މޯލްޑިވްސް އިސްލާމިކް ބޭންކް، ސްޓޮކް އެކްސްޗޭންޖްގައި ރަސްމީކޮށް ލިސްޓް ކޮށްފިއެވެ.

މޯލްޑިވްސް އިސްލާމިކް ބޭންކް ޕީ.އެލް.ސީ ލިސްޓްކުރުމަށް ބޭއްވުނު ޚާއްސަ ޖަލްސާ ވަނީ އާދިއްތަ ދުވަހު ދަރުބާރުގޭ ރަންނަބަނޑޭރި މާލަމުގައި ބާއްވާފައެވެ. މި ޖަލްސާ ޝަރަފުވެރި މެހެމާނަކީ ފިނޭންސް މިނިސްޓަރު އިބްރާހިމް އަމީރެވެ. އިބްރާހިމް އަމީރު ވިދާޅުވީ އެމްއައިބީ އިން ދިވެހިރާއްޖޭގެ އިޤްތިސާދުގައި ކުޅޭ މުހިންމު ރޯލް ސަރުކާރުން ބަލައިގަންނަ ކަމަށާއި، މުސްތަޤުބަލުގައި ދިވެހިރާއްޖޭ އިޤްތިސާދު އިތުރަށް ކުރިއެރުމުގައި އިސްލާމިކް ބޭންކުގެ ދައުރު ފުޅާވެގެންދާނެ ކަމަށެވެ.

30 ޖޫން 2019 ވަނަ ދުވަހު މޯލްޑިވްސް އިސްލާމިކް ބޭންކް އިން ވަނީ ދުއިސައްތަ ސާޅިސް ހަތަރު މިލިއަން އެއްލައްކަ ފަންސަވީސް ހާސް ރުފިޔާއަށް، ހަ މިލިޔަން ނުވަލައްކަ ހަތްދިހަ ފަސް ހާސް ޙިއްސާ ޢާންމުންނަށް ވިއްކަން ހުށައަޅައިފައެވެ. ޙިއްސާ ވިއްކުމަށް ހުޅުވާލި 35 ދުވަހުގެ ތެރޭގައި މޯލްޑިވްސް އިސްލާމިކް ބޭންކުން ހުށައެޅި ހިއްސާގެ އަދަދަށްވުރެން 46.05 އިންސަތަށް ވަނީ އިތުރަށް ވިކިފައެވެ. އެގޮތުން 16084 އަމިއްލަ ފަރުދުން އަދި 60 އިންސްޓިޓުޝަނަލް އިންވެސްޓަރުން ބައިވެރިވެފައިވެއެވެ.

ހަފުލާގެ އެންމެ ޚާއްސަ އައިޓަމެއްގެ ގޮތުން ކުރިއަށް ގެންގޮސްފައިވަނީ ރަނގަބީލު ޖެހުމުގެ އައިޓަމެވެ. ރަނގަބީލު ޖެހުމުން ރަމްޒުކޮށްދެނީ ކުންފުނީގެ ހިއްސާ ސްޓޮކްމާރކެޓްގައި ގަނެވިއްކަން ފަށާފައިވާ ކަމެވެ. މިއައިޓަމްގައި، މޯލްޑިވްސް އިސްލާމިކް ބޭންކުގެ ފައުންޑަރ އަދި 2 ހިއްސާދާރުންކަމުގައިވާ ދިވެހި ސަރުކާރާއި، އައިސީޑީ، އެމްއެސްސީގެ ޗެއަރމަން އަލާއު އަލީ، އަދި ބޭންކުގެ ބޯޑުގެ ހުރިހާ މެމްބަރުން ބައިވެރިވިއެވެ.

އެމްއައިބީގެ ހިއްސާ ރާއްޖޭގެ ހުރިހާ ސަރަހައްދަކުން ގަނެފައިވެއެވެ. އަދި ރާއްޖެއިން ބޭރުގެ ބައެއް ޤައުމުތަކުންވެސް އެ ހިއްސާ ގަނެފައިވާކަަމަށް، މޯލްޑިވްސް އިސްލާމިކް ބޭންކުން ބުނެއެވެ.