ޚަޝޯގީގެ މަރު: ސަޢޫދީ ސަރުކާރާއި ދެކޮޅަށް ބޭނުންކުރެވޭ ސިޔާސީ ހަތިޔާރަކަށް؟

ނިމިދިޔަ އަހަރުގެ ފަހުކޮޅު މުޅި ދުނިޔެ ސިއްސުވާލި ޙާދިސާއަކީ ތުރުކީވިލާތުގެ އިސްތަންބޫލްގައި ހުންނަ ސަޢުދީ އަަރައްބިއްޔާގެ ކޮންސިއުލޭޓްގެ ތެރޭގައި ސަޢޫދީ ނޫސްވެރިއެއްކަމަށްވާ ޖަމާލް ޚަޝޯޤީ މަރާލި ޙާދިސާއެވެ. ސަޢޫދީ ޝާހީ އާއިލާއަށް ފާޑުކިޔާ ވޮޝިންޓަން ޕޯސްޓްގައި މަހަކު އެއް ފަހަރު ކޮލަމެއް ލިޔަމުން ދިޔަ ޚަޝޯގީގެ މަރާއިއެކު، ސަޢޫދީ ޝާހީ އާއިލާއަށް ތުހުމަތުގެ އިނގިލި ދިއްކުރެވިގެން ދިޔައެވެ. ޚާއްސަކޮށް ޚަޝޯގީގެ ލިޔުންތަކުގައި އެންމެ ބޮޑަށް ފާޑުކިޔުން އަމާޒުވި ސަޢޫދިއަރަބިއްޔާގެ ވަލީޢަޙުދު އަމީރު މުހައްމަދު ބިން ސަލްމާނަށް ތުހުމަތުގެ އިނގިލިތަކެއް ދިއްކުރެވުނެވެ.

އެއާއިއެކު ސަޢޫދީ ސަރުކާރަށް ވަރަށް ބޮޑެތި ފާޑުކިޔުންތަކެއް އަމާޒުވެގެން ދިޔައިރު، ނިޒާމުގެ ތެރޭގައި މައްސަލަތަކެއް ހުރިކަން ސަޢޫދީ ޝާހީ އާއިލާއަށްވެސް ވިސްނުނެވެ. މައްސަލަ ފެންމަތިވި ހިސާބުން ފެށިގެން އެމައްސަލައިގައި ހިމެނޭ އަސްކަރީ އަދި ޖާސޫސީ އިދާރާތަކުގެ އިސްވެރިންނާއި ސަރުކާރުގެ އެހެން އިސްވެރިން ހައްޔަރުކޮށް، މަޤާމުން އެކަހެރި ކުރެވުނެވެ. އަދި ދައުލަތުގެ އެކި އިދާރާތަކުގެ އިސްވެރިން ބަދަލުކޮށް، އިސްލާހީ ފިޔަވަޅުތަކެއް އެޅިކަން ހާމަކުރިއެވެ.

މިމައްސަލައިގައި ސަޢޫދީ ސަރުކާރަށް އަމާޒުވި ފާޑުކިޔުންތަކުގެ ހިޔަނީގައި ސަޢޫދީ ސަރުކާރާއި ދެކޮޅަށް މަސައްކަތްކުރާ ހުޅަނގުގެ ފަރާތްތަކުން ސިޔާސީ ހަތިޔާރަކަށްވެސް މި ޙާދިސާ ބޭނުންކުރިކަން ފާހަގަކުރެވުނެވެ. އެގޮތުން އދގެ ސްޕެޝަލް ރެޕަޓުއަރ އެގްނަސް ކަލަމާޑް އަކީ މިމައްސަލައިގައި ސަޢޫދީ ސަރުކާރަށް އެންމެ ބޮޑަށް ފާޑުކިޔަމުންދާ މީހުންގެ ތެރެއިން އެކެކެވެ. ޙާދިސާ ހިނގިތާ 3 ވަނައަށް ވީ ދުވަހު ޖަމާލް ޚަޝޯޤީ މަރާލީ ސަޢޫދީ ސަރުކާރުންކަމަށާއި، ވަލީޢަހުދު މުހައްމަދު ބިން ސަލްމާންގެ އޯޑަރަށްކަމަށް ދޭހަވާފަދަ މޭރުމަކުން ކަލަމާޑް ޓްވީޓްކުރައްވަން ފެއްޓެވުމުން އޭނާއަށް ފާޑުކިޔުންތައް އަމާޒުވިއެވެ. އަދި އޭގެ ފަހުން ބައިނަލްއަޤުވާމީ މުޖްތަމަޢުން ޚަޝޯޤީގެ މައްސަލައިގައި ނެރުނު ގިނަ ބަޔާންތަކާއި ރިޕޯޓުތަކުގައި ކަލަމާޑްގެ ބަހަށް ހަވާލާދީފައިވުމުން، އެޤައުމުތަކުންނާއި ޖަމާޢަތްތަކުން ނެރުނު ބަޔާންތަކާއި ރިޕޯޓުތަކުގައިވާ މައުލޫމާތުގެ ޞައްޙަކަމާއިމެދު ސުވާލު އުފެއްދުމުގެ ފުރުޞަތު އެބައޮތެވެ.

