ރާއްޖޭގެ އުތުރުގެ ސަރަހައްދުގައި އުފެދިފައިވާ ކޮޅިގަނޑު އިތުރަށް ބާރުގަދަވެ "ޑީޕް ޑިޕްރެޝަން" އަކަށް ބަދަލުވެފައިވާތީ، އެންމެހާ ފަރާތްތަކުންވެސް މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުން އިލްތިމާސްކޮށްފިއެވެ.

ރާއްޖޭގެ އެންމެ އުތުރުން ފެށިގެން ލާމު އަތޮޅާ ހަމައަށް، މިރޭގެ 1000 ފެށިގެން ގޮސް 0300 ޖެހުމާ ހަމައަށް މެޓް އޮފީހުން ވަނީ ޔެލޯ އެލަރޓެއްވެސް ނެރެފައެވެ. އަދި މޫސުން ލަފާކުރާ ގޮތުގައި ބޯކޮށް ވާރޭ ވެހުމާއެކު ގުގުރާނެއެވެ. އަދި ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށް މެޓް އޮފީހުން ލަފާކުރެއެވެ.

މޫސުން ގޯސްވާ ވަގުތު ބައެއް ސަރަހައްދުތަކަށް އުދަ އެރުމުގެ ފުރުސަތު އެބައޮތް ކަމަށާއި، ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް މެޓް އޮފީހުން ކުރިއަށް އޮތް 24 ގަޑިއިރު މޫސުން ލަފާކުރާ ގޮތުގައި ވެއެވެ.

ވިލާގަނޑު އިތުރަށް ބާރުގަދަވެ، ތޫފާނަކަށް ބަދަލުވުމުގެ ކުރިން، ރާއްޖެއާ ދުރަށް ޖެހެމުންދާނެ ކަމަށް މެޓް އޮފީހުން ބުނެފައިވެއެވެ. އަދި އިންޑިއާގެ ކޯސްޓް ގާޑުން ކުރި ޓްވީޓެއްގައި ވެސް ވަނީ ކުރިއަށް އޮތް 12 ގަޑިއިރުގެ ތެރޭގައި ތޫފާނަކަށް ބަދަލުވާނެކަމަށް ލަފާކުރެވޭތީ، އެ ސަރަހައްދުގައި ހަރަކާތްތެރިވާ މަސްވެރިން ސަމާލުވަމަށް އިލްތިމާސްކޮށްފައެވެ.