ސިޔާސީ ހުޅު ރޯކުރާ ދަރަކަށް ދީން ހެދުމަށް އެއްވެސް ބަޔަކަށް ފުރުޞަތު ނުދެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ދީނީ ޢިލްމުވެރިންގެ އަރިހުން އެދިވަޑައިގެންފިއެވެ.
ހޯމަ ދުވަހުގެރޭ އޮތް ޤައުމީ ދުވަހުގެ ޚާއްޞަ ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ އިސްލާމް ދީނުގައި އޮންނަ ގޮތަކީ، އެކަކު އަނެކަކަށް ރަނގަޅު ގޮތް ވިސްނައިދީގެން އޮޅުންފިލުވައި ދީގެން މައްސަލަތައް ޙައްލުކުރުން ކަމަށާއި، އެކަމަށް ޤާބިލު ޢިލްމުވެރިން ރާއްޖޭގައި އެބަތިބި ކަމަށެވެ.
ރާއްޖޭގައި އިސްލާމް ދީނަށާއި ރަސޫލާއަށް ފުރައްސާރަކޮށް ވާހަކަދެއްކުމުގެ ފުރުޞަތު ސަރުކާރުން ނުދޭނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދިވެހި ރައްޔިތުންނަށް އަރުވާފައެވެ. އަދި އިސްލާމް ދީނުގެ ނަމުގައި ހަރުކަށި ވިސްނުމަށް ވެސް ފުރުޞަތު ނުދެއްވާނެ ކަމަށްވެސް ރައީސް ޞާލިޙް ވިދާޅުވިއެވެ.
ރައީސް ޞާލިޙްގެ ވާހަކަފުޅުގައި ވަނީ މިހާރު އިދިކޮޅުގައި ތިބި ފަރާތްތަކުން ދީނުގެ ނަމުގައި ހިންގާ ޙަރަކާތްތަކަށް ވަރަށް ބޮޑަށް ފާޑުވިދާޅުވެފައެވެ. މިހާރު ފެންމަތިވެގެން މިއުޅޭ މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) ގެ ރިޕޯޓަށް އިޝާރާތްކުރައްވާ ރައީސް ޞާލިިޙް ވިދާޅުވީ އެ ރިޕޯޓް ނެރުނު އިރު ވެރިކަމުގައި ތިއްބެވި ބޭފުޅުން، އަކަމަށް ފިޔަވަޅު ނާޅާ ތިބެ، މިހާރު ފިޔަވަޅު އެޅުމަށް ގޮވާލުމުން، އެފަރާތަކުގެ ނިޔަތާއި އިޚްލާސްތެރިކަމާމެދު ސުވާލު އުފެދޭ ކަމަށެވެ.
ރައީސް ޞާލިޙް ވިދާޅުވީ ކުރީ ސަރުކާރުން އެކަންކަމާމެދު ފިޔަވަޅު ނޭޅި ނަމަވެސް، މި ސަރުކާރުން އިސްލާމް ދީނުގެ ދިފާޢުގައްޔާއި ދީނުގެ ނަމުގައި ހިންގާ ހަރުކަށި ޢަމަލުތައް ހުއްޓުވުމަށް ކުރަން ޖެހުނު ކޮންމެ ކަމެއް ކުރާނެ ކަމަށެވެ.
ޚިޔާލު ފާޅުކުރުމުގެ މިނިވަންކަމަށް އަލިއަޅުވާލައްވާ ރައީސުލްޖުމްހޫރިއްޔާ ވިދާޅުވީ، ޤާނޫނު ޢަސާސީ ތަންދޭ މިންވަރަކުން ޚިޔާލު ފާޅުކުރުމުގެ މިނިވަންކަން އެންމެހާ ރައްޔިތުންނަށް އެބައޮތް ކަމަށާއި، މި ސަރުކާރުން ދުވަހަކުވެސް އެ މިނިވަންކަމަށް ހުރަސް ނާޅާނެ ކަމަށެވެ.
ރައީސްގެ ވާހަކަފުޅުގައި އެމްޑީއެންގެ މައްސަލައަށް އިޝާރާތްކުރައްވާ ވާހަކަފުޅު ދައްކަވާފައިވަނީ، އެމްޑީއެންއަށް ފިޔަވަޅު އެޅުން ލަަސްކަމަށާއި، މި ސަރުކާރުގެ ތެރޭގައި އެމްޑީއެންގެ ނުފޫޒު އެބައޮތް ކަމަށް ބުނެ އިދިކޮޅު ފަރާތްތަކުން އަޑުއުފުލަމުން އަންނަ ދަނޑިވަޅެއްގައެވެ. ނަމަވެސް، ސަރުކާރުގެ ކަމާއިބެހޭ ހުރިހާ މުއައްސަސާތަކުން ދަނީ މި މައްސަލަ ތަހުޤީގުކުރުމަށް ފަހު، އަޅަންޖެހޭ ހުރިހާ ފިޔަވަޅެއް އަޅާނެކަމަށް ތަކުރާރުކޮށް ބުނަމުންނެވެ.