ކޮންސިއުލޭޓަށް ޚަޝޯޤީ ވަނުމަށްފަހު ނުނިކުންނަކަމަށް ބައިނަލްއަޤުވާމީ މީޑިއާތަކުން ރިޕޯޓްކުރުމުން ސައޫދީ ސަރުކާރުން އެކަން ދޮގުކުރިއެވެ. އަދި އޭނާ ނިކުމެގެން ދިޔަކަމަށް ރަސްމީކޮށް ބުންޏެވެ. އެހެންނަމަވެސް އޭނާ ނުނިކުންނަކަން ފަހުން ހާމަވުމުން، ސަޢުދީ ސަރުކާރުން ވަނީ އެމައުލޫމާތު ހާމަކުރީ ކޮންސިއުލޭޓާއި، ކަމާއި ގުޅުން ހުރި އިދާރާތަކުން ދިން މައުލޫމާތުގެ މައްޗަށް ބިނާކޮށްކަމަށް ބުނެފައެވެ. މިކަން މިމަގުން ހިނގާފާނެކަމަށް ޤަބޫލު ނުކުރެވެންވީ ސަބަބެއްވެސް ނެތެވެ. މުހައްމަދު ބިން ސަލްމާނުގެ ފުށުން ފައިދާތަކެއް ލިބިދާނެކަމަށް ބަލައި، ވަލީއަހުދަށް ފާޑުކިޔާ މީހަކު މަރާލަން ބަޔަކު ކުރި މަސައްކަތުގެ ތަފްސީލު ސަޢުދީ ޝާހީ އާއިލާއަށް ނޭނގިދާނެއެވެ.

މިމައްސަލައިގެ ތަހުޤީޤު ނިމި، ޝަރީޢަތް ކުރިއަށްދާއިރު، އދގެ ސަލާމަތީ މަޖިލީހުގެ މެމްބަރު 5 ޤައުމަށާއި އިންސާނީ ހައްޤުތަކަށް މަސައްކަތްކުރާ ޖަމްޢިއްޔާތަކަށް ޝަރީޢަތް ކުރިއަށްދާ ގޮތް ބެލުމުގެ ފުރުޞަތު ސަޢުދީ ސަރުކާރުން ވަނީ ދީފައެވެ. އެހެންނަމަވެސް، މިމައްސަލައިގައި ސަޢުދީ ސަރުކާރަށް އެންމެ ބޮޑަށް ފާޑުކިޔާ އެއް ޤައުމުކަމަށްވާ ތުރުކީން ސަޢުދީއަށް ދޭން ޖެހޭ އެއްބާރުލުން ނުދޭކަމަށް ބުނެ ސަޢޫދީއިން ތަކުރާރުކޮށް ތުހުމަތުކޮށްފައެވެ. އަނެއްކޮޅުން ފާހަގަކޮށްލެވޭ އެއް ކަމަކީ ޖަމާލް ޚަޝޯޤީ މަރާލީ ސަޢުދީ ސަރުކާރުން ނޫންކަން އެނގިވަޑައިގަންނަވާކަމަށް ތުރުކީގެ ރައީސް ރަޖަބް ޠައްޔިބް އުރުދުޣާން މިދިޔަ ސެޕްޓެމްބަރު މަހު ވިދާޅުވިކަމެވެ. އުރުދުޣާން ވިދާޅުވީ އެކަން ކުރީ ސަޢުދީގައި އޮތް އަނދިރި ދައުލަތަކުން ކަމަށެވެ. މިއީ ސައުދީ ސަރުކާރުންވެސް ބުނާ ވާހަކައެވެ. އެމީހުންވެސް ބުނަނީ ޚަޝޯޤީ މަރާލީ ސަރުކާރުގެ ތެރޭގައި ތިބި ބަޔަކު، އަމިއްލައަށް އިސްނަގައިގެން، ޝާހީއާއިލާ ނުވަތަ ސަރުކާރުގެ އޯޑަރެއް ނެތިކަމަށެވެ.

ސަޢުދީގެ ވެރިއެއްގެ ހައިސިއްޔަތުން ޚަޝޯޤީގެ މަރުގެ ޒިންމާ ނަންގަވާކަމަށާއި، އެހެންނަމަވެސް އެޢަމަލު ހިންގަން އެއްވެސް އިރުޝާދެއް ދެއްވާފައިނުވާނެކަމަށް ދާދިފަހުން އަމީރު މުހައްމަދު ބިން ސަލްމާން ވަނީ ވިދާޅުވެފައެވެ. އެހެންނަމަވެސް، މި ހާދިސާ އަދިވެސް ވެފައިވަނީ ސަޢުދީ ޝާހީ އާއިލާއާއި ދެކޮޅު ފަރާތްތަކަށް ލިބިފައިވާ ސިޔާސީ ހަތިޔާރަކަށެވެ.