މެންދޫއިން ގަވާއިދާއި ޚިލާފަށް ރުއް ގަސް ނެގި މީހަކު 275،000 ރުފިޔާއިން ޖޫރިމަނާކޮށްފި
ޖޫރިމަނާގެ ފައިސާ އެ އެޖެންސީއަށް 30 ދުވަހުގެ މުއްދަތުގެ ތެރޭގައި ދެއްކުމަށް ވަނީ އަންގާފައި
ލ. މެންދޫ
ލ. މެންދޫއިން ޤަވާއިދާއި ޚިލާފަށް ރުއްގަސް ނެގި މީހަކު އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ޖޫރިމަނާ ކޮށްފިއެވެ.
ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނުގެ ދަށުން ހެދިފައިވާ ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާއިދުގެ 16 ވަނަ މާއްދާގެ ދަށުން ތިމާވެއްޓަށް އަސަރު ފޯރާ މިންވަރު ބަޔާންކުރާ ރިޕޯޓް ހެދުމާއި ބެހޭ ޤަވާއިދުގެ 20 ވަނަ މާއްދާގެ (ހ)ގެ 10 ވަނަ ނަމްބަރަށް ރިއާޔަތްކޮށް މިމަހުގެ 20 ވަނަ ދުވަހު އީޕީއޭ އިން 275،000 (ދެލައްކަ ހަތްދިހަ ފަސްހާސް) ރުފިޔާއިން ޖޫރިމަނާ ކޮށްފައިވަނީ ހަސަން އާދިލް، އަސުރުމާގެ، ސ. މަރަދޫއެވެ. އަދި މި ޖޫރިމަނާގެ ފައިސާ އެ އެޖެންސީއަށް 30 ދުވަހުގެ މުއްދަތުގެ ތެރޭގައި ދެއްކުމަށް އޭނާ އަށް ވަނީ އަންގާފައެވެ.
ލ މެންދޫއަކީ ދަނޑުވެރިކަމުގެ މަސައްކަތް ކުރުމަށް ހަސަން އާދިލް އަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އިން ދޫކޮށްފައިވާ ރަށެކެވެ.
އެ ރަށުގައި ދަނޑުވެރިކަން ކުރުމުގެ ގޮތުން މިދިޔަ އަހަރުގެ ސެޕްޓެމްބަރު މަހުގެ 10 ގައި ތިމާވެއްޓަށް އަސަރު ފޯރާނެ މިންވަރު ބަޔާންކުރާ އެ އެޖެންސީއަށް ހުށަހަޅާ މިދިޔަ އހަރުގެ ނޮވެމްބަރު މަހުގެ 25 ގައި މި ރިޕޯޓް ފާސްކޮށް އެ އެޖެންސީން ވަނީ ތިމާވެށީގެ ނިންމި ގޮތުގެ ލިޔުން ދޫކޮށްފައެވެ. އެހެންނަމަވެސް އެ ހުއްދައިގެ ބޭރުން ރަށުގެ އިރު އުތުރު ފަރާތުން ރުއްގަސް ނަގައި 4،822 (ހަތަރު ހާސް އަށްސަތޭކަ ބާވީސް) އަކަ މީޓަރުގެ ސަރަހައްދެއް ސާފުކޮށް މަގެއް ހަދާފައި ވާކަމަށް އީޕީއޭއިން ބުނެއެވެ.
