އާދިއްތަ ދުވަހުން ފެށިގެން ކޮންޓްރޯލެއް ނެތި ފިޔާ ވިއްކަން ފަށާނެ: އެސްޓީއޯ
ފިޔާ ބަސްތާއެއް 1000 ރުފިޔާއަށް ލިބެންހުރިއިރު ކިލޯއެއް ވިއްކަން ހުރީ 50 ރުފިޔާއަށް
ބާޒާރުގައި ފިޔާގެ އަގު ވަނީ ބޮޑުވެފައި
އާދިއްތަ ދުވަހުން ފެށިގެން ކޮންޓްރޯލެއް ނެތި ފިޔާ ވިއްކަން ފަށާނެ ކަމަށް ދައުލަތުގެ ވިޔަފާރި ކުންފުނި އެސްޓީއޯ އިން ބުނެފިއެވެ.
އެސްޓީއޯ އިން މިހާރު ފިޔާ ވިއްކަމުން ދަނީ މީހަކަށް ކިލޯއެއް 30ރ ގެ ރޭޓުންނެވެ.
ރާއްޖެއެމްވީ އަށް މައުލޫމާތު ދެއްވަމުން އެސްޓީއޯގެ ސްޕޯކްސްޕާރސަން އަބްދުﷲ މުހައްމަދު ވިދާޅުވީ ހުކުރު ދުވަހު ފިޔާގެ ޝިޕްމަންޓެއް ލިބޭނެ ކަމަށާއި އާދިއްތަ ދުވަހުން ފެށިގެން ކޮންޓްރޯލެއް ނެތި ފިޔާ ވިއްކަން ފަށާނެ ކަމަށެވެ.
ބާޒާރުގައި ފިޔާ ބަސްތާއެއް 1000 ރުފިޔާއަށް ލިބެންހުރިއިރު ކިލޯއެއް ވިއްކަން ހުރީ 50 ރުފިޔާއަށެވެ.
ފިޔާގެ އަގު ބޮޑުވެފައި މިވަނީ އިންޑިއާއަށް މިހާރު ކުރަމުންދާ ވިއްސާރައިގެ ސަބަބުން ދަނޑުތައް ހަލާކުވެ ބޭނުންވާ ވަރަށް ފިޔާ ނުއުފެއްދޭތީއެވެ. އަދި ގައުމުތަކަށް ފިޔާ އެކްސްޕޯޓް ކުރުން ވަގުތީ ގޮތުން އިންޑިއާ އިން ހުއްޓާލި ނަމަވެސް އެ ގައުމުތަކުގެ ތެރޭގައި ރާއްޖެ ނުހިމެނޭ ކަމަށް މީގެ ކުރިން ފޮރިން މިނިސްޓްރީގެ ޑިރެކްޓަރ އޮފް ކޮމިއުނިކޭޝަންސް މިއުވާން މުޙައްމަދު ވަނީ ވިދާޅުވެފައެވެ.
އިންޑިއާ ސަރުކާރުން ވަނީ، ވަކި އެއްޗެއް އަންގަންދެން ފިޔާ އެކްސްޕޯޓް ކުރުން މަޑު ޖައްސާލަން އަންގާފައެވެ. އިންޑިއާއަށް މިހާރު ކުރަމުންދާ މޫސުމީ ވިއްސާރައިގައި ލިބުނު ގެއްލުންތަކުގެ ސަބަބުން ބާޒާރަށް ފިޔާ ނެރެވޭ މިންވަރު ވަރަށް ބޮޑަށް މަދުވެ، ފިޔަލުގެ އަގު ވަނީ ބޮޑުވެފައެވެ. ވެރިރަށް ނިއު ދިއްލީއާއި، ވިޔަފާރި މަރުކަޒީރަށް މުމްބާއީގެ ބާޒާރުގައި ފިޔާ ކިލޯއެއް ވިއްކަމުންދަނީ 80-70 ރުޕީސްއާ ދެމެދުގެ އަގެއްގައެވެ. މިއީ އާއްމުކޮށް ލިބޭ އަގަށްވުރެ ބޮޑު އަދަދެކެވެ.
