އޭސީ މިލާނަށް މިދިޔަ އަހަރު ރެކޯޑު އަދަދެއްގެ ގެއްލުމެއް

އިޓާލިއަން ލީގުގައި ވާދަކުރާ އޭސީ މިލާނަށް މިދިޔަ އަހަރު މާލީ ގޮތުން ރެކޯޑު އަދަދެއްގެ ގެއްލުމަކާ ކުރިމަތިލާން ޖެހިއްޖެއެވެ.

އިޓަލީގެ ނޫހެއް ކަމަށްވާ ޑެލޯ ސްޕޯޓް އިން ބުނީ، ފާއިތުވި އަހަރު އޭސީ މިލާނަށް މާލީ ގޮތުން 146 މިލިއަން ޔޫރޯގެ ގެއްލުމެއް ކުރިމަތިވެފައިވާ ކަމަށާއި، އަދި މިއީ އެ ކްލަބުން އަންދާޒާ ކުރިވަރަށްވުރެ 50 މިލިއަން ޔޫރޯ އިތުރު އަދަދެއް ކަމަށެވެ.

އޭސީ މިލާނަށް މިދިޔަ އަހަރު 126 މިލިއަން ޔޫރޯގެ ގެއްލުމެއް ލިބިފައިވާއިރު، އަހަރުން އަހަރަށް އެ ކްލަބަށް ލިބޭ އާމްދަނީ އަންނަނީ ދަށްވަމުންނެވެ.

މި ސީޒަނުގައި ޔުއެފާގެ އޭސީ މިލާނުން ޔުއެފާގެ "ފައިނޭންޝިއަލް ފެއާ ޕްލޭ" ގަވައިދާ ހިލާފުވުމުން ޔޫރޮޕާ ލީގުގައި ވާދަކުރުމުގެ ފުރުސަތުވެސް ވަނީ ގެއްލިފައެވެ. އެގޮތުން އޭސީ މިލާނަށް އިސްތިހާރުތަކުގެ އިތުރުން ޓިކެޓު ވިއްކައިގެން ލިބޭ ފައިދާ ވަނީ ދަށަށް ގޮސްފައެވެ.

މި ސީޒަނުގެ އިޓާލިއަން ލީގުގައި އޭސީ މިލާން މިހާތަނަށް ހަތް މެޗު ކުޅެފައިވާއިރު، އޭގެ ތެރެއިން އެޓީމު މޮޅުވެފައިވަނީ ތިން މެޗުންނެވެ. ބާކީ ހަތަރު މެޗުން އެޓީމު ވަނީ ބަލިވެފައެވެ. އެޓީމު އޮތީ ނުވަ ޕޮއިންޓާއެކު ޕޮއިންޓް ތާވަލުގެ 13 ވަނައިގައެވެ.

އޭސީ މިލާނުން ވަނީ މިދިޔަ ހަފްތާގައި އެޓީމުގެ ކޯޗުކަމުގައި ހުރި މާކޯ ޖިއަމްޕައޮލޯ ވަކޮށް، އެ ކްލަބުގެ ކޯޗަކަށް ސްޓެފާނޯ ޕިއޮލީ ގެނެސްފައެވެ. އޭނާގެ އިރުޝާދުގެ ދަށުން އޭސީ މިލާން އަންނަ އާދީއްތަ ދުވަހު ނިކުންނާނީ ލީޗް ދެކޮޅަށެވެ.