ޕާކިސްތާން އިންޓަނޭޝަނަލް ސީރީސް: ދެ އިވެންޓުން ރާއްޖޭގެ ދެ ޕެއާ ފައިނަލަށް
ފައިނަލުގެ މެޗުތައް ކުރިޔަށް ދާނީ މާދަމާ
ރާއްޖެއިން މުބާރާތުގައި ބައިވެރިވި ބައެއް ކުޅުންތެރިން
ޕާކިސްތާނުގައި މިހާރު ކުރިޔަށްދާ ޕާކިސްތާން އިންޓަނޭޝަނަލް ސީރީސް ބެޑްމިންޓަން މުބާރާތުގައި ހޮނިހިރު ދުވަހު ކުޅުނު ސެމީ ފައިނަލް މެޗުތަކުން މޮޅުވެ، ރާއްޖޭގެ އަންހެން ޑަބަލްސް އަދި މިކްސް ޑަބަލްސް ޕެއާ ފައިނަލަށް ދަތުރުކޮށްފިއެވެ.
ރާއްޖޭގެ އަންހެން ޑަބަލްސް ޕެއާ އަކީ ދެ ބެއިން ކަމަށްވާ އައިމިނަތު ނަބީހާ އާއި ފާތިމަތު ނަބާހާ އެވެ. އަދި މިކްސް ޑަބަލްސް ޕެއާ އަކީ ޒަޔާން ޒަކީ އާއި ނަބާހާ އެވެ.
އަންހެން ޑަބަލްސް އިވެންޓުން ރާއްޖޭގެ ނަބީހާ އާއި ނަބާހާގެ ޕެއާ ފައިނަލުން ފުރުސަތު ހޯދީ ސެމީގައި ސެހެރާ އަކުރަމް އާއި ހުމާ ޖަވީދުގެ ޕެއާ އަތުން ސީދާ ދެ ސެޓުން މޮޅުވެގެންނެވެ. މެޗުގެ ސެޓުތަށް ނަބާހާ އާއި ނަބީހާގެ ޕެއާއިން ކާމިޔާބުކުރީ 21-16، 21-12 އިންނެވެ. ފައިނަލުގައި ރާއްޖޭގެ ޕެއާއިން ވާދަކުރަންޖެހޭނީ ޕާކިސްތާނުގެ ބުޝްރާ ގައްޔޫމާއި މަހޫރު ޝަހުޒާދުގެ ޕެއާ އާއެވެ.
މިކްސް ޑަބަލްސް ބައިން ރާއްޖޭގެ ޒަޔާން އާއި ނަބާހާގެ ޕެއާ ސެމީގައި ޕާކިސްތާނުގެ ޕެއާ ބަލިކޮށްފައިވަނީ ސީދާ ދެސެޓުންނެވެ. މި މެޗުގެ ސެޓުތަށް ރާއްޖޭގެ ޕެއާއިން ކާމިޔާބުކުރީ 21-14 އަދި 21-13 އިންނެވެ. ފައިނަލުގައި ޒަޔާން އާއި ނަބާހާ ނިކުންނަން ޖެހޭނީ މި މުބާރާތުގައި އެއްވަނަ އަށް ސީޑު ކޮށްފައިވާ ޕެއާ ނޭޕާލުގެ ދިޕޭޝް އާއި އަމީތާގެ ޕެއާ އާއި ދެކޮޅަށެވެ.
ރާއްޖޭގެ ގައުމީ ބެޑްމިންޓަން ޓީމުން އަންނަނީ ރާއްޖެއިން ބޭރުގައި ބާއްވާ އިންޓަނޭޝަނަލް ބެޑްމިންޓަން މުބާރާތް ތަކުގައި ވާދަކޮށް ކާމިޔާބު ހޯދަމުންނެވެ.
