ކޮޅިގަނޑުގައި މާލޭގެ ގެއެއްގެ ފުރާޅަށް ބޮޑެތި ގެއްލުންތަކެއް ވެއްޖެ

މިހާރު މާލެއަށް ކުރަމުންދާ ވިއްސާރައިގައި ހ.ސޯސަން ނީޑްގޭ ފުރާޅުމައްޗަށް ޖެހިގެން ހުރި އިމާރާތުން ގަލާއި ކުނި ފައިބާ އެގޭގެ ފުރާޅު ހަލާކުވެއްޖެއެވެ.

އެމްއެންޑީއެފުން ބުނީ، މިހާދިސާގެ މަޢުލޫމާތު ލިބުނީ އާދިއްތަ ދުވަހުގެރޭ 18:37 ހާއިރު ކަމަށާއި، މައުލޫމާތު ލިބުމާއިއެކު، ފަޔަރ އެންޑް ރެސްކިއު ސަރވިސް ވަގުތުން އެސަރަހަށްދަށް ގޮސް އެހީތެރިކަން ފޯރުކޮށްދިންކަމަށެވެ.

ހ.ސޯސަންނީޑް ގޭގެ ފުރާޅުމައްޗަށް ފައިބާފައިވަނީ ޖެހިގެން ހުރި ހ.ސޯސަން ފްލާވާ ގޭގެ އިމާރާތުގައި ހުރި ކުނިތަކާއި ގަލެވެ. ހ.ސޯސަން ފްލާވާ ގެއަކީ ކުރިން އަލިފާނުގެ ހާދިސާއެއް ހިނގާފައިވާ އަދި އެހާދިސާއަށްފަހު ސާފުނުކޮށްހުރި ގެއެކެވެ.

މިހާދިސާއާއި ގުޅިގެން އެމްއެންޑީއެފް ފަޔަރ އެންޑް ރެސްކިއު ސަރވިސްގެ ސިފައިން ހ.ސޯސަން ފްލާވާ ގެއަށް ގޮސް އެގެ ސާފުކޮށް ނިންމާލާފައި ވަނީ މިރޭ 21:00 ހާއިރުއެވެ.

މިހާދިސާގައި އެއްވެސް މީހަކަށް ގެއްލުމެއް ލިބިފައި ނުވި ނަމަވެސް މިހާދިސާގައި ހ.ސޯސަންނީޑް ގޭގެ ފުރާޅުގެ ފޫ ގޮސް ފެންފައިބާ އެގޭގައި ގެންގުޅޭ ބައެއް އިލެކްޓްރޯނިކް ތަކެއްޗަށްވަނީ އެކިވަރުގެ ގެއްލުންތައް ލިބިފައިކަމަށް އެމްއެންޑީއެފުން މައުލޫމާތުދެއެވެ.