ނޭޕާލުގައި ކުރިޔަށްދިޔަ 16 އަހަރުން ދަށުގެ ސައުތް އޭޝިއަން ނެޓްބޯލް ޗެމްޕިއަންޝިޕްގެ ތިންވަނަ ރާއްޖޭގެ އަންހެން ނެޓްބޯޅަ ޓީމުން ހޯދައިފިއެވެ.

ނޭޕާލުގެ ވެރިރަށް ކަތުމަންޑޫގައި ބޭއްވި މި މުބާރާތުގެ ތިންވަނަ ރާއްޖެއިން ހޯދީ އަންގާރަ ދުވަހު ކުޅުނު މެޗުން ނޭޕާލްގެ މައްޗަށް 35-25 ޕޮއިންޓުން ކުރި ހޯދައިގެންނެވެ.

މެޗުގެ ފުރަތަމަ ކުއާޓަރގައި ރާއްޖެ ކުރި ހޯދީ 10-5 ޕޮއިންޓުންނެވެ. އަދި ދެވަނަ ކުއާޓަރގައި ރާއްޖެއިން 18-9 ގެ ބޮޑު ލީޑެއް ނެގި ނަމަވެސް ތިން ވަނަ ކުއާޓަރގައި ނޭޕާލުން ވަނީ ރާއްޖެއިން ނެގި ލީޑު ކުޑަ ކޮށްފައެވެ. މި ކުއާޓަރ ނިމުނީ 27-20 އިންނެވެ. މި މެޗުގެ ފަހު ކުއާޓަރގައި ރާއްޖެއިން ވަނީ 10 ޕޮއިންޓަށް ލީޑު ފުޅާ ކޮށް މުބާރާތުގެ ތިންވަނަ ހޯދައިފައެވެ.

ތިންވަނަ ހޮވަން ކުޅުނު މެޗުގެ މޮޅު ކުޅުންތެރިޔާގެ މަގާމު ހޯދީ ރާއްޖޭގެ އައިޝަތު ނުއޫމީ ނާސިރެވެ.

މި މުބާރާތާއި ރާއްޖެއިން ކުރިމަތިލީ މެޑައްޔެއް ހޯދުމަށް ޓާގެޓް ކޮށްގެނެވެ. އެގޮތުން ނެޓްބޯޅަ ޓީމުގެ ކޯޗު ނީޝާ ހަލީމް ބުނީ މި މުބާރާތުގައި ވާދަކުރާ ކުޅުންތެރިންނަކީ ތަޖުރިބާ މަދު ކުޅުންތެރިން ތަކެއް ނަމަވެސް އެ ކުޅުންތެރިންގެ ފަރާތުން މުބާރާތުގައި މޮޅު ކުޅުމެއް ފެނިގެންދާނެ ކަމަށެވެ. އަދި މި މުބާރާތުގައި ރާއްޖޭގެ ޓީމުގެ އަމާޒަކީ މެޑައްޔެއް ހޯދުން ކަމަށެވެ.

މިއީ ރާއްޖޭގެ ޖޫނިއަރ ނެޓުބޯޅަ ޓީމަކުން ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެވެ. މި މުބާރާތުގެ ސެމީ ފައިނަލުގައި ހޯމަ ދުވަހު ހަވީރު ރާއްޖެއިން ނިކުންނާނީ ވަރުގަދަ އިންޑިއާއާއި ދެކޮޅަށެވެ.