ބައެއް މެމްބަރުންނަށް އެ މިލިއަން ޑޮލަރު ދީގެންވެސް އެ މެމްބަރުގެ ވޯޓް ހޯދުމަށް މަސައްކަތް ކުރަމުންދާ ކަމުގެ ވާހަކަތައް ދަނީ ފެތުރެމުން
އެމްޑީޕީގެ ޗެއާރޕާސަން ހަސަން ލަތީފް
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅިފައިވަނިކޮށް، މަޖިލީހުގެ ބައެއް މެމްބަރުން ކޮޅު ބަދަލުކުރުމަށާއި ހައްޔަރު ކުރުމުގެ ނިޔަތުގައި ފާހަގައެއް ޖަހާފައިވާ ޑޮލަރުތަކެއް ދޭކަމުގެ މައުލޫމާތު ލިބެމުންދާކަމަށް އެމްޑީޕީގެ ޗެއާރޕާސަން ހަސަން ލަތީފް ވިދާޅުވެއްޖެއެވެ.
ހަސަން ލަތީފް ކުރެއްވި ޓްވީޓެއްގައި ވިދާލުވެފައިވަނީ ފާހަގަ ޖަހާފައިހުރި ޑޮލަރު ތަކެއް މަޖިލިސް މެމްބަރުންނަށް ދިނުމަށްފަހު އެ މެމްބަރުން ހިފާ ހައްޔަރު ކުރުމަށް ބަޔަކު ރާވާކަމުގެ އަޑުތައް އިވެމުންދާ ކަމަށެވެ. އަދި އެކަމަށް މަޖިލީސް މެމްބަރުން ސަމާލުކަން ދިނުމަށްވެސް ހަސަން ލަތީފް ވަނީ އެދިލައްވާފައެވެ.
ހަސަން ލަތީފް އެގޮތަށް ވިދާޅުވިއިރު، "ރާއްޖެއެމްވީ"އަށްވެސް ވަނީ އެފަދަ މައުލޫމާތެއް ލިބިފައެވެ. އެގޮތުން މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރައްވާފައިވާ ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕްގެ މެމްބަރަކަށް އެއް މިލިއަން ޑޮލަރު ދިނުމަށް ރައްޔިތުންގެ މަޖިލީހުގެ ކުރީގެ މެމްބަރަކު ވަޑައިގެން ހުށަހެޅުމެއް ހުށަހަޅުއްވާފައިވާ ކަމުގެ މައުލޫމާތު ވަނީ ލިބިފައެވެ.
މީގެއިތުރުން ސޯޝަލް މީޑިއާގައިވެސް މިދަފަ ރިޝްވަތުގެ ވާހަކަތައް ފެތުރެމުންދާއިރު، ސަރުކާރަށް ނިސްބަތްވާ އިސް މެމްބަރުންތަކެއް ވަނީ ބުދަ ދުވަހުގެ ރޭ ސްރީލަންކާއަށް ވަޑައިގެންފައެވެ. އަދި މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރައްވާފައިވާ ސަރުކާރަށް ނިސްބަތްވާ ބައެއް މެމްބަރުންވެސް މިވަގުތު ތިއްބެވީ ރާއްޖެއިން ބޭރުގައެވެ.
