ގަތަރުގައި 2022 ވަނަ އަހަރު ބާއްވާ ވޯލްޑް ކަޕް ތާރީހީ ވާނެ: އިންފަންޓީނޯ
14 އޮކްޓޯބަރު 2019 | ހޯމަ 14:43ނޮވެމްބަރ އަދި ޑިސެމްބަރ މަހު ވޯލްޑް ކަޕް އޮތުމަކީ ކުޅުންތެރިންނަށް ލިބޭ ފައިދާއެއް
ފީފާގެ ރައީސް ޖިއާނީ އިންފަންޓީނޯ | ޓްވިޓަރ
ގަތަރުގައި 2022 ވަނަ އަހަރު ބާއްވާ ވޯލްޑް ކަޕް ހުރިހާ ގޮތަކުންވެސް ތާރީހީ ވާނެ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.
ޑެލޯ ސްޕޯޓް އަށް ދެއްވި އިންޓަވިއުއެއްގައި އިންފަންޓީނޯ ވިދާޅުވީ، ގަތަރުގައި ބާއްވާ ވޯލްޑް ކަޕް އޮންނާނީ ނޮވެމްބަރ އަދި ޑިސެމްބަރ މަހު ކަމަށާއި، މިއީ ކުޅުންތެރިންނަށް ލިބޭ ވަރަށް ބޮޑު ލުޔަކަށް ވެގެން ދާނެ ކަމަށެވެ.
އެގޮތުން އިންފަންޓީނޯ ވިދާޅުވީ، ވޯލްޑް ކަޕާ ކުޅުންތެރިން ކުރިމަތިލާނީ އެންމެ ރަނގަޅު ފިޒިކަލް އާއި ޓެކްނިކަލް ލެވެލްއެއްގައި ކަމަށާއި، ކުޅުންތެރިންނަށް ގިނަ ފައިދާތަކެއް ކުރާނެ ކަމަށެވެ.
ވޯލްޑް ކަޕްގެ މެޗުތައް ގަތަރުގައި ކުޅޭނީ 70 ކިލޯ މީޓަރު ތެރޭގައި ކަމަށާއި، މިއީވެސް ލިބޭނެ ފައިދާއެއް ކަމަށް އިންފަންޓީނޯ ވަނީ ވިދާޅުވެފައެވެ. އަދި ޔޫރަޕުން ގަތަރަށް ދަތުރުކުރަން ހަ ގަޑިއިރު ނެގުމަކީވެސް ލިބޭ ފައިދާއެއްކަން އިންފަންޓީނޯ ވަނީ ފާހަގަކުރައްވާފައެވެ.
ގަތަރުގައި 2022 ވަނަ އަހަރު ބާއްވާ ވޯލްޑް ކަޕް ކުޅޭނީ ފަސް ސިޓީއެއްގެ 8 ސްޓޭޑިއަމެއްގައެވެ. މުބާރާތުގައި ޖުމްލަ 32 ޓީމު ވާދަކުރާނެއެވެ.
މުބާރާތް ހޮސްޓް ކުރުމުގެ ފުރުސަތު ގަތަރަށް ލިބުނީ އެމެރިކާ އާއި ސައުތު ކޮރެއާ އާއި ޖަޕާން އަދި އޮސްޓްރޭލިއާއާ ވާދަކޮށްގެންނެވެ.
