ސަރުކާރަށް އެއް އަހަރު: ޓެކްނޮލޮޖީ މިނިސްޓްރީގެ ބިންގާ ރަނގަޅު. ނަމަވެސް ކުރަން ހުރި މަސައްކަތް ގިނަ!
މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއަށް ލިބެނީ "ބީ ޕްލަސް" އެއް
މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލް ރައީސް ސޯލިހުއާއެކު
މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއަކީ އިބްރާހިމް މުޙައްމަދު ސޯލިޙުގެ ސަރުކާރުގައި އަލަށް އުފެއްދެވި އެއް ވުޒާރާއެވެ. އެ ވުޒާރާ ރައީސުލްޖުމްހޫރިއްޔާ އުފެއްދެވީ ގައުމީ މުވާސަލާތާއި، ސައިންސްއާއި ޓެކްނޮލޮޖީ ދާއިރާ ތަރައްގީކޮށް ކުރިއެރުވުމުގެ މުހިއްމު މަގުސަދުގައެވެ. ސަރުކާރަށް މިއަދު އެއް އަހަރު ފުރުނުއިރު މި ވުޒާރާއިން ކޮށްފައިވާ ބައެއް މަސައްކަތް ތަކަށް މި ރިޕޯޓުގައި އަލި އަޅުވާލާނަމެވެ.
މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއިން ކުރި އެންމެ ބޮޑު އެއް މަސައްކަތަކީ މައްސަލަޖެހި ނާޒުކު ހާލަތެއްގައި އޮތް ޕައިސިސް ބޯޑަރ ކޮންޓްރޯލް ސިސްޓަމް އަޕްގްރޭޑް ކުރުމެވެ. އެގޮތުން ވުޒާރާގެ މަސައްކަތުން ވަނީ އެ ސިސްޓަމް އަޕްގްރޭޑްކޮށް، ރާއްޖޭގެ ވައިގެ ބަނދަރުތަކުގެ އިމިގްރޭޝަން ޚިދުމަތަށް ބުރޫނާރާނޭކަން ކަށަވަރުކޮށްދީފައެވެ. ޕައިސިސް ސިސްޓަމަކީ ގައުމުތަކަށް އެތެރެވެ ބޭރުވާ މީހުންގެ މައުލޫމާތު ހޯދުމަށް ބޭނުންކުރާ ސިސްޓަމެކެވެ.
ޕައިސިސް ބޯޑަރ ކޮންޓްރޯލް ސިސްޓަމް އަޕްގްރޭޑް ކުރުމުގެ އިތުރުން، މިނިސްޓްރީން ވަނީ ގައުމީ ޑޭޓާ ސެންޓަރގެ ޕަވަރ ސެކިއުރިޓީ ހަރުދަނާކުރުމަށް އައު ޔޫ.ޕީ.އެސް ސިސްޓަމެއް ކޮމިޝަން ކޮށްފައެވެ. މިނިސްޓްރީ އޮފް ސައިންސް އެންޑް ޓެކްނޮލޮޖީން ވަނީ ޕައިސިސް އާއި އިންޓަޕޯލްގެ ޑޭޓާބޭސް އިންޓަގްރޭޓްކޮށްފައި ކަން ފާހަގަކޮށްލެވެއެވެ.
މި ސަރުކާރަށް އަހަރެއް ފުރުނުއިރު ފާއިތުވި އަހަރު ތެރޭގައި އިންޓަނެޓު އަގު ހެޔޮ ކުރުމަށްޓަކައި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ފަރާތުން ފުރިހަމަ ކުރަން ޖެހޭ ހުރިހާ ކަންކަން ފުރިހަމަ ކޮށްފައި ވާކަމަށް އެ މިނިސްޓްރީއިން މައުލޫމާތު ދެއެވެ. އެގޮތުން އެ މިނިސްޓްރީން ވަނީ އިންޓަނެޓްގެ އަގު ހެޔޮކުރުމަށްޓަކައި މިނިސްޓްރީން ކުރަންޖެހޭ މަސައްކަތް ނިންމައި ސަރުކާރުގެ ލަފަޔަކަށް އެދި ހުށަހަޅާފައެވެ.
ނަމަވެސް، މިނިސްޓްރީއާއި މެދު ރައްޔިތުންގެ ހިތްހަމަނުޖެހުން އޮތް މައްސަލައަކީ މިއީ ކަމަށް ވުމުން މިކަމުގައި މިނިސްޓްރީއިން ހާމަކޮށްފައިވާ މައުލޫމާތާ މެދު ރައްޔިތުންގެ އުއްމީދާ ނުބައްދަލުކަން ފާހަގަކޮށްލަން ޖެހެއެވެ. އަދި އިންޓަރނެޓް އަގު ހެޔޮކުރަން ގެންގުޅޭ ވިސްނުމެއްވެސް މިހާތަނަށް ހާމަކޮށްފައެއް ނުވެއެވެ.
