އޮގަސްޓްމަހު ނޭޕާލްގައި ކުރިޔަށްދާ 16 އަހަރުންދަށުގެ ސައުތް އޭޝިއަން ނެޓްބޯލް ޗެމްޕިއަންޝިޕްގައި ވާދަކުރާ ރާއްޖޭގެ 16 އަހަރުންދަށުގެ ނެޓްބޯޅަ ޓީމުގެ ފަރިތަކުރުންތައް ފަށައިފިއެވެ.

އޮގަސްޓްމަހު 18 އިން 22 ހަށް ކުރިޔަށްދާ މި މުބާރާތުގައި ރާއްޖޭގެ އިތުރުން އިންޑިއާ، ނޭޕާލް، ޕާކިސްތާން އަދި ސްރީލަންކާ ވާދަކުރާނެއެވެ.

މިއީ ރާއްޖޭގެ ޒުވާން ނެޓްބޯޅަ ޓީމަކުން ބައިނަލްއަގްވާމީ މުބާރާތެއްގައި ވާދަކުރާ ފުރަތަމަ ފަހަރެވެ.

ޒުވާން ނެޓްބޯޅަ ޓީމުގެ ކޯޗު ނީޝާ ހަލީމް ބުނީ މި މުބާރާތަށް ޓީމު އެކުލަވައިލައިފައިވަނީ މިއަހަރު ކުރިޔަށްދިޔަ އިންޓަރ ސްކޫލް މުބާރާތުން ކަމަށާއި ދާދި ފަހުން ބޭއްވުނު އެސޯސިއޭޝަން ކަޕްގައި ކުޅުމަށް އެކުޅުންތެރިންނަށް ފުރުސަތުދީފައިވާ ކަމަށެވެ. އަދި މި މުބާރާތުގައި ބައިވެރިވާ ކުޅުންތެރިންގެ ތަޖުރިބާ މަދު ނަމަވެސް ޓާގެޓަކީ މި މުބާރާތުން މެޑައްޔެއް ހޯދުން ކަމަށެވެ.

މި މުބާރާތުގެ ފުރަތަމަ މެޗުގައި މި މަހުގެ 18 ވަނަ ދުވަހުގައި ރާއްޖެއިން ނިކުންނާނީ އިންޑިއާއާ ދެކޮޅަށެވެ. އަދި ހަމަ އެދުވަހު ނޭޕާލާއި ދެކޮޅަށް ނިކުންނައިރު، މި މަހުގެ 19 ވަނަ ދުވަހު ރާއްޖެއިން ނިކުންނާއީ ސްރީލަންކާއާއި ދެކޮޅަށެވެ. އަދި 20 ވަނަ ދުވަހު ރާއްޖެއިން ނިކުންނާނީ ޕާކިސްތާނާއި ދެކޮޅަށެވެ.