ފިޔަވަޅު ނޭޅުމަކީ ޤާނޫނީ ދައުލަތެއް ހިންގޭނެ ގޮތެއް ނޫން: ރައީސް ނަޝީދު
22 އޮކްޓޯބަރު 2019 | އަންގާރަ 08:37ރިޕޯޓު ކުށްވެރިކުރަމުން ދާއިރުގައި އެ ރިޕޯޓުގައި ހުރި އެއްޗަކާއި ގުޅޭގޮތުން ވިސްނާލުމަކީ ބޭނުންތެރިކަމެއް ކަމަށް ވިދާޅުވި
ރައްޔިތުންގެ މަޖިލީހުގެ ޖަލްސާއެއްގައި ރައީސް މުހައްމަދު ނަޝީދު
ފިޔަވަޅު ނޭޅުމަކީ ގާނޫނީ ދައުލަތެއް ހިންގޭނެ ގޮތެއް ނޫން ކަމަށް ވިދާޅުވެ ޓެރަރިޒަމްގެ މައްސަލަތަކުގައި ފިޔަވަޅުތައް އަޅަމުން ނުގެންދާތީވެ، ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް މުހައްމަދު ނަޝީދު ކަންބޮޑުވުން ފާޅުކޮށްފި އެވެ.
ރައީސް ނަޝީދު މިހެން ވިދާޅުވީ އަންގާރަ ދުވަހުގެ މަޖިލީހުގެ ޖަލްސާގައި ވާހަކަފުޅު ދައްކަވަމުންނެވެ.
ރައީސް ނަޝީދު ވިދާޅުވީ މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)ގެ ރިޕޯޓާއި ގުޅިގެން އަނެއްކާވެސް މިއަދު އަޑުއިވިގެންދަނީ ލޭ ހުއްދަކުރަން ގޮވަމުންދާ އަޑު ކަމަށާއި ރިޕޯޓާއި ގުޅިގެން ކުރާ މުޒާހަރާތައް ހިންގާ ރާވަމުން އަންނަނީ އެހެން ގައުމުތަކަށް ހަނގުރާމައަށް މީހުން ފޮނުވާ ފަރާތްތަކުން ކަމަށެވެ. އަދި ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަ ބަލާ ކޮމީޝަންގެ ރިޕޯޓަށް އިޝާރާތް ކުރައްވާ ރައީސް ނަޝީދު ވިދާޅުވީ ތަހުގީގުތައް ކުރެވެން ފެށުމުން އެ ތަހުގީގުތަކަށް ހުރަސް އެޅުމަށް އެހެން ރިޕޯޓެއްގެ ވާހަކަ ދައްކަމުންދާކަމަށް ކަމަށް ފެނިވަޑައިގަންނަވާކަމަށެވެ.
އެމްޑީއެންގެ ރިޕޯޓު ނެރުނީ 2014 ގައިކަން ފާހަގަކުރައްވާ ރައީސް ނަޝީދު ވިދާޅުވީ ސަރުކާރުންނާއި، އަދި ހުރިހާ ފަރާތަކުންވެސް އެ ރިޕޯޓު ކުށްވެރިކޮށްފައިވާކަމަށެވެ. އަދި އެ ރިޕޯޓުގައި ހިމަނާފައިވާ ބައެއް ވާހަކަތަކާއި ގުޅިގެން ފުލުހުން ދަނީ ތަހުގީގުތައް ކުރަމުން ކަމަށެވެ. ރައީސް ނަޝީދު ވިދާޅުވީ އެމްޑީއެންގެ ރިޕޯޓު ކުށްވެރި ކުރަމުން ދާއިރުގައި އެ ރިޕޯޓުގައި ހުރި އެއްޗަކާއި ގުޅޭގޮތުން ވިސްނާލުމަކީ ބޭނުންތެރިކަމެއް ކަމަށެވެ.
މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާނުގެ މަރުގެ ފަހަތުގައި ތިބީ ދީނީ ހަރުކަށި ފިކުރުގެ މީހުންކަމަށް މަރު ކޮމިޝަނުން އެކުލަވާލި ރިޕޯޓްގައިވާ ނުކުތާއަށް އިޝާރަތްކުރައްވާ ރައީސް ނަޝީދު ވިދާޅުވީ އެ ރިޕޯޓުގެ ޑްރާފްޓް ވަނީ މަޖިލީހަށް އަރުވާފައިކަމަށެވެ.
