އެމްޑީއެން އުވާލައި، އެ ޖަމިއްޔާގެ މެންބަރުންނަށް ފިޔަވަޅު އެޅުމަށް ގޮވާލާ އިދިކޮޅުން އެއްވުމެއް ބާއްވަނީ
އެއްވުން އޮންނާނީ ޕީޕީއެމް އޮފީސް ކުރިމަތީގައި 8:30 ގައި
ޕީޕީއެމް ޕީއެންސީން ބޭއްވި ނޫސްވެރިންގެ ބައްދަލުވުމުގައި ނައިފަރު ދާއިރާގެ މެންބަރު ޝިޔާމް ވާހަކަދައްކަވަނީ
ދިވެހިރައްޔިތުންގެ އަޑު ސަރުކާރަށް އިއްވުމަށާއި، މޯލްޑިވިއަން ޑިމޮކްރަސީ ނެޓްވާރކް (އެމްޑީއެން) އުވާލާ، އެ ޖަމިއްޔާގެ މެންބަރުންނާ މެދު ވަގުތުން ފިޔަވަޅުއެޅުމަށް ގޮވާލާ ޕީޕީއެމް އޮފީސް ކުރިމަތީގައި އެއްވުމެއް ބާއްވަން އިދިކޮޅު ކޯލިޝަނުން ނިންމައިފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ނައިފަރު ދާއިރާގެ ޕީޕީއެމްގެ މަޖިލިސް މެންބަރު އަޙްމަދު ޝިޔާމް ވިދާޅުވީ އެމްޑީއެން އުވާލަން ގޮވާލާ ޞުލްޙަވެރި އިހުތިޖާޖެއް ބުރާސްފަތި ދުވަހުގެ ރޭ 8:30 ޕީޕީއެމް އޮފީސް ހުންނަ ހ. ހުރަފާ ކުރިމަތީގައި އޮންނާނެ ކަމަށެވެ.
އޭނާ ވިދާޅުވީ ޤައުމާއި ދީން ޙިމާޔަތްކުރަން ކުރަންޖެހުނު ހުރިހާ ކަމެއް އިދިކޮޅުން ކުރަމުންދާނެ ކަމުގެ ފުރިހަމަ ޔަޤީންކަން ދެއްވާ ކަމަށެވެ.
އެމްޑީއެންގެ ޙަރަކާތްތައް މި ޤައުމުގައި މިނިވަންކަމާއެކު ކުރިއަށްދިއުމަށް ޖާގަ ދީގެން ނުވާނެކަމަށާއި، އިދިކޮޅު ދެ ޕާޓީން މިކަމަށް މިއަދު ތެދުވެފައިވާ ކަމަށް ޝިޔާމް ވިދާޅުވިއެވެ. އޭނާ ވިދާޅުވީ ދިވެހިރައްޔިތުން އެމްޑީއެންގެ ކަންތައްތަކުގައި ބަސްބުނެ، އެމްޑީއެން އުވާލުމަށްޓަކައި އަޑުއުފުލާ ބަޔަކަށް ސިޔާސީ ގޮތުން ބަސް ބުނަން އޮތް ޕާޓީއަކީ ޕީޕީއެމާއި ޕީއެންސީ ކަމަށެވެ. އަދި ގިނަ ޢަދަދެއްގެ ރައްޔިތުން ބޭނުންވަނީ އިދިކޮޅުން އެމީހުންގެ ބަސްތައް ސަރުކާރަށް އިއްވަން ކަމަށް ޝިޔާމް ވިދާޅުވިއެވެ.
އިދިކޮޅު ޕްރޮގްރެސިވް ކޯލިޝަނުން ބުނީ ބުރާސްފަތި ދުވަހުގެ އެއްވުމަށްފަހުވެސް ސިލްސިލާކޮށް މީގެ ޙަރާކާތްތައް ބާއްވާނެކަމަށެވެ.
