ރިސޯޓު މުއައްޒަފުންނަށް ވަޒީފާ އަދާކުރުމަށްފަހު ރަށަށް ދެވޭ އުސޫލު މިއަންނަ އަހަރުގެ މެއި މަހުގެ ކުރިން ތަންފީޒު ކުރާނީ
2 ނޮވެމްބަރު 2019 | ހޮނިހިރު 08:35މަޝްވަރާތައް ކުރުމަށް މަޓީއަށް ދައުވަތުދީފައި
ޓޫރިޒަމް މިނިސްޓަރު އަލީ ވަހީދު
ރިސޯޓު މުއައްޒަފުންނަށް ވަޒީފާ އަދާކުރުމަށްފަހު ރަށަށް ދެވޭ އުސޫލު މިއަންނަ އަހަރުގެ މެއި މަހުގެ ކުރިން ތަންފީޒު ކުރާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓަރު އަލީ ވަހީދު ޑަބްލިއުޓީއެމްއަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި ބޭއްވި ނޫސްވެރިންގެ ބައްދަލުވުމުގައި ވިދާޅުވީ ރިސޯޓު މުއައްޒަފުންނަށް ވަޒީފާ އަދާކުރުމަށްފަހު ދިރިއުޅޭ އަމިއްލަ ރަށަށް ދެވޭ ގޮތް ހެދުމުގެ މަސައްކަތް ކުރަމުން އަންނަ ކަމަށާއި، މިމަޝްވަރާތައް ކުރުމަށް މިހާރު މަޓީއަށް ދައުވަތު ދީފައިވާ ކަމަށެވެ.
މިނިސްޓަރު އަލީ ވަހީދު ވިދާޅުވީ މަސައްކަތް ކުރަނީ މިއަންނަ އަހަރު ކުރީކޮޅު މީގެ އުސޫލެއް ނުވަތަ ގަވާއިދެއް ގެންނަން ކަމަށާއި، ރަށްރަށުގެ ކައިރީގައި ހުންނަ ރިސޯޓުތަކުގައި ވަކި ދުރުމިނެއް ހުންނަ ނަމަ ފެރީ ލާޒިމް ކުރަން ކަމަށެވެ. މިބަދަލާއެކު ރިސޯޓުގައި ވަޒީފާއަދާ ކުރުމަށްފަހު އެމުއައްޒަފުންނަށް ރަށަށް އާއިލާ ގާތަށް ދެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު އަލީ ވަހީދު ވިދާޅުވީ ފަތުރުވެރިކަމުގެ ސިނާއަތުގައި ސަރުކާރަށް ރައްޔިތުންނަށް ދެވޭނެ އެންމެ ބޮޑު ހަދިޔާއަކީ މިއީ ކަމަށެވެ. ރިސޯޓު މުއައްޒަފުންނަށް ވަޒީފާ އަދާކުރުމަށްފަހު ރަށަށް ދެވޭ ގޮތް ހެދުމަކީ ރައީސް އިބްރާހިމް މުހައްމަދު ސޯލިހު ރިޔާސީ ވައުދެކެވެ.
