ޓޮޓެންހަމް ހޮޓްސްޕަރގެ ކޯޗުކަމުގެ މަގާމުން މައުރީސިއޯ ޕޮޗެޓީނޯ ވަކިކޮށްފިއެވެ.

ޕޮޗެޓީނޯ ވަކިކުރިކަން ޓޮޓެންހަމުން ކަށަވަރުކޮށްދީފައިވާއިރު، އެ ކްލަބުގެ ޗެއަރމަން ޑެނިއެލް ލެވީ ވިދާޅުވީ، ޕޮޗެޓީނޯ މަގާމުން ވަކިކުރަން ނިންމީ ވަރަށް ވިސްނުމަށް ފަހު ކަމަށެވެ. އެގޮތުން ޑެނިއެލް ވިދާޅުވީ، އިނގިރޭސި ޕްރިމިއަރ ލީގުގައި މިދިޔަ ސީޒަނުގެ ފަހުކޮޅު އަދި މި ސީޒަނުގެ ކުރީކޮޅު ޓޮޓެންހަމުން ނެރެފައިވާ ނަތީޖާތަކާމެދު ހިތްހަމަނުޖެހޭ ކަމަށެވެ.

ޓޮޓެންހަމްގެ ކޯޗުކަމުން ޕޮޗެޓީނޯ ވަކިކުރީ އޭނާ އެ ކްލަބް ދޫކޮށްލަން އުޅޭކަމަށް ރިޕޯޓުތައް ބުނަމުންދިޔަ ދަނޑިވަޅެއްގައެވެ. އަދި އެ ކްލަބުން އާ ކޯޗެއް ހޯދުމަށް މަސައްކަތް ކުރަމުން އަންނަ ކަމަށްވެސް ރިޕޯޓްތައް ބުނެއެވެ. ޓޮޓެންހަމްގެ ކޯޗުކަމުން ޕޮޗެޓީނޯ ވަކިކުރިއިރު، އޭނާ އެ ކްލަބާއެކު ހަދާފައިވާ އެއްބަސްވުން ހަމަވާނީ 2023 ވަނަ އަހަރެވެ. އޭނާ އެއްބަސްވުން އާކުރި މިދިޔަ އަހަރުގެ މެއި މަހުއެވެ.

އެސްޕަނިއޯލް އާއި ސައުތްހެމްޓަނަށް ކޯޗުކަން ކޮށްދީފައިވާ ޕޮޗެޓީނޯ ޓޮޓެންހަމްގެ ކޯޗުކަމާ ހަވާލުވީ 2014 ވަނަ އަހަރެވެ. އޭނާ ވަނީ އެޓީމަށް 293 މެޗުގައި ކޯޗުކަން ކޮށްދީފައެވެ. އޭގެ ތެރެއިން 159 މެޗުން އެޓީމު މޮޅުވިއިރު، 72 މެޗުން ވަނީ ބަލިވެފައެވެ. އަނެއް 62 މެޗު ނިމުނީ އެއްވަރުވެގެންނެވެ.

ޕޮޗެޓީނޯގެ އިރުޝާދުގެ ދަށުން ޓޮޓެންހަމް ވަނީ ލީގް ކަޕްގެ ދެވަނަ ހޯދުމުގެ އިތުރުން މިދިޔަ ސީޒަނުގައި ޔުއެފާ ޗެމްޕިއަންސް ލީގުގެ ދެވަނަ ހޯދާފައެވެ. ކުޅުންތެރިއެއްގެ ގޮތުގައި އެސްޕަނިއޯލް އާއި ޕީއެސްޖީއަށް ކުޅެފައިވާ ޕޮޗެޓީނޯ ވަނީ އާޖެންޓީނާގެ ގައުމީ ޓީމަށްވެސް ކުޅެފައެވެ. އޭނާ ވަނީ ކުޅުންތެރިއެއްގެ ގޮތުގައި އެސްޕަނިއޯލާކު ދެފަހަރެއްގެ މަތިން ކޮޕަޑެލްރޭ ކާމިޔާބުކޮށްފައެވެ.