ހުޅުވައިގެން ބަލައި ފާސްކުރާ ތަކެތީގައި މޯލްޑިވްސް ކަސްޓަމްސް ސަރވިސްގެ ސްޓިކަރ ޖަހަން ފަށައިފިއެވެ.
ކަސްޓަމްސް އިން ނެރުނު ބަޔާނެއްގައި ބުނެފައިވަނީ މާދަމާ(01 ނޮވެމްބަރ 2019) އިން ފެށިގެން ޕޯސްޓް އަދި ކޫރިއަރ ސަރވިސް މެދުވެރިކޮށް ގެންނަ ތަކެތީގެ ތެރެއިން ލޯކަލް ކޫރިއަރ އެޖެންޓުގެ ޙާޟިރުގައި (މުދަލުގެ ވެރިފަރާތް ނުވަތަ ވެރިފަރާތް ތަމްސީލުކުރާނެ ފަރާތެއް ޙާޒިރުވެނެތި) ޕާރުސަލް ނުވަތަ ޕެކޭޖް ހުޅުވައިގެން ބަލައިފާސްކުރާ ހާލަތުގައި ކަސްޓަމްސްއިން ޗެކްކޮށް ނިމުމުން އެތަކެތީގައި ކަސްޓަމްސްގެ ޚާއްސަ ޓެމްޕަރ އެވިޑެންޓް ސްޓިކަރ އެއް ޖަހާގޮތަށް ހަމަޖައްސާފައިވާ ކަމަށެވެ.
މި ސްޓިކަރ ޖަހާނީ އެ ޕާރުސަލެއް ނުވަތަ އައިޓަމެއް ޗެކްކޮށް ނިމި ލޯކަލް ކޫރިއަރ އެޖެންޓު އެ ޕެކޭޖް ބަންދުކުރުމުން، އެ ޕެކޭޖް ބަންދުކުރި ޓޭޕް މަތީގައި ހުރަސްވާ ގޮތަށް ކަމަށާއި މި ސްޓިކަރގައި، ޕެކޭޖް ހުޅުވި ތާރީޚާއި، ގަޑި ނޯޓުކޮށް ކަސްޓަމްސްގެ އިޖުރާޢަތްތައް ފުރިހަމަކުރިކަން އެނގޭނެ ގޮތަށް ކަސްޓަމްސްއިން ސޮއި ކުރާނެ ކަަމަށް ކަސްޓަމްސް އިން ބުންޏެވެ.
އަދި ކަސްޓަމްސްއިން ބަލާފާސްކުރިކަން ދޭހަވާ ގޮތަށް، އެއްވެސް އެހެން ފަރާތަކުން ކަސްޓަމްސްގެ ނަން ބޭނުންކޮށްގެން، މުދަލުގެ ބޭރުގައި ޓޭޕްއަޅާ، އިސްޓިކާފަދަ ތަކެތި ހަރުކޮށް ހެދުމަކީ މަނާ ކަމެއް ކަަމަށާއި އެހެންކަމުން އެއްވެސް ފަރާތަކުން އެކަން އެގޮތަށް ނުކުރުމަށް ކަސްޓަމްސް އިން ވަނީ އިލްތިމާސްކޮށްފައެވެ.
