މި ހަފްތާ ނިމުމުގެ ކުރިން ބަޖެޓު ހުށަހަޅާނެ: އަމީރު
27 އޮކްޓޯބަރު 2019 | އާދީއްތަ 10:53މާލިއްޔަތު ގާނޫނުގެ 32 ވަނަ މާއްދާގެ (ހ) ގައި ބަޔާން ކުރާ ގޮތުން ދައުލަތުގެ ބަޖެޓު އެންމެ ލަސްވެގެން 1 މަސްދުވަސްކުރިން މަޖިލީހަށް ހުށަހަޅަންޖެހޭ
ފިނޭންސް މިނިސްޓަރ އިބްރާހިމް އަމީރު
މި ހަފްތާ ނިމުމުގެ ކުރިން 2020 ވަނަ އަހަރުގެ ބަޖެޓު ހުށަހަޅާނެ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އަމީރު ވިދާޅުވީ ފަހަރުގައި އޮކްޓޯބަރު މަހުގެ 31 ގައި ނުވަތަ 30 ގައި ވެސް ހުށަހަޅަން ޖެހިދާނެ ކަމަށާއި އަދި ވަކި ތާރީހެއް ކަނޑައެޅިފައި ނުވާ ކަމަށެވެ.
މާލިއްޔަތު ގާނޫނުގެ 32 ވަނަ މާއްދާގެ (ހ) ގައި ބަޔާން ކުރާ ގޮތުން ރައްޔިތުންގެ މަޖިލީހަށް ހުށަހެޅުމަށްޓަކައި ކޮންމެ މާލީ އަހަރަކަށް އެކުލަވާލެވޭ އެ އަހަރުގެ ދައުލަތުގެ ބަޖެޓު، މިނިސްޓަރު ތައްޔާރުކޮށް، ބަޖެޓު އެކުލަވާލެވޭ މާލީ އަހަރު ފެށުމުގެ އެންމެ ލަސްވެގެން 1 މަސްދުވަސްކުރިން ރައްޔިތުންގެ މަޖިލީހަށް ހުށަހަޅަންވާނެކަމަށެވެ
އަދި ބަޖެޓު ހުށަހަޅާއިރު، އެބަޖެޓުގައި މާލީ އަހަރަކަށް ދައުލަތުން ހިނގާނެކަމަށް ލަފާކުރި ޚަރަދާއި، ދައުލަތަށް ލިބޭނެ ކަމަށް ލަފާކުރާ އެއްޗެއްގެ ހިސާބާއި، އަދި ވޭތުވެދިޔަ މާލީ އަހަރު ދައުލަތުން ހިނގި ޚަރަދާއި، ދައުލަތަށް ލިބުނު އެއްޗެއްގެ ހިސާބުގެ އިތުރުން އެ ބަޖެޓުގައި ވަކި ސުރުޚީތަކެއްގެ ދަށުން ފާހަގަކޮށް ބަޔާން ކުރަންވާނެކަމަށް އެ މާއްދާގެ (ށ)ގައި ވެއެވެ.
އަމީރު ވިދާޅުވީ ގާނޫނުގައި ކަނޑައަޅާފައިވާ ތާރީހުގެ ކުރިން ރައްޔިތުންގެ މަޖިލީހަށް ބަޖެޓު ހުށަހަޅާނެ ކަމަށެވެ.
