ކަލަރސް އެވޯޑް 2018: ޖުމްލަ 224 އެވޯޑެއް ފަހުރުވެރި ވަނަތައް ހޯދި ދަރިވަރުންތަކަކަށް!
އައުޓްސްޓޭންޑިންގް އެވޯޑް 3 އެތްލީޓަކަށް ލިބިފައިވޭ
ކަލާސް އެވޯޑް
ރާއްޖޭގެ ސްކޫލްތަކުގައި ތަޢުލީމު ޙާޞިލްކުރަމުންދާ ދަރިވަރުން، ދިރާސީ އަހަރުގެ ތެރޭގައި ވާދަކުރާ އެކިއެކި ކުޅިވަރުތަކުން ހޯދާފައިވާ ރަންވަނަތައް ޤައުމީ ފެންވަރެއްގައި ފާހަގަކުރުމަށް ބާއްވާ ކަލަރސް އެވޯޑްގައި 2018 ގައި ޖުމްލަ 224 އެތްލީޓަކަށް އެވޯޑްދީފިއެވެ.
2014 ވަނަ އަހަރު މިނިސްޓްރީ އޮފް އެޑިޔުކޭޝަނުން ތަޢާރަފުކޮށްފައިވާއިރު އޭގެ ފަހުން ކޮންމެ އަހަރަކުވެސް ވަނީ ވަނަތައް ހާސިލްކުރާ ކުދިންގެ އަގުވަޒަންކުރަމުންނެވެ. އެގޮތުން، ކަލަރސް އެވޯޑް 2018 ޚުލާސާއަށް ބަލާއިރު، މި އެވޯޑަށް 31 ސްކޫލަކުން ޖުމުލަ 500 އެޕްލިކޭޝަން ހުށައަލާފައިވާކަމަށް މިނިސްޓްރީ އޮފް އެޑިއުކޭޝަނުން ހާމަކޮށްފައިވާރިު އޭގެތެރޭގައި އަތޮޅުތެރެއަށް ނިސްބަތްވާ 15 ސްކޫލް ހިމެނެއެވެ.
އެޑިއުކޭޝަން މިނިސްޓްރީން ބުނެފައިވަނީ އެވޯޑު ލިބޭ ސްކޫލްތަކުގެ ތެރޭގައި އަތޮޅުތެރޭގެ 14 ސްކޫލަކާއި މާލޭގެ 16 ސްކޫލް ހިމެނޭކަމަށާއި ކަލާރސް އެވޯޑު 2018 ގައި ޖުމުލަ 14 ކުޅިވަރަކުން އެވޯޑު ދެވުނުކަމަށެވެ. އޭގެތެރޭގައި، އެތުލެޓިކްސް، ބެޑްމިންޓަން، ބާސްކެޓް، ކެރަމް، ޗެސް، ކުރިކެޓް، ފުޓްބޯޅަ، ހޭންޑްބޯޅަ، ނެޓްބޯޅަ، ސްވިމިންގ، ޓޭބަލްޓެނިސް، ޓެނިސް، އަދި ވޮލީބޯޅަ ހިމެނެއެވެ.
އައުޓްސްޓޭންޑިންގް އެވޯޑް 3 އެތްލީޓަކަށް ލިބިފައިވާއިރު، އެ އެތްލީޓުންގެ ތެރޭގައި، އެތުލެޓިކްސްއިން އައްޑޫ ހައި ސްކޫލްގެ އައިޝާތު ހިމްނާ ޙަސަން، ބެޑްމިންޓަނުން އިމާދުއްދީން ސްކޫލްގެ ދަރިވަރު ނިބާލް އަޙްމަދުގެ އިތުރުން ޓޭބަލްޓެނިހުން އިސްކަންދަރު ސްކޫލްގެ ދަރިވަރު އައިޝަތު ރަފާ ނާޒިމް ހިމެނެއެވެ.
މިނިސްޓަރުގެ ހާއްސަ އެވޯޑު ލިބިފައިވަނީ މިއަހަރު ބޭއްވުނު އިންޑިއަން އޯޝަން އައިލޭންޑް ގޭމްސްގައި ރާއްޖެއަށް އެންމެ ގިނަ ރަންމެޑަލް ހޯދައިދިން ކުޅުންތެރިޔާ، ފާތިމަތު ދީމާއަށެވެ. މީގެއިތުރުން، "ކަލަރސް އެވޯޑް ވިނަރ 2018 " އަކީ އައްޑޫ ހައި ސްކޫލުގެ އައިޝާތު ހިމްނާ ޙަސަންއެވެ.
މޯލްޑިވްސް ސްކޫލް ސްޕޯރޓްސް އެވޯޑް ނުވަތަ ކަލަރސް އެވޯޑަކީ، ރާއްޖޭގެ ސްކޫލްތަކުގައި ތަޢުލީމު ޙާޞިލްކުރަމުންދާ ދަރިވަރުން، ދިރާސީ އަހަރުގެ ތެރޭގައި ވާދަކުރާ އެކިއެކި ކުޅިވަރުތަކުން ހޯދާފައިވާ ރަންވަނަތައް ޤައުމީ ފެންވަރެއްގައި ފާހަގަކުރުމަށް މިނިސްޓްރީ އޮފް އެޑިޔުކޭޝަނުން ތަޢާރަފުކޮށްފައިވާ އެވޯޑެކެވެ. މި އެވޯޑު ތަޢާރަފްކޮށްފައިވަނީ 2014 ވަނަ އަހަރުއެވެ. 2014 ވަނަ އަހަރު އެވޯޑު ދިނުމަށް ނިންމާފައިވަނީ 2013 ވަނަ އަހަރުގައި ކުޅިވަރުން، ދަރިވަރުން ހޯދާފައިވާ ކާމިޔާބީތަކަށެވެ.
