ހުރިހާ ކުދިން ޝާމިލްކޮށްގެން ތައުލީމު އުނގަންނައިދޭ ސިޔާސަތުގެ ދަށުން ބަސްކޮށާރަށް ބަދަލު ގެންނަނީ
ކަންކަން ނިންމާނީ އުނގެނޭ ވެއްޓަށް ބެލުމަށްފަހު
ޑިޕާޓްމެންޓް އޮފް އިންކްލޫސިވް އެޑިއުކޭޝަން ޑިރެކްޓަރ ޖެނަރަލް އަހުމަދު އާތިފް
ހުރިހާ ކުދިން ޝާމިލްކޮށްގެން ތައުލީމު އުނގަންނައިދޭ ސިޔާސަތުގެ ދަށުން ބަސްކޮށާރު މުޅިން ބަދަލުކުރުމުގެ ވިސްނުން ގެންގުޅޭ ކަމަށް ޑިޕާޓްމެންޓް އޮފް އިންކްލޫސިވް އެޑިއުކޭޝަން ޑިރެކްޓަރ ޖެނަރަލް އަހުމަދު އާތިފް ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި އާތިފް ވިދާޅުވީ, ހުރިހާ ކުދިން ޝާމިލްކޮށްގެން ތައުލީމު އުނގަންނައިދޭ ސިޔާސަތު ތަންފީޒުކުރުމުގެ މަސައްކަތް ކުރަމުންދާއިރު، ޚާއްސަ ގޮތެއްގައި އުނގެނޭ ވެއްޓަށް ބެލުމަށްފަހު ކަންކަން ނިންމާ ކަމަށެވެ. އުނގެނޭ ވެއްޓަށް ބަލާއިރު އިތުރު އެހީ ބޭނުންވާ ބައިވަރު ކުދިން އެބަތިބި ކަމަށެވެ.
އޭގެ ތެރޭގައި އުނގެނުމުގައި ޚާއްސަ އެހީއަށް ބޭނުންވާ ކުދިންނާއި، ޚާއްސަ އެހީއަށް ބޭނުންވާ ކުދިންނާއި، އާދަޔާ ހިލާފަށް ތޫނުފިލި ކުދިންނާއި، ލިޔުމާއި ކިޔުމަށް ދަތިތައް ކުރިމަތިވާ ކުދިން އަދި ކިޔެވުމަށް ކޮށި ނުވަތަ ބޯޑަރ ލައިންގައި ތިބޭ ކުދިންގެ އިތުރުން ޚާއްސަ އެހީއަށް ބޭނުންވާ ކުދިންގެ ތެރޭގައި ހިމެނޭ އެކިއެކި ނުކުޅެދުންތެރިކަން ހުންނަ ކުދިން ހިމެނޭ ކަމަށް އާތިފް ވިދާޅުވިއެވެ.
އާތިފް ވިދާޅުވީ މިސިޔާސަތު ތަންފީޒު ކުރާއިރު، ހުރިހާ ކުދިން ބައިވެރިކުރުވުމަށް އެންމެ މުހިންމު ކަމަކީ ބަސްކޮށާރު ބަދަލުކުރުން ކަމަށާއި، އެކަން ތަންފީޒު ކުރުމަށް މިހާރު މަޝްވަރާ ކުރަމުން އަންނަ ކަމަށެވެ. ނަމަވެސް ބަސްކޮށާރު ބަދަލުކުރާ ގޮތެއް އާތިފް ހާމައެއް ނުކުރައްވައެވެ.
އެޑިއުކޭޝަން ޑިވަލޮޕްމެންޓް އޮފިސަރ އައިޝަތު ޒައީމާ ވިދާޅުވީ ހުރިހާ ކުދިން ޝާމިލްކޮށްގެން ތައުލީމު އުނގަންނައިދޭ ސިޔާސަތުގެ ކަނޑައަޅަނީ ހުރިހާ ކުދިންނަށް ޝަމިލް ވެވޭނެ ގޮތްތަކަކީ ކޮބައިތޯ ބަލުމަށްފަހު، އެކުއްޖަކަށް އެންމެ ބޮޑަށް އެންމެ އެކަށީގެންވާ ޕްރޮގްރާމަކުން ފުރުސަތުދޭ ގޮތަށް ކަމަށެވެ.
އެގޮތުން މިހާރު ފަސް ފޮރޮގްރާމެއް ކަނޑައަޅާފައިވާ ކަމަށް އޭނާ ވިދާޅުވިއެވެ. އޭގެ ތެރޭގައި އާލީ އިންޓަވެންޝަން، އެއާއެކު ހޯމް ސްކޫލިންގ ކަމަށްވާ ސްކޫލަށް ނާދެވޭ ކުދިންނަށް ވެސް ހަމަ ޚިދުމަތްތައް ދިނުމަށްޓަކައި ސްކޫލުގެ ޓީޗަރު ދަރިވަރާ ހަމައަށް ތައުލީމް ފޯރުކޮށްދެވޭނެ ނިޒާމްތަކެއް ގާއިމްކުރުމާއި، މެއިންސްޓްރިމް ނިޒާމުގައި ކިޔަވައިދޭނެ ގޮތްތައް ކަމަށް ޒައީމާ ވިދާޅުވިއެވެ.
ޒައީމާ ވިދާޅުވީ ތައުލީމީ ނިޒާމަށް މިގެނެވޭ ބޮޑު ބަދަލާއެކު ރަނގަޅު ނަތީޖާއާއެކު އަމާޒުވާން ބޭނުންވާ މިސްރާބަށް ވާސިލް ވެވޭނެ ކަމަށެވެ. އަދި ސިޔާސަތު ތަންފީޒު ކުރުމަށް ބޭނުންވަނީ އެންމެން ގުޅިގެން ކުރާ މަސައްކަތުގައި ބެލެނިވެރިންގެ އެއްބާރުލުން ކަމަށް އޭނާ ވިދާޅުވިއެވެ.
