ރާއްޖޭގެ ރަށްތަކާއި ފަޅުތައް ވިއްކައިގެން ދައުލަތަށް ހިޔާނަތްވެރިވި ފައިސާ ސިޔާސީ ޕާޓީތަކުގެ ޕްރައިމަރީއަށް ހަރަދުކޮށްފައިވާ ކަމަށާއި، އެ ފައިސާ ލިބުނު މީހުންގެ ތެރޭގައި ރައްޔިތުންގެ މަޖިލީހުގެ 16 މެމްބަރަކު ހިމެނޭ ކަމަށް ފުލުހުން ބުނެފިއެވެ.

މޯލްޑިވްސް މާކެޓިން އެންޑް ޕަބްލިކްރިލޭޝަންސް (އެމްއެމްޕީއާރްސީ) މެދުވެރިކޮށް ހިންގާފައިވާ ހިޔާނާތުގެ ތަހުގީގުގެ އެންމެ ފަހުގެ މައުލޫމާތު މީޑިއާތަކަށް ހިއްސާކުރުމަށް ފުލުހުންނާއި، އޭސީސީ އަދި އެސެޓްރިކަވަރީ ކޮމިޝަން ގުޅިގެން ވަނީ ބުރާސްފަތި ދުވަހު ޕްރެސްކޮންފަރެންސެއް ބާއްވާފައެވެ.

އެ ޕްރެސްކޮންފަރެންސް ގައި ވާހަކަ ދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، މި އަހަރު ތަހުގީގު ފެށިއިރު ކުރިން ތަހުގީގަށް ނުލިބޭ މައުލޫމާތުތައް ލިބިފައިވާ ކަމަށެވެ. ތަހުގީގަށް ލިބިފައިވާ މައުލޫމާތުގެ އަލީގައި ހިޔާނާތުގެ ފައިސާ ހޭދަކުރިކަންތައްތައް ދެނެގަނެވިފައިވާ ކަމަށް ރިޔާޒު ވިދާޅުވިއެވެ.

ރިޔާޒު ވިދާޅުވި ގޮތުގައި، ފައިސާ ނެގުމުގެ އަމަލުތައް ހިންގަން ފެށީ 2014 ވަނަ އަަހަރުގެ ރައްޔިތުންގެ މަޖިލީހުގެ އިންތިހާބާ ހިސާބުންނެވެ. އޭރު ބޭއްވި އިންތިހާބުގެ ޕްރައިމަރީ ކާމިޔާބު ކުރި ފަރާތްތަކަށާއި، މަޖިލީހުގެ ރައީސް އަކު ހޮވުމުގެ އިތުރުން އެއް ސިޔާސީ ޕާޓީން އަނެއް ސިޔާސީ ޕާޓީއަށް ބަދަލުވުމަށްވެސް ހިޔާނާތުގެ ފައިސާ ހަރަދުކުރެވިފައިވާ ކަަމަށް ވިދާޅުވިއެވެ.

އޭސީޕީ ވިދާޅުވީ، 18 ވަނަ ރައްޔިތުންގެ މަޖިލީހުގެ 44 މެމްބަރުންނަށާއި، މިހާރު ހިނގަމުންދާ 19 ވަނަ މަޖިލީހުގެ 16 މެމްބަރަކަށް ފައިސާ ލިބުނު ކަމުގެ ހެއްކާއި ގަރީނާ ލިބިފައިވާ ކަމަށެވެ.

ފުލުހުން ބުނީ، އެ ހުރިހާ ފަރާތްތަކަކީ ހިޔާނާތުގެ ބައިވެރިން ކަމުގައި ބުނަން އަދި މާ އަވަސް ކަމަށާއި، އެ ފަރާތްތަކަށް އެ ފައިސާއާ ހަވާލުވީ އެމްއެމްޕީއާރްސީގެ ފައިސާކަން އެނގިތިބެގެން ގެންތޯ ނުވަތަ ނޫންތޯ ބަލައި ހޯދަން ޖެހޭ ކަމަށެވެ.