މިނިސްޓަރ ނާޒިމަށް ޑަބްލިއުއެޗްއޯގެ ނޯ ޓޮބޭކޯ ޑޭ އެވޯޑް އަރުވައިފި

ވޯލްޑް ނޯ ޓޮބޭކޯ ޑޭ އާއި ގުޅުވައިގެން ދުނިޔޭގެ ސިއްހަތު ޖަމުޢިއްޔާ، ޑަބްލިއުއެޗްއޯއިން ދޭ ވޯލްޑް ނޯ ޓޮބޭކޯ ޑޭ އެވޯޑް ރާއްޖޭގެ ސިއްހަތާއި ބެހޭ ވަޒީރު، ޢަބްދުﷲ ނާޒިމް އިބްރާހިމްއަށް އަރުވައިފިއެވެ.

ދުންފަތާއި ދެކޮޅަށް މަސައްކަތްކުރާ ބައިނަލްއަޤުވާމީ ދުވަހާއި ގުޅުވައިގެން، ޑަބްލިއުއެޗްއޯއިން ދޭ މި އެވޯޑް މިނިސްޓަރ ނާޒިމްއަށް އަރުވާފައިވަނީ، ރާއްޖޭގައި ދުންފަތް ކޮންޓްރޯލް ކުރުމަށް އެމަނިކުފާނު ކުރައްވަމުން ގެންދަވާ މަސައްކަތްޕުޅު ފާހަގަކުރުމުގެ ގޮތުންނެވެ.

Advertisement

ދުނިޔޭގެ ސިއްހަތު ޖަމުޢިއްޔާގެ ރާއްޖޭ އޮފީހުން ނެރެފައިވާ ބަޔާނެއްގައި ބުނެފައިވަނީ، އެ އޮފީހުގެ އެހީއާއިއެކު މިނިސްޓްރ ނާޒިމްގެ އިސްނެންގެވުމުގެ މަތިން، ރާއްޖޭގައި މަތީ ފަންތީގެ އެޑްވޮކަސީ ފޯރަމެއް ބޭއްވުނު ކަމަށާއި، މި ފޯރަމްގެ ނަތީޖާއެއްގެ ގޮތުން ރާއްޖޭގައި ދުންފަތުން ނަގާ ޓެކްސް ގާތްގަނޑަކަށް 60 އިންސައްތައަށް އުފުލިފައިވާ ކަމަށެވެ. ދެކުނު އޭޝިއާ ސަރަޙައްދުގައި ދުންފަތް ކޮންޓްރޯލް ކުރުމާއި ގުޅޭގޮތުން ސަރަޙައްދީ ފެންވަރުގެ ބައްދަލުވުމެއް ރާއްޖޭގައި ބޭއްވުމަށް މިނިސްޓަރ މަގުފަހިކޮށްދެއްވި ކަމަށާއި، އެ ބައްދަލުވުން ކާމިޔާބު ބައްދަލުވުމަކަށް ވެގެން ގޮސްފައިވާކަންވެސް ޑަބްލިއުއެޗްއޯގެ ރާއްޖޭ އޮފީހުން ނެރެފައިވާ ބަޔާނުގައިވެއެވެ.

މީގެ އިތުރުން، ދުންފަތުގެ އިސްތިއުމާލުކުރުން ހުއްޓަން ބޭނުންވާ ފަރާތްތަކަށް އެ ޚިދުމަތް ފޯރުކޮށްދެއްވުމަށާއި، އެކަމަށް ބޭނުންވާ ކިޓް ފަސޭހަ ކަމާއި އެކު ލިބޭނެ މަގު ތަނަވަސްކޮށްދެއްވުމަށް މިނިސްޓަރ ގިނަ މަސައްކަތްތަކެއް ކުރައްވާފައިވާކަން ޑަބްލިއުއެޗްއޯގެ ރާއްޖޭ އޮފީހުން ވަނީ ބަޔާންކޮށްފައެވެ.

މި ކަންކަމުގެ އިތުރުން، ޓޮބޭކޯ ކޮންޓްރޯލް ބޯޑުގެ މަސައްކަތްތައް އަލުން ފެށުމާއި، 2016 ވަނަ އަހަރު ދުންފަތާއި ދެކޮޅަށް މަސައްކަތްކުރާ ބައިނަލްއަޤުވާމީ ދުވަހާއި ގުޅުވައިގެން 'އައި ޗޫޒް ލައިފް' ނަމުގައި ހިންގި ކެމްޕެއިން ކުރިއަށް ގެންދިއުމުގައި މިނިސްޓަރ ނާޒިމް އަދާކުރެއްވި ރޯލު ޑަބްލިއުއެޗްއޯއިން ވަނީ ފާހަގަކޮށްފައެވެ. މި ދުވަހާއި ގުޅުވައިގެން، ޑަބްލިއުއެޗްއޯގެ ރާއްޖޭ އޮފީހުން ބުނެފައިވަނީ، ރާއްޖޭގެ ކުރިއަށް އަންނަން އޮތް ޖީލުތަކަކީ ދުންފަތުގެ އިސްތިއުމާލު ނުކުރާ ޖީލަކަށް ހެދުމަށް އެ ޖަމުޢިއްޔާއިން އިސްކަން ދީގެން މަސައްކަތް ކުރާނެ ކަމަށެވެ.