ޔޫވީގެ ކޯޗުކަމާ މުހައްމަދު އާދަމް ހަވާލުވެއްޖެ

ޔުނައިޓެޑް ވިކްޓްރީ (ޔޫވީ) ގެ ކޯޗުކަމާ ވިކްޓްރީ ސްޕޯޓްސް ކްލަބްގެ ކުރީގެ ކޯޗު މުހައްމަދު އާދަމް ހަވާލުވެއްޖެއެވެ.

ޔޫވީގެ ކޯޗުކަމުގެ މަގާމު ހުސްވީ އެ މަގާމުގައި ހުރި މުހައްމަދު ނަޒީހު އަމިއްލައަށް ވަކިވުމުންނެވެ. އޭނާ މަގާމުން ދުރުވީ އެންމެ ފަހުން ވިކްޓްރީއާ ދެކޮޅަށް ޔޫވީ ކުޅެން އޮތް މެޗަށްފަހުއެވެ.

ވިކްޓްރީގެ ކޯޗުކަމުން މުހައްމަދު އާދަމް ވަކިވީ އެ ކްލަބުގެ ހާލަތު ގޯސްވެ، އިތުރަށް ކުރިޔަށް ދިޔުމަށް އެއްވެސް މަގެއް ފެންނަން ނެތުމުންނެވެ. އޭނާ ކްލަބުގެ ކޯޗުކަމުން ވަކިވި ފަހުން ވިކްޓްރީ ކުޅެން ޖެހޭ ތިން މެޗަށްވެސް ޓީމު ހަމަވެފައެއް ނުވެއެވެ.

ލެގޫންސާއި ވިކްޓަރީއަށް މީގެ ކުރިން ކުޅެފައިވާ މުހައްމަދު އާދަމް ވަނީ އެފްއޭއެމްގެ މާކެޓިން ޑިޕާޓްމަންޓް ހިންގަވައި އަދި އެ އެސޯސިއޭޝަނުގެ އެކްޓިން ޖެނެރަލް ސެކްރެޓަރީގެ މަގާމް ވެސް ފުރުއްވައިފަ އެވެ.

ބާސްކެޓްބޯޅަ އެސޯސިއޭޝަނުގައި ވެސް މީގެ ކުރިން މަސައްކަތްކޮށްފައިވާ މުހައްމަދު އާދަމް ވަނީ ވޮލީބޯލް އެސޯސިއޭޝަނުގެ ޖެނެރަލް ސެކްރެޓަރީއެއްގެ ގޮތުގައި ވެސް މަސައްކަތް ކޮށްފަ އެވެ.

އޭއެފްސީ އޭ ލައިސަންސް ކޯޗު މުހައްމަދު އާދަމް ވަނީ ސްރީލަންކާގެ ބައެއް ޓީމުތަކަށްވެސް ކޯޗުކަން ކޮށްދީފައެވެ. އެގޮތުން އޭނާ ވަނީ ސްރީލަންކާގެ ޕްރިމިއާ ލީގު ކްލަބެއް ކަމަށްވާ ޖާވާ ލޭން ސްޕޯޓްސް ކްލަބަށް ވެސް ކޯޗުކޮށްދީފަ އެވެ.