ލިބެންވާ ފައިސާ ޖަމާވުމުން، އެސްއެމްއެސް އަދި އީމެއިލް ލިބޭނެ ނިޒާމެއް ފިނޭންސުން ގާއިމްކޮށްފި
މި ހިދުމަތް ލިބިވަޑައިގަންނަވާނީ ބޭނުންވާ މައުލޫމާތު ޕަބްލިކް އެކައުންޓިންގ ސިސްޓަމްގައި ހުރި ފަރާތްތަކަށް އެކަނި
ފިނޭންސް މިނިސްޓްރީ
ދައުލަތުގެ އެކި އިދާރާތަކުން، ފިނޭންސް މިނިސްޓްރީ މެދުވެރިކޮށް ޖަމާކުރާ ފައިސާ ލިބެންވާ ފަރާތްތަކުގެ އެކައުންޓަށް ޖަމާވުމުން، އެސް.އެމް.އެސް އަދި އީމެއިލް ފޮނުވުމުގެ ނިޒާމެއް، ފިނޭންސް މިނިސްޓްރީން ގާއިމްކޮށްފިއެވެ.
އަލަށް ގާއިމް ކުރި ނިޒާމް މެދުވެރިކޮށް، އެސް.އެމް.އެސް އަދި އީމެއިލް ލިބެމުންދާނީ، ޕަބްލިކް އެކައުންޓިންގ ސިސްޓަމުގައި ރަޖިސްޓްރީ ކުރާއިރު، އެ ފަރާތްތަކުގެ އީމެއިލް އެޑްރެސް އަދި މޮބައިލް ނަމްބަރު ވެންޑަރ ރަޖިސްޓްރީގައި ހިމަނާފައި ވާނަމައެވެ.
މިނިސްޓްރީގެ ޕަބްލިކް އެކައުންޓިންގ ސިސްޓަމްގައި ރަޖިސްޓްރީ ކުރާއިރު، މޯބައިލް ފޯނާއި އީމެއިލްގެ މައުލޫމާތު ލިބިފައި ނެތްނަމަ، އަދި ފަހުން އެ މައުލޫމާތު ބަދަލުވެފައިވާ ފަރާތަކަށް މި ހިދުމަތް ލިބުމުގައި ދަތިތަކެއް ހުންނާނެ ކަމަށް ފިނޭންސް މިނިސްޓްރީން މައުލޫމާތު ދީފައިވެއެވެ. އަދި ހިދުމަތް ބޭޏުންވެލައްވާ ފަރާތްތަކުން އެ މައުލޫމާތު މިނިސްޓްރީއަށް ވީހާވެސް އަވަހަކަށް ފޯރުކޮށްދިނުމަށް އެ މިނިސްޓްރީން އެދިފައިވެއެވެ.
ފިނޭންސުން ބުނީ އެސް.އެމް.އެސް ފޮނުވަމުންދާނީ އެ މިނިސްޓްރީގެ ކޯލް ސެންޓަރު ނަމްބަރު 1617 އިން ކަމަށާއި، އީމެއިލް ފޮނުވަމުންދާނީ އެ މިނިސްޓްރީގެ އީމެއިލް އެޑްރެސްގައި ކަމަށެވެ.