މީގެ އިތުރުން ސީރިއާގައި ހަރަކާތްތެރިވާ ދިވެހި ހަނގުރާމަވެރިން ތަމްސީލުކުރާ ފަރާތަކީ، އަދި ސީރިއާގައި ހަރަކާތްތެރިވާ ދިވެހިންގެ ހަބަރުތައް ގެނެސްދޭ "ބިލާދް އަލް ޝާމް" މީޑިއާއިން ބުނަނީ އެ ގްރޫޕްގެ ފައުންޑަރަކީ އަދި އެޑިޓަރަކީވެސް އަބޫ ދުޖާނާ އަލް މަލްދީފީކަމަށް ރައީސް ނަޝީދު ވިދާޅުވި އެވެ. އޭނާގެ އަސްލު ނަން އެ ގްރޫޕުން ހާމަ ނުކުރި ނަމަވެސް ރާއްޖޭގެ މީޑިއާތަކުން ރިޕޯޓު ކުރަނީ އޭނާ އަކީ މ. ޖޯރޖިއާ ޔާމީނު ނައީމް ކަމަށް އެމަނިކުފާނު ވިދާޅުވި އެވެ. އަދި އޭނާ ސީރިއާގައި މަރުވެފައިވަނީ 2014 ވަނަ އަހަރުގެ ސެޕްޓެމްބަރު މަހު ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ އެހެން ގައުމުތަކަށް ހަނގުރާމައަށް މީހުން ފޮނުވާ ފަރާތްތަކުގެ ތަހުގީގުތައް ކުރެވެން ފެށުމުން އެ ތަހުގީގުތަކަށް ހިޔަނި އަޅުވާ ހުރަސް އެޅުވުމަށް އެހެން ރިޕޯޓެއްގެ ވާހަކަ ދައްކާ، އެ ވާހަކަ ފެންމަތިކޮށް ރާއްޖޭގައި ހަމަނުޖެހުން އުފެއްދުމަށް އެ ފަރާތްތަކުން މަސައްކަތް ކުރަމުންދާ ކަމަށެވެ.
ހުރިހާ ފަރާތަކުންވެސް އެމްޑީއެންގެ ރިޕޯޓު ކުށްވެރިކުރާކަން ފާހަގަކޮށް ރައީސް ނަޝީދު ވިދާޅުވީ އެފަދަ ވާހަކަތައް ދައްކާމީހުންގެ މައްޗަށް ތަހުގީގުކޮށް ފިޔަވަޅު އަޅަންޖެހޭ ކަމަށެވެ. އަދި ލޭ ހުއްދަ ކުރާ ނުވަތަ މަރުގެ އިންޒާރުދޭ، ހަނގުރާމައަށް މީހުން ފޮނުވާ، ރާއްޖޭގައި އަލްގައިދާއާއި އަދި އެހެނިހެން ޓެރަރިސްޓު ޖަމާއަތްތަކުގެ އެކި އެކި ގޮފިތައް ރާވާ، ހިންގާ މީހުން އެނގޭއިރުވެސް އެމީހުން ހައްޔަރު ނުކުރެވޭ ކަމަށް ރައީސް ނަޝީދު ވިދާޅުވި އެވެ.
ފުލުސް އޮފިހަށް ވެސް އެމީހުންނާއި ބެހޭ ސާފު މައުލޫމާތު ލިބިފައިވާ ކަމަށާއި އަދި ސަރުކާރުގެ އެދިވަޑައިގަތުމުގެ މަތިން ރައްޔިތުން މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީ ޗުއްޓީއަށް ނުގޮސް، ހޭލާ ތިބެ އިސްލާހުތައް ބޭނުންވާ ގާނޫނުތަކަށް އިސްލާހު ގެނެސްފައި ކަމަށް ވިދާޅުވިއެވެ. އެހެން ނަމަވެސް ފެންނަމުން މިދަނީ ފިޔަވަޅެއް ނޭޅޭ ތަން ކަމަށާއި، އަދި އެއީ ގާނޫނީ ދައުލަތެއް ހިންގޭ ގޮތެއް ނޫން ކަމަށް ރައީސް ނަޝީދު ވިދާޅުވި އެވެ.
