ސުޕްރީމް ކޯޓުގެ ޑިރެކްޓަރ އާތިކާއާމެދު ފިޔަވަޅުއެޅުމުން އުއްތަމަ ފަނޑިޔާރު ކަންބޮޑުވެވަޑައިގަންނަވައިފި

ތަހުގީގުކުރަމުން އަންނަ މައްސަލަތަކަކާއި ގުޅިގެން ސުޕްރީމް ކޯޓުގެ ޑިރެކްޓަރު އާތިކާ އިބްރާހިމް ސަސްޕެންޑް ކުރުމުން ސުޕްރީމް ކޯޓުގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ކަންބޮޑުވުން ފާޅު ކުރައްވާ ބަޔާނެއް ނެރުއްވައިފި އެވެ.

އާތިކާ ސަސްޕެންޑްކޮށްފައިވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން، އަންގާރަ ދުވަހު އެވެ. އާތިކާ ސަސްޕެންޑް ކޮށްފައިވާއިރު، އުއްތަމަ ފަނޑިޔާރާއެކު، އެ ކޯޓުގެ ހަތަރު ފަނޑިޔާރެއްގެ 51 މައްސަލައެއް ޖުޑީޝަލް ސަރވިސް ކޮމިޝަން (ޖޭއެސްސީ) ދަނީ ތަހުގީގު ކުރަމުން ނެވެ. އޭގެ ތެރޭގައި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއާ ގުޅޭ 18 މައްސަލައެއް ހިމެނެ އެވެ.

Advertisement

އެނގިފައިވާ ގޮތުގައި އާތިކާއަކީ ކުރިން އުއްތަމަ ފަނޑިޔާރުގެ ޕާސަނަލް އެސިސްޓަންޓް (ޕީއޭ)ގެ މަގާމުގައި ވެސް ހުންނެވި ބޭފުޅެކެވެ.

ޑީޖޭއޭއިން އާތިކާ ވަޒީފާއަށް ނުކުތުން ވަގުތީ ގޮތުން މަނާ ކޮށްފައިވާކަމަށް ސުޕްރީމް ކޯޓުގެ އުއްތަމަ ފަނޑިޔާރަށް ސިޓީއަކުން އަންގާފައިވާ އެންގުމާއި ގުޅިގެން، ދިވެހި ރައްޔިތުންނަށް ކަމުގެ ހަގީގަތް ހާމަކޮށް އެރުވުމުގެ ގޮތުން އުއްތަމަ ފަނޑިޔާރު ނެރުއްވާފައިވާ ބަޔާނުގައި ވަނީ ޝަރުއީ ދާއިރާގެ މުވައްޒަފުންގެ ޤަވާއިދު 2011 އަށް ހަވާލާ ދެއްވައި، މައިގަނޑު ގޮތެއްގައި ވިދާޅުވެފައިވަނީ، މުވައްޒަފަކާ ގުޅޭ އިދާރީ މައްސަލައެއް، އެއީ މުވައްޒަފަކު ޝަރުއީ ދާއިރާގެ މުވައްޒަފުންގެ ގަވާއިދާ ޚިލާފުވުމުގެ މައްސަލައެއް ވިޔަސް، އަދި މުވައްޒަފަކު ހުށަހަޅާ ޝަކުވާގެ މައްސަލައެއް ވިޔަސް، ޑީޖޭއޭއަށް ބެލޭނީ، އެމައްސަލައެއް އެންމެ ފުރަތަމަ އެމުވައްޒަފު ވަޒީފާ އަދާކުރާ ކޯޓުގެ ނުވަތަ އިދާރާގެ މުވައްޒަފުންނާ ބެހޭ އިސް ވެރިޔާ ނުވަތަ އޭނާ ކަނޑައަޅާ ފަރާތަކުން އެކަން ބެލުމަށްފަހު ކަމާއި، އަޅަންޖެހޭ އިސްލާހީ ފިޔަވަޅުވެސް އެންމެ ފުރަތަމަ އަޅާނީ ވެސް އެ މުވައްޒަފަކު ވަޒީފާ އަދާކުރާ ކޯޓުގެ ނުވަތަ އިދާރާގެ މުވައްޒަފުންނާބެހޭ އިސްވެރިޔާ ނުވަތަ އޭނާ އެކަމަށް ކަނޑައަޅާފައިވާ ފަރާތުން ކަމަށެވެ.

މީގެއިތުރުން، މުވައްޒަފަކާ ގުޅޭގޮތުން ބެލެމުންދާ މައްސަލައެއްގައި، އެ މުވައްޒަފަކު ވަޒީފާއަށް ނުކުތުން މަނާ ކުރުމުގެ އިޚްތިޔާރު ޑީޖޭއޭއިން ބޭނުން ކުރަންވާނީ ކޯޓުގެ ނުވަތަ އިދާރާގެ މަޝްވަރާއާއެކު ކަމުގައި ވެސް، ޝަރުއީ ދާއިރާގެ މުވައްޒަފުންގެ ގަވާއިދާ ހަވާލާ ދެއްވައި އުއްތަމަ ފަނޑިޔާރުގެ ބަޔާނުގައި ވެއެވެ.

ބަޔާން ނިންމާލައްވަމުން އުއްތަމަ ފަނޑިޔާރު ވިދާޅުވެފައި ވަނީ، ސުޕްރީމް ކޯޓުގެ އެއްވެސް މުވައްޒަފަކާ މެދު، ގާނޫނާއި ގަވާއިދުގެ ބޭރުން، އަނިޔާވެރި، އަދި ބޭއިންސާފު ގޮތެއްގައި ޣައިރު ޤާނޫނީ ފިޔަވަޅުތައް އެޅުމުގެ ފުރުސަތު ނުދޭނެ ވާހަކަޔާއި، އެއްވެސް ކޯޓަކުން ވެސް އެފަދަ ފުރުސަތެއް ނުދެއްވާނެކަމުގެ ޔާގީންކަން އޮތް ވާހަކަ ވެސް މިފުރުސަތުގައި ދަންނަވާ ކަމަށެވެ.