ރަށްތައް ހިއްކާގޮތަށް ބަދަލު ގެނެސް، ރަށް ވަށާ ތޮށިލުން ހުއްޓާލަނީ
ރަށުގެ ބޭރުތޮށި ނުލައި ބީޗް އޮންނަ ގޮތަށް ރަށް ހިއްކަމުންދާނެ ކަމަށް ވިދާޅުވި
ރަށެއްގެ ބިން ހިއްކުން ކުރިއަށްގެންދަނީ
ރަށްރަށް ހިއްކުމުގައި އާންމު ގޮތެއްގައި ގެންގުޅެމުން އައި އުސޫލަށް ބަދަލުގެންނަން ނިންމާފައިވާ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެ އެވެ.
ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީއަށް ހާޒިރުވެވަޑައިގެން ދެއްކެވި ވާހަކަފުޅުގައި މިނިސްޓަރ އަސްލަމް ވިދާޅުވީ މީގެކުރިން ކުދި ރަށްތައް ހިއްކާގޮތަށް ބަދަލުގެނެސް ހިއްކާތަން ވަށައިގެން ތޮށިލުން ހުއްޓާލަން ނިންމާފައިވާ ކަމަށެވެ. އަދި ރަށްރަށް ހިންގުމުގެ މަސައްކަތްތައް ކުރިއަށްގެންދާނީ ޕްލޭންކޮށްގެންކަމަށް އަސްލަމް ވިދާޅުވި އެވެ.
އަސްލަމް ވިދާޅުވީ ފަހުގެ ތާރީޚުގައި ބިން ހިއްކަމުންދަނީ އެހާބޮޑަށް ތޮށި ނުލާ ބީޗް ބޮޑުބައިގައި އޮންނަ ގޮތަށް ކަމަށެވެ. ނަމަވެސް ލާ ބީޗް ހިމާޔަތް ކުރުމަށްޓަކައި ކޮންމެވެސް ވަރަކަށް ތޮއްޓެއް ލާންޖެހޭ ކަމަށް ވިދާޅުވިއެވެ.
ރީތި ބީޗެއް ލެވުމުން ގެސްޓްހައުސް ޓުއަރިޒް އައުމާއިއެކު ރަށުގެ އަގު މައްޗަށް ގެންދެވޭނެ ކަމަށް މިނިސްޓަރ ވިދާޅުވިއެވެ. އަދި ދެން ކުރިއަށް ގެންދާ ބިންހިއްކުމުގެ މަޝްރޫއުތައް ދެން ކުރިއަށް ގެންދާނީ އެ ވިސްނުމުގައި ކަމަށް އަސްލަމް ވިދާޅުވިއެވެ.
