ބައްސާމް އާއި އެފްއޭއެމް ބަދުނާމުކުރުމަށް ހިންގާ އަމަލު އެ އިދާރާ އިން ކުށްވެރިކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި އެ އިދާރާގެ ރައީސް ބައްސާމް އަދީލް ޖަލީލު ބަދުނާމުކޮށް ފުޓުބޯޅަ އާއިލާ ތެރޭގައި ފިތުނަވެރިކަމާއި ނަފްރަތު އުފެއްދުމަށް ސޯޝަލް މީޑިއާގައި ބަޔަކު މީހުން މަސައްކަތްކުރަމުން އަންނަ ކަމަށާއި، އެ އަމަލު ކުށްވެރިކުރާ ކަމަށް އެފްއޭއެމް އިން ބުނެފި އެވެ.

އެފްއޭއެމް އިން އާދީއްތަ ދުވަހު ނެރުނު ބަޔާނެއްގައި ބުނީ އެފްއޭއެމް އާއި ބައްސާމްގެ އިތުބާރު ގެއްލޭގޮތަށް، ބައްސާމްގެ ނަމުގައި އަސްލުނޫން "ފޭކް" އެކައުންޓެއް ޓްވިޓާގައި ދަނީ ހަރަކާތްތެރިވަމުން ކަމަށާއި، މި އަމަލަކީ ބަޔަކު މީހުން ހިންގާ ފިނޑި އަމަލެއް ކަމަށެވެ.

އެފްއޭއެމް އިން ބުނީ އެ އިދާރާއަކީ އަބަދުވެސް މަސައްކަތްކުރަނީ ދިވެހި ފުޓުބޯޅަ ކުރިއެރުވުމަށާއި، ދިވެހި ކުޅުންތެރިންނާއި ދިވެހި ކްލަބްތަކުގެ ފާގަތި މަންފާއަށް ކަމަށެވެ. އެގޮތުން މިހާތަނަށް ދިވެހި ފުޓުބޯޅަ އައުމުގައި އެ ކުޅިވަރަށް ބައިނަލްއަގުވާމީ ފެންވެރުގަ އާއި ގައުމީ ފެންވަރުގައި ކުޅެ އެތައް ކާމިޔާބީތަކެއް ހޯދައި ދެއްވާފައިވާ ފަރާތްތަކުގެ އަގު އެއްވެސް ތަފާތުކުރުމެއް ނެތި އެ އިދާރާއިން އަދާކުރަމުން އަންނަ ކަމަށެވެ.

މީގެއިތުރުން އެ ކާމިޔާބީ ހޯދައިދިން ފަރާތްތަކުގެ މިންނެތް މަސައްކަތުން ދިވެހި ފުޓުބޯޅަ އަށް ލިބިފައިވާ ކާމިޔާބީތަކަށް އެފްއޭއެމް އިން ވަނީ ޝުކުރު އަދާކޮށްފައެވެ. އަދި އެއްވެސް ބޭފުޅެއްގެހިދުމަތާއި، އަބުރަށް އުނިކަން ލިބޭފަދަ އެއްވެސް އަމަލެއް އެފްއޭއެމްގެ ވެރިޔަކު އަދި މުވައްޒަފަކުވެސް ނުކުރާނެކަމުގެ ފުރިހަމަ ޔަގީންކަން އެ އިދާރާއިން ވަނީ އަރުވާފައެވެ.

ބައްސާމްގެ ނަމުގައި އެފްއޭއެމް އިން އަސްލުނޫން އެކައުންޓަކުން ޓުވީޓްކޮށްފައިވާއިރު، އެ ޓުވީޓުގައި ވަނީ "ކޯޗެއް 17 އަހަރު ކުޅެވިގެންތަ ތިއުޅެނީ" މިހެންނެވެ. އެހެންނަމަވެސް މާގިނައިރުތަކެއް ނުވަނީސް މި ޓުވީޓް ޑިލީޓްކޮށްލާފައިވާއިރު، ސޯޝަލް މީޑިއާގައި ވަނީ އެ ޓުވީޓުގެ ސްކްރީންޝޮޓްތައް އާންމުވެފައެވެ.

ބެލެވޭ ގޮތުގައި މި ޓުވީޓް އަމާޒުކޮށްފައިވަނީ ނިއުގެ ކެޕްޓަން އިމްރާން މުހައްމަދު އަށެވެ. އެފްއޭއެމް އިން ދާދި ފަހުން ވަނީ އިމްރާން ދެ މެޗަށް ސަސްޕެންޑުކޮށް ޖޫރިމާނާކޮށްފައެވެ. އެފްއޭއެމް އިން އިމްރާން ސަސްޕެންޑުކުރީ އީގަލްސްއާ ދެކޮޅަށް މާލޭ ލީގުގައި ހިނގި ހަމަނުޖެހުންތަކަށް ފަހުއެވެ.