ޔޫރޯ ކޮލިފިކޭޝަނުގައި ޔޫކްރެއިން އިން ޕޯޗުގަލް ބަލިކުރި ނަމަވެސް ރޮނާލްޑޯ ކެރިޔަރުގައި 700 ވަނަ ލަނޑު ހަމަކޮށްފިއެވެ.

ޔޫކްރެއިންގެ ދަނޑުގައި ކުޅުނު މި މެޗު ޔޫކްރެއިން އިން ކާމިޔާބުކުރީ 2-1 ގެ ނަތީޖާއަކުންނެވެ.

މެޗު ފަށައިގެން 6 ވަނަ މިނެޓުގައި ޔޫކްރެއިން އިން ލަނޑު ޖަހާ ލީޑު ނަގައިފައިވާއިރު މި ލަނޑު އެޓީމަށް ކާމިޔާބުކޮށްދިނީ ޔަމެޗުކްއެވެ. މި ލަނޑަށްފަހު ވެސް ޔޫކްރެއިންއިން ތަފާތު މޮޅު އެޓޭކިންގ ގޭމެއް ކުޅެމުން ގެންދިޔައިރު ޔޫކްރެއިން އިން ދިޔައީ ޕޯޗުގަލްގެ ގޯލަށް ފުލުފުލުގައި ހަމަލާ އުފައްދަމުންނެވެ. އެގޮތުން މެޗުގެ 27 ވަނަ މިނެޓުގައި ޔޫކްރެއިން އިން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެންޑްރީ ޔާރްލެމްކޯއެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުން ޔޫކްރެއިން ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ޕޯޗުގަލްއިން އެޓީމުގެ ކުޅުން ރަނގަޅުކުރި އިރު ޕޯޗުގަލް އިން މި ހާފުގައި ޔޫކްރެއިންގެ ހާފަށް ބާރުބޮޑުކޮށްފައި ވެއެވެ. އެގޮތުން މެޗުގެ 72 ވަނަ މިނެޓުގައި ޓަރަސް ސްޓެނިއަންކޯ އޭރިއާ ތެރެއިން ޕޯޗުގަލްގެ ކުޅުންތެރިއަކަށް ފައުލް ކުރުމާއި ގުޅިގެން ދެވަނަ ރީނދޫ ކާޑު ދެއްކުމަށްފަހު ރަތް ކާޑު ދައްކައިފައިވެއެވެ.

މެޗުގެ 72 ވަނަ މިނެޓުގައި ޕޯޗުގަލްގެ ކްރިސްޓިއާނޯ ރޮނާލްޑޯ ވަނީ ލަނޑުޖަހާ ޕޯޗުގަލްއަށް އުންމީދު އާކޮށްދީފައެވެ. މި ލަނޑަކީ ރޮނާލްޑޯ އޭނާގެ ކެރިޔަރުގައި ކާމިޔާބުކުރި 700 ވަނަ ލަނޑެވެ. މި ލަނޑާ އެކު ރޮނާލްޑޯ ވަނީ ފީފާގެ އެލީޓް ހަ ކުޅުންތެރިންގެ ތެރޭގައި ހިމެނިފައެވެ.

މެޗަށްފަހު ރޮނާލްޑޯ ބުނީ 700 ލަނޑު ކެރިޔަރުގައި ކާމިޔާބުކުރެވުން އެއީ ލިބުނު ބޮޑު ކާމިޔާބީއެއް ކަމަށާއި ނަމަވެސް މި މެޗުން މޮޅެއް ނުލިބުމުން އެކަމާ މާޔުސްވިކަމަށެވެ.

މި ނަތީޖާ އާއިއެކު ޔޫކްރެއިން އިން އޮތީ ލިބުނު 19 ޕޮއިންޓާ އެކު ގްރޫޕް ބީ ގެ އެއްވަނައިގައެވެ. މެޗުން ބަލިވި ޕޯޗުގަލްއިން ގްރޫޕްގެ ދެވަނައިގައި 11 ޕޮއިންޓާއެކު އޮތްއިރު ތިންވަނައިގައި ސާބިއާ އިން އޮތީ 10 ޕޮއިންޓާއެކުގައެވެ.