ރައްޔިތުންގެ މަޖިލީހުގެ ތުލުސްދޫ ދާއިރާގެ ކުރީގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) ޖުމްހޫރީ ޕާޓީ (ޖޭޕީ) އަށް ސޮއިކުރައްވައިފި އެވެ.

ވައްޑެ ޖޭޕީއަށް ސޮއިކުރެއްވީ އާދިއްތަ ދުވަހު މ. ކުނޫޒް ގައި ބޭއްވި ރަސްމިއްޔާތެއްގައެވެ.

އެ ރަސްމިއްޔާތުގައި ވާހަކަދައްކަވަމުން ވައްޑެ ވިދާޅުވީ، މިވެރިކަން ގެނައުމަށްޓަކައި އިސްލާހަށް ކުރެއްވި މަސައްކަތުގައި، އޭރުގެ ސަރުކާރު ތެރޭގައި އެހެން ގޮތެއް ނެތިގެން ހަނު ހުންނެވި މީހުންނަށް މާފުކޮށްފި ކަމަށާއި، އެމީހުންނާއި ދޭތެރޭ އެއްވެސް ހަސަދަވެރިކަމެއް ނެތް ކަަމަށެވެ. އަދި ހަމައެއާއިއެކު އެންމެ ގިނަ އަނިޔާލިބިވަޑައިގެންނެވީ ރައީސް ޔާމީންގެ ފަރާތުން ކަމަށާއި، ރައީސް ޔާމީނަށް ވެސް މާފުކޮށްފިކަމަށް އޭނާ ވިދާޅުވިއެވެ.

ގާސިމްއަށް ތައުރީފް ކުރައްވަމުން ވައްޑެ ވިދާޅުވީ، އެންމެ ނިކަމެތި ރައްޔިތުންނާއި ދޭތެރޭ އޯގާތެރިވެ ހަމްދަރުދީވާ ބޭފުޅަކީ ގާސިމް ކަމަށެވެ. އަދި ވިދާޅުވީ، އެފަދަ ބޭފުޅުކު ރާއްޖޭގެ ރައީސް ކަމަށް ވަޑައިގެންނެވިނަމަ އެންމެ އުފާވާނީ އެ ރައްޔިތުން ކަމަށެވެ.

ވައްޑެ ޖޭޕީއަށް ސޮއިކުރައްވާފައިވާއިރު، 18 ވަނަ މަޖިލީހަށް އިންތިހާބު ވެވަޑައިގެންނެވީ ޕީޕީއެމްގެ ޓިކެޓްގައެވެ. އެހެން ނަމަވެސް ރައީސް މައުމޫނަށް ތާއިދުކުރައްވާން ނިންމެވުން ޕީޕީއެމް އިން ވަކިކުރިއެވެ. އަދި އޭގެ ފަހުން އޭނާގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ވަނީ ހުކުމްކޮށްފަ އެވެ. ވައްޑެއަކީ ގޮނޑި ގެއްލުވާލި 12 މެމްބަރުންގެ ތެރެއިން އެއް މެމްބަރެވެ.