ކުރިޔަށް އޮތް 48 ގަޑިއިރު މޫސުން ގޯސްވާނެ، މޫސުމަށް ސަމާލުވާން އަންގައިފި
29 އޮކްޓޯބަރު 2019 | އަންގާރަ 08:19ހއ އަތޮޅުން ފެށިގެން ލ އަތޮޅާ ދެމެދަށް ވަނީ ޔެލޯ އެލަރޓް ނެރެފައި
ކަނޑުގަދަވެ މޫސުން ގޯސްވުން
ކުރިޔަށް އޮތް 48 ގަޑިއިރު ތެރޭގައި ރާއްޖޭގެ ބޮޑުބަޔަކަށް ވިއްސާރަ ކުރާނެތީވެ މޫސުމަށް ސަމާލުވުމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް) އިން އިލްތިމާސްކޮށްފި އެވެ.
މެޓް އޮފީހުން ބުނީ ބޯކޮށް ވާރޭވެހި ވަޔާއި ކަނޑުގަދަވެ ބައެއް ރަށްތަކަށް އުދައިގެ އަސަރު ކުރާނެކަމަށް ލަފާކުރެވޭތީ މޫސުމަށް ސަމާލުވުމަށް އެދޭ ކަމަށެވެ. އެގޮތުން މިއަދު މެންދުރު 1230 އިން ހަވީރު 4 އާ ހަމައަށް އުތުރާއި މެދުރާއްޖެ ތެރެއާއި ދެކުނުގެ އަތޮޅުތަކަށް އުދަ އެރުމުގެ ފުރުސަތު އޮތް ކަމަށް މެޓް އޮފީހުން ބުނެއެވެ.
އަދި ހއ އަތޮޅުން ފެށިގެން ލ އަތޮޅާއި ހަމައަށް ބޯކޮށް ވާރޭވެހުމާއެކު ގުގުރާނެކަމަށް ލަފާކޮށް މިއަދުގެ 11 އިން ފެށިގެން 3 ޖެހުމާ ހަމައަށް އެސަރަހައްދުތަކަށް ވަނީ ޔެލޯ އެލަރޓް ނެރެފައެވެ. މެޓް އޮފީހުން ބުނީ ވިލާ ގަނޑުގައި ގަޑިއަކު 40 މޭލަށް ވައިގަދަވާނެ ކަމަށެވެ.
މެޓް އޮފީހުން ބުނީ ރާއްޖެއަަށް މިހާރު ކުރަމުންދާ ވިއްސާރައަކީ ސްރީލަންކާ އާއި ރާއްޖެއާ ދެމެދު އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައެއް ކަމަށެވެ. އަދި މިކޮޅި ގަނޑު ކުރިޔަށްއޮތް 24 ގަޑީރު އިތުރަށް ބާރުގަދަވެ ރާއްޖެއާއި ކައިރިން ހުޅަނގުއުތުރަށް ދަތުރުކޮށް ޢަރަބި ކަނޑަށް ޖެހުމަށްދާނެކަމަށެވެ. މިކޮޅިގަނޑާ ގުޅިގެން ރާއްޖޭގެ ބޮޑުބަޔަކަށް ވިއްސާރަކުރުމާއެކު ގުގުރާނެކަމަށް މެޓް އޮފީހުން ބުނެއެވެ.
އަދި އުތުރާއި މެދު ތެރޭގެ ބައެއް ރަށްތަކަށް ބޯކޮށް ވާރޭވެހި، ވައިގަދަވާނެ ކަމަށްވެސް ލަފާކޮށްފައިވެ އެވެ.
