މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޚިޔާނާތުގެ މައްސަލާގައި ގުރައިދޫ ދާއިރާގެ މެމްބަރު ޣައްސާން މައުމޫން ފުލުހަށް ހާޒިރުކޮށް ސުވާލުކޮށްފި އެވެ.
ޣައްސާން މައުމޫން ފުލުހަށް ހާޒިރުކޮށްފައިވަނީ ހޯމަ ދުވަހުގެރޭގެ 21:30 ހާއިރު އެވެ.
ފުލުހުންގެ އިދާރާގެ ބޭރުގައި ހުންނަވާ ރާއްޖެޓީވީއަށް މައުލޫމާތުދެއްވަމުން ޣައްސާން މައުމޫން ވިދާޅުވީ، ފުލުހަށް ހާޒިރުކުރެވުނީ ސިޔާސީ މަޝްރަހުގައި މިހާރު ހިންގާ ކަންކަމުގެ ވާހަކަތައް އަނބުރާލުމުގެ ގޮތުން ކުރެވޭ މަސައްކަތެއްގެ ދަށުންކަމަށް ގަބޫފުޅުކުރައްވާކަމަށެވެ. އަދި ރައްޔިތުންނަށް ގަބޫލުނުކުރެވޭފަދަ އެއްވެސްކަމެއް ކުރައްވާފައިނުވާނެކަމުގެ ޔަޤީންކަން ދެއްވާކަމަށް ޣައްސާން މައުމޫން ވިދާޅުވި އެވެ.
މިފުރުސަތުގަ އަޅުގަނޑު ދިވެހި ރައްޔިތުންނަށް ޔަގީންކޮށް އަރުވަން ބޭނުން އަޅުގަނޑުގެ ފަރާތުން އިރާދަކުރެއްވިއްޔާ އެބޭފުޅުން ހިތްޕުޅުހަމަނުޖެހޭ ކަހަލަ އެއްވެސް އަމަލެއް ނުފެންނާނެ.
ޣައްސާން މައުމޫން ފުލުހަށް ހާޒިރުކޮށްފައިވާއިރު، އެމްްއެމްޕީއާރުސީގެ ހިޔާނާތުގައި މިހާރުގެ މަޖިލީހުގެ 16 މެމްބަރެއް ހިމެނޭކަމަށް ފުލުހުން ވަނީ ހާމަކޮށްފަ އެވެ. އަދި އެމްއެމްޕީއާރުސީގެ ނަގުދު ފައިސާ ލިބުނު ފަރާތްތައްވެސް ހާމަވަމުން އަންނަކަމަށާއި، މައުލޫމާތުތައް ލިބޭ މިންވަރަކުން ތަހުޤީޤް އިތުރަށް ކުރިއަށްގެންދާނެކަމަށް ފުލުހުން ބުންފައިވެއެވެ.
ޣައްސާނަކީ ރައީސް މައުމޫންގެ ބޭފުޅުންގެ ތެރެއިން، ރައީސް އަބްދުﷲ ޔާމީނާ އެންމެ ގާތްގުޅުމެއް ބޭއްވެވި ދަރިކަލުންނެވެ. ރައީސް މައުމޫން ޖަލަށްލެވުނުއިރުވެސް ޣައްސާން ހުންނެވީ ރައީސް ޔާމީން އަރިހުގަ އެވެ.
