މިނިސްޓަރ އަހުމަދު ސަމީރުގެ އިތުރުން އިހަވަންދޫ ދާއިރާގެ މެމްބަރު މުހައްމަދު ޝިފާއު އަދި ދިއްދޫ ދާއިރާގެ މެމްބަރު އަބްދުﷲ ވަހީދު ވަނީ ބައިވެރިވެވަޑައިގެންނެވިއެވެ.