އިންފޮރމޭޝަން ކޮމިޝަނަރުކަމަށް ރާއްޖެޓީވީގެ ކުރީގެ ސީއޯއޯ ޙުސައިން ފިޔާޒު މޫސާ ޢައްޔަން ކުރަން ރައްޔިތުންގެ މަޖިލީހުން ރުހުުންދީފި އެވެ.

އިންފޮމޭޝަން ކޮމިޝަނަރުކަމަށް ފިޔާޒު އައްޔަންކުރުމަށް ފެންނަކަމަށް 72 މެމްބަރަކު ވޯޓު ދެއްވާފައިވެއެވެ.

އިންފޮމޭޝަން ކޮމިޝަނަރުކަމަށް ޢައްޔަންކުރަން 3 ނަމެއް ރައްޔިތުންގެ މަޖިލީހުގެ ތަޅުމަށް ފޮނުވުމަށް މިނިވަން މުއައްސަސާތަކުގެ ކޮމެޓީން ރުހުންދީފައިވަނީ އޮކްޓޯބަރު މަހުގެ 8 ވަނަ ދުވަހުއެވެ. އެމަޤާމަށް ރައީސުލްޖުމްހޫރިއްޔާ ފޮނުއްވި 4 ބޭފުޅުންނާއި އިންޓަވިއު ކުރެވުނުއިރު މަޤާމަށް ޢައްޔަނުކުރުމަށް ކޮމެޓީން ރުހުންދީ، މަޖިލީހުގެ ޖަލްސާގައި ވޯޓަށް އަހާފައިވަނީ ޙުސައިން ފިޔާޒު މޫސާގެ ނަމަށް އެކަނި އެވެ.

އިންފޮމޭޝަން ކޮމިޝަނަރުކަމަށް އައްޔަންކުރުމަށް ފިޔާޒަށް 72 މެމްބަރުން ރުހުންދިނުމާއި ގުޅިގެން އިތުރު ނަމަކަށް ވޯޓަށް އަހާފައެއް ނުވެ އެވެ. ފިޔާޒގެ އިތުރުން ކޮމެޓީން ހުށަހަޅާފައިވަނީ އިލެކްޝަންސް ކޮމިޝަންގެ ކުރީގެ މެމްބަރު އަހުމަދު ފަޔާޒް ހަސަނާއި، ހ. ގުރުވަ އަހުމަދު އާހިދު ރަޝީދުގެ ނަމެވެ.

ނޫސްވެރިކަމުގެ ރަން ގަލަން ލިބިވަޑައިގެންފައިވާ ހުސެއިން ފިޔަޒް މޫސާ ވަނީ ނޫސްވެރިކަމާއި، މީޑިއާގެ ދާއިރާގައި ގިނަ މަސައްކަތްތަކެއް ކުރައްވާފަ އެވެ. އެގޮތުން ނުސްވެރިކަމުގެ ދާއިރާގައި 19 އަހަރަށްވުރެ ގިނަ ދުވަހު މަސައްކަތްކުރެއްވިއިރު، ފިޔާޒު ވަނީ މިއަދު ނޫހާއި، އާފަތިސް ނޫހާއި، ހަވީރުގައިވެސް ގިނަ މަސައްކަތްތަކެއް ކުރައްވާފަ އެވެ. އެންމެފަހުން ފިޔާޒް މަސައްކަތް ކުރައްވާފައިވަނީ ރާއްޖެޓީވީގަ އެވެ. އެގޮތުން ނޫސްވެރިކަމަށް އެންމެ ބޮޑެތި ގޮންޖެހުންތައް ކުރިމަތިކޮށް، ރާއްޖެޓީވީ އެތަށް މިލިއަނަކުން ޖޫރިމަނާކުރިއިރު، ރާއްޖެޓީވީގެ ސީއޯއޯގެ މަޤާމު ފިޔާޒު އަދާކުރައްވާފައިވެއެވެ. ރާއްޖެޓީވީގެ ސީއޯއޯކަމުން ފިޔާޒު އިސްތިއުފާދެއްވީ މިދިޔަ އަހަރުގެ ނޮވެމްބަރު މަހު އެވެ. ނަމަވެސް ނިމުނު މަޖިލީސް އިންތިހާބުގެ ނިޔަލަށްވެސް ރާއްޖެޓީގައި ގިނަ މަސައްކަތްތަކެއް ފިޔާޒު ކުރައްވާފައިވެއެވެ.

ފިޔާޒަކީ މެލޭޝިއާގެ ލިމްކޮކްވިން ޔުނިވަސިޓީން ނޫސްވެރިކަމާއި ޕަބްލިކް ރިލޭޝަން ދާއިރާއިން ޑިގްރީ ހާސިލްކުރައްވާފައިވާ ބޭފުޅެކެވެ.

އިންފޮމޭޝަން ކޮމިޝަނަރުގެ މަޤާމުގައި ކުރިން ހުންނެވި ޢަބްދުލް އަޒީޒް ޖަމާލް އަބޫބަކުރުގެ ދައުރުގެ މުއްދަތު ވަނީ މިއަަހަރުގެ ޖޫން މަހުގެ 22 އަށް ހަމަވެފައެވެ. މަޢުލޫމާތު ހޯދައި ލިބިގަތުމުގެ ޙައްޤުގެގެ ޤާނޫނުގެ ދަށުން އިންފޮމޭޝަން ކޮމިޝަނަރުގެ އޮފީހެއް ދައުލަތުން އުފައްދާފައިވަނީ 13 ޖުލައި 2014 ގައެވެ.