އުއްތަމަ ފަނޑިޔާރު ދީދީ މިސްރުގެ ޗީފް ޖަސްޓިސްއާ ބައްދަލުކުރައްވައިފި

ސުޕްރީމް ކޯޓުގެ އުއްތަމަ ފަނޑިޔާރު ޑރ. އަހުމަދު ޢަބްދުﷲ ދީދީ މިސްރުގެ ޗީފް ޖަސްޓިސް ސައީދު މަރްއީ އުމަރުއާ ބައްދަލުކުރައްވައިފިއެވެ.

ޑރ.އަބްދުﷲ ދީދީ މިސްރުގެ ޗީފް ޖަސްޓިސްއާ ބައްދަލު ކުރައްވާފައި މިވަނި އެމަނިކުފާނު މިހާރު މިސްރަށް ކުރައްވަމުން ގެންދަވާ ދަތުރުފުޅުގައެވެ. އަންގާރަ ދުވަހު ބޭއްވި ބައްދަލުވުމުގައި ދިވެހިރާއްޖޭގެ އަދުލު އިންސާފު ގާއިމުކުރުމުގެ ބާރާއި މިސްރުގެ ޖުޑިޝަރީއާ ދެމެދުގައި އެއްބާރުލުން ވަރުގަދަކޮށް ގުޅުންބަދަހިކުރުމާ ގުޅޭގޮތުން ދެ ބޭފުޅުން ވަނީ މަޝްވަރާ ކުރައްވާފައެވެ.

އެ ބައްދަލުވުމުގައި ޑެޕިއުޓީ ޗީފް ޖަސްޓިސް އޮފް ދަ ސުޕްރީމް ކޮންސްޓިޓިއުޝަނަލް ކޯޓު އޮފް އިޖިޕްޓް، އޮނަރަބަލް ޑރ. އާދިލް އުމަރު ޝަރީފް އާއި ސުޕްރީމް ކޯޓުގެ ފަނޑިޔާރު އޮނަރަބަލް ޢަބްދުލްގަނީ މުޙައްމަދު ބައިވެރިވެ ވަޑައިގެންނެވިއެވެ.

އުއްތަމަ ފަނޑިޔާރު މިސްރަށް ދަތުރުފުޅެއް ކުރައްވަމުން ގެންދަވަނީ، ޖުޑީޝަލް ސަރވިސް ކޮމިޝަން (ޖޭއެސްސީ) އިން އެމަނިކުފާނުގެ ސުލޫކީ މައްސަލައެއް ބަލަމުން ދަނިކޮށެވެ.

ސުލޫކީ މައްސަލައެއް ބަލައި ތަހުގީގު ރިޕޯޓަަށް ރިޔާއަތް ކޮށް އުއްތަމަ ފަނޑިޔާރަށް ފިޔަވަޅު އަޅައި ނަސޭހަތް ދޭން ޖޭއެސްސީން ނިންމާފައިވަނީ، މިދިޔަ ހަފްތާގެ އަންގާރަ ދުވަހުއެވެ.

އެހެން ނަމަވެސް އެ މައްސަލަ ބަލެމުގެ އިހްތިޔާރު ޖޭއެސްސީ އަށް ލިބިގެންނުވާ ކަމަށް ބުނެ ޑރ. ދީދީ ވަނީ ބަޔާނެއް ނެރެ އެ ކޮމިޝަނަށް ހާޒިރުވާން އުޒުރުވެރިވެ ވަޑައިގެންފައެވެ. ނަސޭހަތް ދިނުމުން ނަސޭހަތުގެ ލިޔުމާއި ހަވާލުނުވުމުން އުއްތަމަ ފަނޑިޔާރުގެ އިތުރު މައްސަލައެއް ބެލުމަށް ޖޭއެސްސީން ވަނީ ނިންމައިފިއެވެ.