އާމްދަނީން ޓެކްސް ނެގުމުގެ ބިލް ބަލައިގަނެ އިތުރަށް ދިރާސާކުރުމަށް މުޅި މަޖިލީހުގެ ކޮމިޓީއަށް

ސަރުކާރުގެ ފަރާތުން އުނގޫފާރު ދާއިރާގެ މެމްބަރު މުހައްމަދު ވަހީދު ހުށަހަޅުއްވާފައިވާ އާމްދަނީން ޓެކްސް ނެގުމުގެ ބިލް މަޖިލީހަށް ބަލައިގަނެ އިތުރަށް ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވައިފި އެވެ.

މިބިލް ބަލައިގަތުމަށް ވޯޓު ދެއްވީ 66 މެމްބަރުންނެވެ.

އާމްދަނީން ޓެކްސް ނެގުމުގެ ބިލްގައިވާ ގޮތުން އިންކަމް ޓެކްސް ނަގަންޖެހޭނީ މަހެއްގެ މައްޗަށް 40،000 ރުފިޔާއަށް ވުރެ މަތިން ލިބޭ މީހުންގެ އަތުންނެވެ. ބިލްގައި މިގޮތަށް އޮތުމުން އެމްޑީޕީ މެމްބަރުން ވަނީ ބަހުސް މަރުހަލާގައި ކަންބޮޑުވުން ފާޅުކުރައްވާފަ އެވެ. އެއީ އެމްޑީޕީން އެޖެންޑާ 19 ގެ ދަށުން ވެފައިވާ ވައުދަކީ އާމްދަނީން 60،000 ރުފިޔާއަށްވުރެ މަތިން ލިބޭ މީހުންގެ އަތުން ޓެކްސް ނެގުން ކަމަށްވާއިރު ބިލްގައި 40،000 ރުފިޔާ ކަމަށް ޖަހާފައި އޮތުމުންނެވެ.

މިކަމާއި ގުޅިގެން ފިނޭންސް މިނިސްޓަރ އިބްރާހީމް އަމީރު ބަޖެޓް ދިރާސާކުރާ ކޮމިޓީގައި ވާހަކަދައްކަވަމުން ވިދާޅުވީ މިހާރު ބިލްގައި ކަނޑައަޅާފައިވާ އަދަދަށްވުރެ މައްޗަށް ޖައްސާނަމަ އާމްދަނީ ލިބޭނެ ކަމަށް މިހާރު އަންދާޒާ ކޮށްފައިވާ އަދަދު މަދުވެގެންދާނެ ކަމަށެވެ. އާމްދަނީން ޓެކްސް ނަގައިގެން އަހަރެއްގެ މައްޗަށް 600 މިލިއަނަށްވުރެ ގިނައިން ރުފިޔާ ލިބޭނެކަމަށް ފިނޭންސް މިނިސްޓްރީން އަންދާޒާ ކުރެއެވެ. އަންނަ އަހަރަށް ލަފާކުރާ ދައުލަތުގެ ބަޖެޓްގައި އާމްދަނީ ލިބޭ ގޮތްތަކުގެ ތެރޭގައި އާމްދަނީން ލިބޭ ޓެކްސް ވަނީ ހިމަނާފައެވެ.