ރައީސް ސޯލިހުގެ ސަރުކާރަށް އެއް އަހަރު ވެގެން ދިޔަ އިރު މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީއިން ވަނީ އެން.ސީ.އައި.ޓީ ގެ ސޮފްޓްވެއަރ ޑިވެލޮޕްމަންޓް ސެންޓަރެއް ފުވައްމުލަކުގައި ޤާއިމްކޮށްފައެވެ. އަދި މިނިސްޓްރީ އާއި އެން.ސީ.އައި.ޓީގެ މުވައްޒަފުން މަސައްކަތްކުރުމަށްޓަކައި އެކަށީގެންވާ މަސައްކަތު މާހައުލެއް ޤާއިމްކުރުމުގެ އިތުރުން އެން.ސީ.އައި.ޓީގެ ހިންގުން ހަރުދަނާކުރުމަށް ސިވިލް ސަރވިސްއިން ކަނޑައަޅާފައިވާ މިންގަނޑަށް އިދާރީ އޮނިގަނޑު އެކުލަވާލަވާލާފައިވެއެވެ.
އީފާސް ގެ ސަބަބުން އީ-ސަރވިސްގެ ޚިދުމަތްތައް ބޭނުންކުރައްވާ ކޮންމެ ފަރާތަކަށް ވަކި "ޑިޖިޓަލް އައި.ޑީ"އެއް ލިބިގެންދާނެއެވެ. އަދި ކޮންމެ ސިސްޓަމަކަށް ވަކި ވަކި ޔޫސަރ އައި.ޑީ އެއް ގެންގުޅުއްވުމުގެ ބަލުގައި ކޮންމެ ރައްޔިތަކަށްވެސް "އީ-ފާސް" ބޭނުންކުރައްވައިގެން އީ-ގަވަރމަންޓް ނިޒާމުގެ ދަށުން ފޯރުކޮށްދެވޭ ކޮންމެ ޚިދުމަތެއްވެސް ބޭނުންކުރުމުގެ މަގުފަހި ވެގެންދާނެއެވެ. މީގެ އިތުރުން "އީ-ފާސް" ސަބަބުން ސިސްޓަމްތަކުގެ ސެކިއުރިޓީ ހަރުދަނާވެ މަޢުލޫމާތުގެ ރައްކާތެރިކަން ކަށަވަރުވެގެންދާނެއެވެ.
ރައިސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ 100 ދުވަހުގެ ވައުދުގެ ގޮތުގައި މިނިސްޓްރީ އަށް ހަވާލުކުރެވުނު އައިލެންޑްސް ޑޮޓް އެމްވީ ވެސް ވަނީ ހަދާފައެވެ. މި ވެބްސައިޓުގެ ޒަރިއްޔާއިން ރާއްޖޭގެ ހުރިހާ ރަށެއްގެ މައުލޫމާތު އެއް ތަނަކުން ބަލާލެވޭނެއެވެ.
މީގެ އިތުރުން، މިނިސްޓްރީއިން ވަނީ ގަވް ޑޮޓް އެމް ވީ ވެސް އިތުރަށް ހަރުދަނާކޮށްފައެވެ. މިއީ ސަރުކާރުގެ އޮފީސްތަކުގެ ވެބްސައިޓްތައް އެއް މިންގަނޑެއްގައި ހިފެހެއްޓި އަދި މައުލޫމާތު ފަސޭހައިން ލިބޭނެ ގޮތްހެދުމަށްޓަކައި އުފައްދާފައިވާ ވެބްސައިޓެކެވެ. ފްލެޓަށް އެދެން ކިއުގައި ޖެހެން ނުޖެހޭ ނިޒާމެއް ޤާއިމްކުރުމަށްޓަކައި މައުލޫމާތު ހުށަހެޅޭނެ ޕޯޓަލްއެއް ވެސް މިނިސްޓްރީއިން ވަނީ ގާއިމުކޮށްފައެވެ.
މީގެ އިތުރުން ސިއްހީ ހިދުމަތްދޭ ހުރިހާތަނެއް އެއް ވިއުގައަކުން ގުޅާލުންމަށްޓަކައި މިނިސްޓްރީ އޮފް ހެލްތުން އެދިލައްވާފައިވާ ގޮތަށް ހުރިހާ ސިއްޚީ ޚިދުމަތްދޭ ތަންތަން ގުޅާލުމުގެ އިތުރުން "ހަފްތާރެސް އެޕް" ޑިވެލޮޕްކޮށް މިނިސްޓްރީއިން ވަނީ ޔޫތް މިނިސްޓްރީއާއި ހަވާލުކޮށްފައެވެ.
21 ވަނަ ގަރުނަކީ ޓެކްނޮލޮޖީގެ ގަރުނަށް ވާއިރު ދިވެހި ރާއްޖެ ޓެކްނޮލޮޖީއާި އެއްވަރަށް ތަރައްގީ ނުވާ ކަމަކީ ގިނަ ބަޔަކު ގަބޫލު ކުރާ ހަގީގަތެކެވެ. ނަމަވެސް މިނިސްޓްރީގެ މަސައްކަތުން މިކަންކަން ހައްލުކުރުމަށް ހަރުދަނާ ބިންގަލެއް އެޅިފައިވާ ކަން ފާހަގަކޮށްލަން ޖެހެއެވެ. ކޮމިޔުނިކޭޝަން، ސައިންސް އެންޑް ޓެކްނޮލޮޖީއިން ކުރަމުންދާ މި މަސައްކަތަށް ބީ ޕްލަސްއެއް ޙައްގެވެ.
