ޝަހިންދާ އާއި އަޒްރާ ޗިޓާއި ހަވާލުވެއްޖެ
24 އޮކްޓޯބަރު 2019 | ބުރާސްފަތި 17:3214 ދުވަހުގެ މުއްދަތު ވަނީ ދީފައި
ޑރ. އަޒްރާ އާއި ޝަހިންދާ
މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) އިން ދީނަށް ހަޖޫޖަހައި، ލިޔެފައިވާ ރިޕޯޓާއި ގުޅިގެން އެ ރިޕޯޓު ލިޔުމުގައި އަމަލީ ގޮތުން ބައިވެރިވި ދެ މީހުން ކަމަށްވާ އެ ޖަމްއިއްޔާގެ ބާނީ ޝަހިންދާ އިސްމާއިލް އާއި ޑރ. އަޒްރާ ނަސީމް ފުލުހަށް ހާޒިރުވާން ޗިޓު ފޮނުވާފައިވާ ކަމަށް ފުލުހުން ބުނެފިއެވެ.
ފުލުހުން ބުނީ, އެ ދެމީހުންނަށްވެސް ޗިޓް ފޮނުވާފައިވާފައިވާ ކަމަށާއި، އެމީހުންގެ ފަރާތުން ފުރިހަމަ އެއްބާރުލުން ލިބެމުން އަންނަ ކަމަށެވެ. ފުލުހުންގެ އިދާރާ އަށް ހާޒިރުވާން ޑރ. އަޒްރާ އަށާއި ޝަހިންދާ އަށް 14 ދުވަހުގެ މުއްދަތެއް ފުލުހުން ވަނީ ދީފައެވެ.
ފުލުހުން ވަނީ އެ ރިޕޯޓް އިތުރަށް ދިރާސާކުރުމަށް ދީނީ ތިން އިލްމުވެރިންގެ ލަފާހޯދަމުންދާ ކަމަށް ބުނެފައެވެ. މައުލޫމާތު ލިބިފައިވާ ގޮތުން އެ ރިޕޯޓު ފެންމަތިވުމުގެ ރާއްޖެ ދޫކޮށް ދިޔުމަށްފަހު ޝަހިންދާ ދިރިއުޅުއްވަމުން ގެންދަވަނީ ޖަރުމަނުގައެވެ. އަދި ޑރ. އަޒްރާ މިހާރު އުޅުއްވަމުން ގެންދަވަނީ އަޔަލޭންޑްގައެެވެ.
''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' އެމްޑީއެނުން ނެރެފައިވާ ރިޕޯޓް އާއްމުވެ އާއްމުންގެ ގިނަ ބައެއްގެ ފާޑުކިޔުން އަމާޒުވުން ޔޫތް މިނިސްޓްރީން ވަނީ އެ ޖަމްއިއްޔާ ވަގުތީ ގޮތުން ސަސްޕެންޑް ކޮށްފައެވެ. އެކަމަކު އެ ޖަމްއިއްޔާ ސަސްޕެންޑް ކުރުމުކުން ނުނިމޭނެ ކަމަށާއި، އެ ރިޕޯޓު ލިޔުމުގައި ބައިވެރިވި ފަރާތްތަކާއި މެދު ފިޔަވަޅު އެޅުމަށް އިދިކޮޅުން ދަނީ ބުނަމުންނެވެ.
