ގަވާއިދާ ހިލާފަށް ރުއްގަސް ގެންދާނަމަ ފިޔަވަޅު އެޅުމުގެ މަސައްކަތް ކުރާނަން: އަލީ ވަހީދު
1 ނޮވެމްބަރު 2019 | ހުކުރު 07:19އީޕީއޭއަށް ފުރިހަމަ އެއްބާރުލުން ދޭނަން
ޓޫރިޒަމް މިނިސްޓަރު އަލީ ވަހީދު
ތަރައްގީ ކުރާ ރިސޯޓުތަކަށް ގާނޫނާއި ގަވާއިދާ ހިލާފަށް ރުއްގަސް އެތެރެކުރާކަމުގެ ރިޕޯޓު ލިބިއްޖެނަމަ ފިޔަވަޅު އެޅުމުގެ އެންމެހައި މަސައްކަތްތައް ޓޫރިޒަމް މިނިސްޓްރީން ކުރާނެ ކަމަށް މިނިސްޓަރު އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓަރު އަލީ ވަހީދު ޑަބްލިއުޓީއެމްއަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ވިދާޅުވީ، ގަވާއިދާ ހިލާފަށް އެއްރަށުން އަނެއް ރަށަށް ރުއްގަސް ގެންދިއުމަކީ ސަޕޯޓު ކުރާ ކަމެއް ނޫން ކަމަށާއި، ގާނޫނާ ހިލާފަށް މިކަން ކުރާ ނަމަ ހަރުކަށި ފިޔަވަޅު އަޅަންޖެހޭ ކަމަށެވެ. އަދި މެންޑޭޓްގައި ހިމެނޭ ކަމަކަށްނުވާތީ މިމައްސަލައަށް ފިޔަވަޅު އެޅުމުގެ ބާރު ޓޫރިޒަމް މިނިސްޓްރީއަށް ލިބިފައިނެތް ނަމަވެސް އީޕީއޭއަށް ފުރިހަމަ ބާރު ލިބިފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އަލީ ވަހީދު ވިދާޅުވީ ގަވާއިދާ ހިލާފަށް އެއްރަށުން އަނެއްރަށަށް ރުއްގަސް ގެންދާކަމުގެ ރިޕޯޓުގެ މިނިސްޓްރީއަށް ލިބުމުން ވެސް އެއީ ހިނގާކަމެއްތޯ ބެލުމަށްފަހު، އެމައްސަލަ އީޕީއޭއަށް ހުށަހަޅައި، ފިޔަވަޅު އެޅުމަށް ބާރުއަޅައި އެހުރިހާ މަސައްކަތެއް ކުރާނެ ކަމަށެވެ. މިފަދަ މައްސަލަތަކުގައި އީޕީއޭއަށް ލިބެންޖެހޭ ފުރިހަމަ އެއްބާރުލުން މިނިސްޓްރީގެ ފަރާތުން ދޭނެ ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު އަލީ ވަހީދު ވިދާޅުވީ މިސަރުކާރުން ރަށެއް ވިޔަސް ފަޅެއް ވިޔަސް ތަރައްގީ ކުރުމުގައި އެންމެ ޓޮޕް ޕްރައޯރިޓީއަކީ ރާއްޖޭގެ ތިމާވެށި ހިމާޔަތްކުރުން ކަމަށާއި، އެރަށެއްގެ ގުދުރަތީ އަސާސްތައް ނުގެއްލޭ ގޮތަށް އެރަށެއްގައި ކުޅިއެއް އިންކަމުގައި ވިޔަސް މަސައްކަތް ކުރާނީ ގުދުރަތީ މުހިންމުކަން ހުރި ހުރިހާ ކަމެއް ހިމާޔަތްވާ ގޮތަށް ކަމަށެވެ. އަދި އެނޫން ގޮތަކަށް މިސަރުކާރުން ފަތުރުވެރިކަން ކުރިއަށް ނުގެންދާނެ ކަމަށް މިނިސްޓަރު އަލީ ވަހީދު ވިދާޅުވިއެވެ.
ސަރުކާރުން އަލަށް ޓޫރިޒަމްއަށް ނެރޭ ރަށްތަކަށް އަލިއަޅުއްވާލައްވާ މިނިސްޓަރު އަލީ ވަހީދު ވިދާޅުވީ މިހާރު ރަށްތައް ކަނޑައަޅާ ނިމިފައިވާ ކަމަށާއި، މިމަހު އެއީ ކޮން ރަށްތަކެއްކަން އިއުލާން ކުރާނެ ކަމަށެވެ. އަދި އެއަށްފަހު ރަށްތައް ތަރައްގީ ކުރުމަށް ބިޑިން ޕްރޮސެސްއާ މިހުރިހާ ކަމެއް ހާމަކުރަމުންދާނެ ކަމަށް މިނިސްޓަރު ވިދާޅުވިއެވެ.
