ރާއްޖޭގެ އިޝްތިހާރެއް ފުރަތަމަ ފަހަރަށް ޔޫރަޕުް ކްލަބެއްގެ ޖޯޒީގައި ޖަހަނީ
1 ނޮވެމްބަރު 2019 | ހުކުރު 02:35މުޅި އެއްބަސްވުމުގެ އަގަކީ 2.9 މިލިއަން ޑޮލަރު
ޓޫރިޒަމް މިނިސްޓަރު އަލީ ވަހީދު
ފަތުރުވެރިކަން އިޝްތިހާރު ކުރުމަށް ރާއްޖޭގެ އިޝްތިހާރެއް ފުރަތަމަ ފަހަރަށް ޔޫރަޕުގެ ބޮޑު ކްލަބެއްގެ ޖޯޒީގައި ޖަހަން ނިންމައިފިއެވެ.
ޓޫރިޒަމް މިނިސްޓަރު އަލީ ވަހީދު ޑަބްލިއުޓީއެމަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނަށް މައުލޫމާތު ދެއްވަމުން ވިދާޅުވީ ރާއްޖެއަކީ ފަތުރުވެރިކަމުގެ މަންޒިލެއްގެ ގޮތުގައި ބްރޭންޑް ކުރުމަށް ކުރަންޖެހޭ މަސައްކަތްތަކާއި، އެންމެހާ އުސޫލުތައް ކަނޑައެޅުމަށް ރައީސުލްޖުމްހޫރިއްޔާ ޓޫރިޒަމް މިނިސްޓްރީއާ ހަވާލުކޮށްފައިވާ ކަމަށެވެ.
އެ ސިޔާސަތުގެ ދަށުން ރާއްޖޭގެ ފަތުރުވެރިކަން ޑައިވާސިފައި ކުރަން ކުރަމުންދާ މަސައްކަތުގެ ތެރެއިން ރާއްޖޭގެ އިޝްތިހާރު ޖަހަނީ ސްޕެނިޝް ލީގުގެ ސެލްޓަ ވިގޯގެ ޖޯޒީ އާއި ސްޓޭޑިއަމް އަދި އެ ޓީމުގެ ޕްރެކްޓިސް ކިޓުގައި ކަމަށެވެ. އަދި އިޝްތިހާރުގައި ބޭނުން ކުރާނީ "ވިޒިޓް މޯލްޑިވްސް" ލޯގޯ ކަމަށެވެ. މީގެ އިތުރުން މިނިސްޓަރު އަލީ ވަހީދު ވިދާޅުވި ބާސެލޯނާއާ ދެކޮޅަށް ސެލްޓަވީގޯ އަންނަ މަހުގެ 11 ވަނަ ދުވަހު ކުޅޭ މެޗުގައި ސެލްޓަ ވީގޯ ނިކުންނާނީ ރާއްޖޭގެ އިޝްތިހާރު ޖަހާފައިވާ ޖޯޒީގަ ކަމަށެވެ.
މިނިސްޓަރު އަލީ ވަހީދު ވިދާޅުވީ މި ޕެކޭޖަށް އަހަރަކު ނުވަލައްކަ ނުވަ ދިހަ ހަ ހާސް ޑޮލަރު ދައްކަން ޖެހޭ ކަމަށެވެ. އަދި މުޅި އެއްބަސްވުމުގެ އަގަކީ 2.9 މިލިއަން ޑޮލަރު ކަމަށް މިނިސްޓަރު ވިދާޅުވިއެވެ.
މި އިޝްތިހާރުތައް ތިން އަހަރު ދުވަހަށް ކުރިއަށްގެންދާނެއެވެ. އަދި މިކަމުގެ ސަބަބުން އަންނަ ފަތުރުވެރިންގެ އަދަދު އިތުރުވާނެ ކަމަށް މިނިސްޓަރު ވިދާޅުވިއެވެ.
ލަލީގާގެ 18 ވަނައާއެކު ރެލިގޭޝަން ޒޯނުގައި އޮތް ސެލްޓަވީގޯއާއެކު އެއްބަސްވުމުގައި ސޮއިކުރުން އޮންނާނީ ނޮވެމްބަރު ހަތަރު ވަނަ ދުވަހު ބާއްވާ ބައިނަލްއަގުވާމީ ނިއުސް ކޮންފަރެންސެއްގައެވެ.
