ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމިޓީގެ އަހަރީ ދުވަސް ފާހަނގަކުރުމުގެ ގޮތުން އައިވަރީ ކޯސްޓްގެ ލެޖެންޑް ޔާޔާ ޓޫރޭއާއެކު ކިޑްސް ފެސްޓިވަލްއެއް ބާއްވައިފިއެވެ.

ބުރާސްފަތި ދުވަހުގެ ހަވީރު ގައުމީ ފުޓުބޯޅަ ދަނޑުގައި ބޭއްވި މި ފެސްޓިވަލްގައި 600 އެއްހާ ކުދިން ބައިވެރިވެފައިވާއިރު، މި ފެސްޓިވަލްގައި ޔާޔާ ޓޫރޭއާއެކު ފުޓުބޯޅައިގެ އެކި ހަރަކާތްތަކުގައި ބައިވެރިވުމުގެ ފުރުސަތު އެކުދިންނަށް ވަނީ ލިބިފައެވެ.

އުމުރުން 18 އަހަރުގައި ޕްރެފެޝަނަލް ފުޓްބޯޅަ ބެލްޖިއަމްގެ ބެވްރެން އިން ފެށި ޓޫރޭ ވަނީ ކެރިއަރު ނިންމާލުމުގެ ކުރިން ހަތް ކްލަބަކަށް ކުޅެފައެވެ.

ދެހާސް ހަތަރު ވަނަ އަހަރު އައިވަރި ކޯސްޓުގެ ގައުމީ ސްކޮޑްގައި ހިމެނި ޓޫރޭ ވަނީ އެ ޓީމަށް ތިން ވޯލްޑް ކަޕްގައި ކުޅެފައެވެ. އެއީ އެ ޓީމު ފުރަތަމަ ފަހަރަށް ވޯލްޑް ކަޕަށް ކޮލިފައިވި 2006 ވަނަ އަހަރާއި 2010 ވަނަ އަހަރުގެ އިތުރުން 2014 ވަނަ އަހަރުއެވެ. ޑިޑިއޭ ޑޮރޯގްބާއަށް ފަހު އައިވަރީ ކޯސްޓުގެ ކެޕްޓަންކަމާއި ޓޫރޭ ހަވާލުވެފައި ވަނީ 2014 ވަނަ އަހަރެވެ.

ގައުމީ ޓީމަށް ކުޅުން ޔާޔާ ޓޫރޭ ހުއްޓާލީ 2016 ވަނަ އަހަރުގެ ސެޕްޓަމްބަރު މަހުގެ 20 ވަނަ ދުވަހުއެވެ. އައިވަރީ ކޯސްޓުގެ ގައުމީ ޓީމަށް އޭނާ ވަނީ 20 ގޯލް ކާމިޔާބު ކޮށްދީފައެވެ.

ޓޫރޭގެ ފުޓްބޯޅަ ކެރިއަރުގައި އެންމެ ގިނަ ދުވަސް ހޭދަކޮށްފައި ވަނީ މެންޗެސްޓަރ ސިޓީގައެވެ. އެ ކްލަބުގައި ހޭދަކުރި ނުވަ އަހަރުގެ ތެރޭގައި ޓޫރޭ ވަނީ އެ ކްލަބަށް ތިން ޕްރިމިއާ ލީގާއި އެފްއޭ ކަޕާއި ދެ ލީގުގެ އިތުރުން އެއް ކޮމިއުނިޓީ ޝީލްޑް ހޯދައިދީފައެވެ.