ރޮމޭނިއާގެ ބޮޑު ވަޒީރުގެ އިތުބާރު ނެތްކަމުގެ ވޯޓު ނަގާއި، ސަރުކާރު ވައްޓާލައިފި

ރޮމޭނިޔާގެ ބޮޑު ވަޒީރު ވިއޮރިކާ ޑަންސެލާގެ އިތުބާރު ނެތްކަމުގެ ވޯޓު ނަގައި, އެގައުމުގެ ސަރުކާރު ވައްޓާލައިފިއެވެ.

ރިޕޯޓުތައް ބުނާ ގޮތުން ބޮޑު ވަޒީރުގެ އިތުބާރު ނެތްކަމަށް އެ ގައުމުގެ ގާނޫނު ހަދާ މަޖިލީހުގެ 238 މެމްބަރުން ވަނީ ވޯޓުދެއްވާފައެވެ. އެކަމަނާ މަގާމުން ދުރުކުރަން ބޭނުންވަނީ 233 ވޯޓެވެ.

ރޮމޭނިޔާގެ ރިޔާސީ އިންތިހާބު އަންނަ މަހު ބާއްވަން ހަމަޖެހިފައިވާއިރު، ގާނޫނު ހަދާ މަޖިލީހުގެ އިންތިހާބު މި ވަގުތު ބޭއްވުމަކީ އެންމެ އެދެވިގެންވާ ކަމެއް ނޫނެވެ. ރޮމޭނިޔާގެ ގާނޫނުގައި ބުނާ ގޮތުން ރިޔާސީ އިންތިހާބުގެ ހަމަސް ކުރިން ގާނޫނު ހަދާ މަޖިލީހުގެ އިންތިހާބެއް ނުބެއްވޭނެއެވެ.

އާ ބޮޑުވަޒީރަކަށް އައްޔަން ކުރައްވާ ބޭފުޅެއްގެ ނަން އިދިކޮޅުން 10 ދުވަސް ތެރޭގައި ރައީސް ކްލައުސް ލޮހަނިސް އަށް ހުށައަޅާ އެމަނިކުފާނުގެ ރުހުން ހޯއްދަވަން ޖެހޭއެވެ.

ރައީސްގެ އިތުރުން ވަޒީރުންނަށް ހުށައަޅާ ނަންތަކަށް ގާނޫނު ހަދާ މަޖިލީހުން ރުހުންދޭން ޖެހޭއެވެ.

ދެން އަންނަ ސަރުކާރަކުން، 2020 ވަނަ އަހަރުގެ ބަޖެޓުގެ މަސައްކަތް އެކުލަވަލާއި، ޕެންޝަނަށްދޭ 40 އިންސައްތަ އިތުރު ކުރަން ޖެހޭއިރު، އެއީ ޑަންސެލަ ނިސްބަތްވެ ވަޑައިގަންނަވާ ސޯޝަލް ޑިމޮކްރެޓިކް ޕާޓީގެ ވައުދެކެވެ.