ކަންކަން ބޮއްސުންލައިގެންދަނީ އުނގެނޭ ތައުލީމް ބޭނުން ނުކުރެވޭތީ: މުސްތަފާ
ތިއަރީއަކީ ވަރަށް މުހިންމު އެއްޗެއް
މުހައްމަދު މުސްތަފާ ހުސެއިން
ގިނަ ފަހަރަށް ކަންކަން ބޮއްސުންލައިގެންދަނީ މަސައްކަތުގެ މައިދާނުގައި އުނގެނޭ ތައުލީމް ބޭނުން ނުކުރެވޭތީ ކަމަށް ގިނަ ދުވަސްތަކެއް ވަންދެން ސަރުކާރަށް ޚިދުމަތް ކުރެއްވި މުހައްމަދު މުސްތަފާ ހުސެއިން ވިދާޅުވެއްޖެއެވެ.
ނުރަސްމީ ތައުލީމު މަހާސިންތާ ޝަރަފުވެރިކޮށްދެއްވާ ވާހަކަފުޅު ދައްކަވަމުން މުސްތަފާ ވިދާޅުވީ ކޮންމެ މީހަކު ވެސް މަސައްކަތުގެ މައިދާނަށް ނުކުންނައިރު ތިއަރީއަކީ ވަރަށް މުހިންމު އެއްޗެއް ކަމަށެވެ. މުސްތަފާ ވިދާޅުވީ ކަމެއް ކުރާއިރުގައި އެކަމެއް ކުރުމަށްޓަކައި ކަނޑައެޅިފައިވާ ވައްޓަފާޅިއާ އެއްގޮތަށް މަސައްކަތް ކުރަންޖެހޭ ކަމަށާއި، ކާމިޔާބީއާ ހަމައަށް ވާސިލްވުމަށް އެއީ ވަރަށް މުހިންމު ކަމެއް ކަމަށެވެ.
މުސްތަފާ ވިދާޅުވީ ގިނަ ފަހަރަށް ކަންކަން ބޮއްސުންލައިގެންދަނީ އުނގެނޭ ތައުލީމު މަސައްކަތުގައި މާހައުލުގައި ބޭނުންނުކުރެވިދާތީ ކަމަށާއި، އެކަމަށް އެކިލެވަލްގައި މަސައްކަތް ކުރަން މިއަދު ޖެހިފައިވާ ކަމަށެވެ.
މުސްތަފާ ވިދާޅުވީ ކޮންމެ ދާއިރާއެއްގައި މަސައްކަތް ކުރި ނަމަވެސް އެކުލަވާލާފައިވާ ތިއަރީއާ އެއްގޮތަށް މަސައްކަތްތައް ކުރެވިއްޖެނަމަ މިއަދު ނެރޭ ނަތީޖާއަށްވުރެ މާރަނގަޅު ނަތީޖާއެއް ނެރެވޭނެ ކަމަށާއި، އެތައް ކުދިންނަށް މަސައްކަތުގެ މާހައުލުން ފެނިގެންދާނެ ކަމަށެވެ. އަދި އެގޮތަށް ވިސްނުން ބަހައްޓަވައިގެން ނުރަސްމީ ތައުލީމު މަހާސިންތާ ކުރިއަށް ގެންދިއުމަށް މުސްތަފާ އެދިވަޑައިގަތެވެ.
