ޓޫރިޒަމް ދާއިރާގައި އަންހެނުންގެ ހިއްސާ އިތުރުކުރުމަށް ދަނީ މަސައްކަތް ކުރަމުން: ޔުމްނާ
31 އޮކްޓޯބަރު 2019 | ބުރާސްފަތި 02:19މިންތީގެ ހަމަހަމަކަން ގާއިމްކުރަންޖެހޭ
ޖެންޑަރ މިނިސްޓްރީގެ ޑެޕިއުޓީ މިނިސްޓަރު ފާތުމަތު ޔުމްނާ
ޓޫރިޒަމް ދާއިރާގައި އަންހެނުންގެ ހިއްސާ އިތުރުކޮށް އިގްތިސާދީ ގޮތުން ބާރުވެރިކޮށް ކުރުމަށް މަސައްކަތް ކުރަމުންދާ ކަމަށް ޖެންޑަރ މިނިސްޓްރީގެ ޑެޕިއުޓީ މިނިސްޓަރު ފާތުމަތު ޔުމްނާ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޔުމްނާ ވިދާޅުވީ ރައީސް އިބްރާހިމް މުހައްމަދު ސޯލިހުގެ މިވެރިކަމުގައި މިންތީގެ ހަމަހަމަކަން ގާއިމްކުރުމަށް ވަރަށް ގިނަ މަސައްކަތްތައް ކުރާ ކަމަށާއި، މިންތީގެ ހަމަހަމަކަން ގާއިމް ނުކުރެވެނީ އާންމުންގެ ވިސްނުން ބަދަލުކޮށްގެން ކަމަށެވެ. ޔުމްނާ ވިދާޅުވީ ގާނޫނުގައި ވަރަށް ގިނަކަންކަން ލާޒިމްކުރާއިރު، މިންތީގެ ހަމަހަމަކަން ގާއިމް ނުކުރެވެނީ ގާނޫނު ނެތިގެން ނޫން ކަމަށެވެ.
ޔުމްނާ ވިދާޅުވީ މިންތީގެ ހަމަހަމަކަން ގާއިމްކޮށް، ތަންފީޒު ކުރެވޭނެ ގޮތެއް ހޯދުމަށް ޕަބްލިކް ކުންފުނިތަކާއި، ވަކިވަކިން އަންހެން މުއައްޒަފުންނާ ބައްދަލުކޮށް މަޝްވަރާކޮށްފައިވާ ކަމަށެވެ. ގާނޫނީ ގޮތުން ހުރި ދަތިތަކާއި، ދިމާވާ ގޮންޖެހުންތައް އޮޅުންފިލުވާފައިވާ ކަމަށް އޭނާ ވިދާޅުވިއެވެ.
އެގޮތުން ވަޒީފާގެ ކުރިއެރުމަށް ހުރި ގޮންޖެހުންތަކާއި، ވަޒީފާގެ މާހައުލު ރަނގަޅު ނުވުމާއި، ޖިންސީ ފުރައްސާރަ ކުރުމުގެ ތަފާތު މައްސަލަތައް އަންހެން މުއައްޒަފުން ހިއްސާފައިވާ ކަމަށް ޔުމްނާ ވިދާޅުވިއެވެ.
މީގެ އިތުރުން ޔުމްނާ ވިދާޅުވީ ކަންކަން ނިންމާ ފެންވަރުގައި އަންހެނުންގެ ހިއްސާ އިތުރުކުރުމަށް ވެސް ތަފާތު ގިނަ މަސައްކަތްތައް ކުރާ ކަމަށާއި، މަދު ދާއިރާތަކުގައި ވަކި އަދަދެއް ކަނޑައެޅުމަށްފަހު އަންހެނުންނަށް ވަޒީފާއިން ފުރުސަތު ދޭންޖެހޭ ގޮތަށް އުސޫލު ކަނޑައެޅުން މުހިންމު ކަމަށެވެ. ޔުމްނާ ވިދާޅުވީ އެންމެ ބޮޑު މާކެޓްއޮތް ޓޫރިޒަމް ދާއިރާގައި އަންހެނުން މަސައްކަތް ކުރަނީ ވަރަށް މަދުން ކަމަށެވެ.
އަދި ޓޫރިޒަމްގެ ދާއިރާގައި މަސައްކަތުގައި އުޅޭ އަންހެނުންގެ ޕަސެންޓަކީ 07 ކަމަށާއި، އޭގެތެރެއިން 02 ޕަސެންޓަކީ ދިވެހި އަންހެނުންކަން އޭނާ ފާހަގަކުރެއްވިއެވެ.
ޔުމްނާ ވިދާޅުވީ އަންހެނުން އިގްތިސާދީ ގޮތުން ބާރުވެރިކޮށް ޓޫރިޒަމް ދާއިރާގައި އަންހެނުންގެ ހިއްސާ އިތުރު ކުރުމުގެ ގޮތުން ބ.އަތޮޅު ރީޖަންއަކަށް ނެގުމަށްފަހު، ޓޫރިޒަމް މިނިސްޓްރީ، އިކޮނޮމިކް މިނިސްޓްރީއާ ގުޅިގެން މުހިންމު މަސައްކަތްތަކެއް ކުރަމުން އަންނަ ކަމަށެވެ. އަދި މިދާއިރާގައި އަންހެނުން އިތުރުކުރުމާ ބެހޭ ގޮތުން މުހިންމު މަޝްވަރާތަކެއް ކުރިއަށް ގެންދެވުނު ކަމަށް ޔުމްނާ ވިދާޅުވިއެވެ.
ސްޓްރެޖެޓިކް އެކްޝަން ޕްލޭންއަށް އަލިއަޅުއްވާލައްވާ ޔުމްނާ ވިދާޅުވީ ޖެންޑަރ މިނިސްޓްރީގެ މެންޑިޑޭޓްގައި ހުރިކަންކަން ތަންފީޒު ކުރެވޭނެ ކަމަށާއި ރައްޔިތުންނާ ގުޅިގެން މަސައްކަތްތައް ކުރިއަށް ގެންދިއުމުން ނަތީޖާ ފެންނާނެ ކަމަށެވެ. މިޕްލޭންގެ ދަށުން ފުދުންތެރި އާއިލާތަކެއް މުޖުތަމައުގައި ބިނާވެގެންދިއުމާއި، އަނިޔާ ލިބޭ ފަރާތްތަކަށް އިންސާފު ހޯދައިދިނުމަށް ކަށަވަރުކުރެވިގެންދިއުން ހިމެނޭ ކަމަށެވެ. އަދި މިއީ ގައުމުގެ ހަގީގީ ތަރައްގީ ކަމަށް އޭނާ ޔުމްނާ ވިދާޅުވިއެވެ.
