ތުހްމަތުތަކުގައި އެއްވެސް އަސްލެއް ހަގީގަތެއް ނެތް: މަސީހް

ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލައިގައި ބަޔާންކޮށްފައިވާ ވާހަކަތަކަކީ އެެއްވެސް އަސްލެއް ހަގީގަތެއް ނެތް ވާހަކަތަކެއް ކަމަށް، އެ މަނިކުފާނު ވިދާޅުވެއްޖެ އެވެ.

މިހާރު ހިނގަމުންދާ ރައްޔިތުން މަޖިލީހުގެ ޖަލްސާގައި އިތުބާރު ނެތްކަމުގެ މައްސަލައަށް ޖަވާބުދާރީވަމުން، މަސީހު ވިދާޅުވީ އެ މަނިކުފާނުގެ އިތުބާރު ނެތްކަމުގެ މައްސަލައިގައި ފާހަގަކޮށްފައިވާ ހަތް ނުކުތާއަކީ އެއްވެސް ހަގީގަތެއް ނެތް ވާހަކަތަކެއް ކަމަށެވެ.

ހުށަހަޅާފައިވާ އިތުބާރު ނެތްކަމުގެ މައްސަލަ މެމްބަރަކު ކިޔުއްވާފައިވާ ކަމަށް ވެސް ގަބޫލް ނުކުރައްވާ ކަމަށް ވެސް މަސީހު ވިދާޅުވި އެވެ.

"މި ބަޔާން ހުރިހާ މެމްބަރުން ކިޔުއްވާފައި އޮތްހެން ވެސް ހިއެއް ނުވޭ. މިއީ އިޖުރާއީ ގޮތުން ބޭރުކޮށްލެވޭ ގޮތަށް ހުށަހަޅާފައިވާ މައްސަލައެއް،" އެ މަނިކުފާނު ވިދާޅުވި އެވެ.

މަސީހު ވިދާޅުވީ އެޖެންޑާކުރަން ބިލްތައް ހުރި ނަމަވެސް ޖަލްސާ ނުބާއްވާ ކަމަށް އިތުބާރު ނެތްކަމުގެ މައްސަލައިގައި ބުނެފައި ވިޔަސް، އެފަދަ ހާލަތެއްގައި ބިލެއް ނެތް ކަމަށެވެ.

"އެއީ ހަގީގަތާ ހިލާފު ވާހަކަތަކެއް،" އެ މަނިކުފާނު ވިދާޅުވި އެވެ.

"މަޖިލީހު ޖަލްސާއެއް އެޖެންޑާކޮށްގެން ކުރަން ހުރި މަސައްކަތް ހުރި ނެތް މިންވަރު އެނގޭނެ. މަޖިލިސް ހަލުއިކުރުމުގެ މަސައްކަތާއި މަސްއޫލިއްޔަތު ހަވާލުކޮށްފައި ވަނީ މަޖިލީހުގެ ކޮމިޓީތަކަށް. އެ މަސައްކަތް ހަލުއިކުރަން މަސައްކަތް ކުރަން."

މަޖިލީހުގެ ކޮމިޓީގައި މިހާރު އޮތީ އެންމެ ހަ ބިލް ކަމަށް މަސީހް ވިދާޅުވި އެވެ.

ސަރުކާރު ޖަވާބުދާރީކުރަން ކޮމިޓީތަކަށް މައްސަލަ ފޮނުވޭ ކަމަށާއި ކޮމިޓީތަކަށް ބޭފުޅުން ހާޒިރުކޮށްގެން ކުރިއަށް ގެންދިއުމަކީ އެ ކޮމިޓީއެއްގެ ޒިންމާއެއް ކަމަށާއި މަޖިލީހުން ނިންމަންޖެހޭ ކަންކަން ނިންމަމުން ދެވޭ ކަމަށް މަސީހު ވިދާޅުވި އެވެ.

"އެހެންވެ އެއީ ވެސް ހަގީގަތާ ހިލާފު ކަމެއް،" އެ މަނިކުފާނު ވިދާޅުވި އެވެ.

މަޖިލީހުގައި މިހާތަނަށް 52 މެމްބަރުންނާ ސުވާލު ކުރެވިފައިވާ ކަމަށް ވެސް މަސީހު ވިދާޅުވި އެވެ.

އެ މަނިކުފާނު ވިދާޅުވީ ހުށަހަޅާ ބިލާއި ގަރާރުތައް މެމްބަރުންނަށް އިސްލާހު ހުށަހެޅުމަށް އެެެއްވެސް ހުރަހެއް މަޖިލީހުގެ ރިޔާސަތުން ކުރިމަތިކޮށްފައި ނުވާނެ ކަަމަށާއި ކަންކަމަކަށް ބަހުސް ކުރުމުގެ އުސޫލް މަޖިލީހުގެ ގަވާއިދުގައި ކަނޑައަޅާފައިވާ ކަމަށެވެ.

"އެކަމުގައި މަޖިލީހުގެ ރިޔާސަތުގެ ދައުރެއް ނޯވޭ. އެހެންވެ، މިއީ އަސްލެއް ނެތް ވާހަކަތަކެއް،" އެ މަނިކުފާނު ވިދާޅުވި އެވެ.

ވަކި ބާވަތެއްގެ ބިލްތައް އެއީ ސަރުކާރުން ހުށަހަޅަންޖެހޭ ބިލްތަކެއް ކަމުގައި ހަމަޖައްސާފައިވަނީ މަޖިލީހުގެ ގަވައިދުގައި އެގޮތަށް ބަޔާންކޮށްފައިވާ ކަަމަށާއި ސަރުކާރުން ހުށަހަޅާ ބިލްތަކާއި މަޖިލީހުގެ މެމްބަރުންނަށް ބިލް ހުށަހެޅުމުގެ ފުރުސަތު އޮތްއިރު، ބިލެއް ހުށަހެޅުމުގެ ފުރުސަތު، އަދި ބަހުސްގައި ބައިވެރިވުމުގެ ފުރުސަތެއް އެ މަނިކުފާނަށް ނޯންނަ ކަމަަށް މަސީހު ވިދާޅުވި އެވެ.

"މަޖިލީހުގެ ރައީސަކީ ހަމަޖެހިފައިވާ އުސޫލާއި ގަވާއިދާ، މަޖިލީހުގެ އަޣުލަބިއްޔަތުން ކަންކަން ކުރުން. އެގޮތަށް ނިންމާ ކަމެއް ބަދަލުކުރުމުގެ ފުރުސަތު މަޖިލީހުގެ ރައީސަށް ލިބިގެނެއް ނުވޭ،" އެ މަނިކުފާނު ވިދާޅުވި އެވެ.

މަސީހު ވިދާޅުވީ، މިއަދާ ހަމައަށް ވެސް މަޖިލީހުގެ ރިޔާސަތު ބަލަހައްޓަމުން ގެންދެވީ މަޖިލީހުގެ ހުރުމަތާއި ގަދަރު އަދި މަޖިލީހުގެ މެމްބަރުން އިމްތިޔާޒު ހިފެހެއްޓޭ ގޮތަށް ކަމަށެވެ. މިހާތަނަށް މަސައްކަތް ކުރަމުން ގެންދެވީ މަޖިލީހުގެ މެމްބަރުންގެ އަހެއްގެ ގޮތުން، ކުރަން ޖެހުނު އެއްވެސް ކަމެއްގައި ފަސް ޖެހުމެއް ނެތި ކަމަށް ވެސް އެ މަނިކުފާނު ވިދާޅުވި އެވެ.