ޢިއްޒުއްދީން ސްކޫލްގެ ނަމުގައި މާލޭގައި ސްކޫލެއް ހުޅުވަނީ
ސްކޫލް ހުޅުވާނީ އަންނަ އަހަރު
މާލޭގެ ސްކޫލެއް
މާލޭ ސިޓީގެ ސްކޫލްތަކަށް ދިމާވެފައިވާ ޖާގައިގެ ދަތިކަން ޙައްލުކުރަމަށްޓަކައި ޢިއްޒުއްދީން ސްކޫލްގެ ނަމުގައި މާލޭގައި ސްކޫލެއް ހުޅުވަން ނިންމައިފިއެވެ.
މިނިސްޓްރީ އޮފް އެޑިއުކޭޝަނުން ނެރުނު ބަޔާނެއްގައި ބުނެފައިވަނީ އެ ސްކޫލް ހުޅުވަނީ އަންނަ އަހަރުގައި ކަމަށެވެ. އަދި އެ ސްކޫލް ހިންގުމަށް ހަމަޖެހިފައިވަނީ މާލެ އިންގްލިޝް ސްކޫލް (އެމްއީއެސް) ހިންގި ޢިމާރާތުގައި ކަމަށް ވެސް އެ ބަޔާނުގައި ބުނެފައިވެއެވެ.
ޢިއްޒުއްދީން ސްކޫލްގައި ގްރޭޑް ދިހަ އަކާއި ހަމަޔަށް ކިޔަވައިދޭން ނިންމާފައިވާ ނަމަވެސް އަންނަ އަހަރު އެ ސްކޫލްގައި ކިޔަވައިދޭނީ ގްރޭޑް ހަޔަކާއި ހަމައަށެވެ. އެއީ ގްރޭޑް އެކަކުން ހަތަރަކަށް ކޮންމެ ގްރޭޑެއްގައި ތިން ކްލާސް އަދި ގްރޭޑް ފަހެއް އަދި ހައެއްގެ ކޮންމެ ގްރޭޑް އެއްގެ ދެ ކްލާހެވެ.
ކްލާހެއްގައި 25 ކުދިންގެ ޖާގަ ހުންނައިރު 2021 ވަނަ އަހަރު ގްރޭޑް ހަތަކުން ފެށިގެން ދިހަ އަކަށް ކިޔަވައިދޭން ފަށާނެކަމަށް އެޑިއުކޭޝަން މިނިސްޓްރީން ބުނެއެވެ.
އެޑިއުކޭޝަނުން ނެރުނު ބަޔާނުގައި ބުނެފައިވަނީ ޢިއްޒުއްދީން ސްކޫލަށް ދަރިވަރުން ވެއްދުމުގައި ޢަމަލުކުރާނީ މާލޭ އެހެން ސްކޫލްތަކަށްވެސް ކުދިން ވެއްދުމުގައި ޢަމަލުކުރާ އުޞޫލަށް ކަމަށެވެ. އަދި ގްރޭޑް ދެ އަކުން ފެށިގެން ގްރޭޑް ހަޔަކަށް ކުދިން ވައްދަން ބޭނުންވާނަމަ މިނިސްޓްރީއަށް ސިޓީ ހުށަހެޅުމަށް އެ ބަޔާނުގައި ބުނެފައިވެއެވެ. ދަރިވަރުން ވެއްދުމުގައި ސިޓީ ހުށަހަޅާ ތަރުތީބަށް އިސްކަން ދޭނެ ކަމަށް އެ ބަޔާނުގައި ބުނެފައިވާކަން ފާހަގަކޮށްލެވެއެވެ.
